នាយករដ្ឋមន្រ្តីអូស្ត្រាលីស្វាគមន៍សហរដ្ឋអាមេរិក ដែលចង់វិលចូលកិច្ចព្រមព្រៀងទីក្រុងប៉ារីស និងអង្គការ WHO
អូស្រ្តាលី៖ នាយករដ្ឋមន្រ្តីអូស្រ្តាលីលោក ស្កុត ម៉ូរីសុន នៅថ្ងៃចន្ទនេះថ្លែងថា ប្រទេសរបស់លោកនឹងស្វាគមន៍ប្រធានាធិបតីជាប់ឆ្នោតលោក ចូ បៃដិន ដឹកនាំសហរដ្ឋអាមេរិកមកចូលរួមក្នុងកិច្ចព្រមព្រៀងក្រុងប៉ារីសស្តីពីអាកាសធាតុ នេះបើតាមសារព័ត៌មានរ៉យទ័រនៅថ្ងៃទី០៩ ខែវិច្ឆិកា ឆ្នាំ២០២០ ។
នាយករដ្ឋមន្រ្តីអូស្រ្តាលីរូបនេះបានថ្លែងប្រាប់អ្នកសារព័ត៌មានថា យើងនឹងស្វា គមន៍សហរដ្ឋអាមេរិកវិលមកក្នុងកិច្ចព្រមព្រៀងក្រុងប៉ារីស… ការវិលត្រឡប់របស់សហរដ្ឋអាមេរិកមកកាន់អង្គការពិភពលោកដទៃទៀត ដូចជាអង្គការសុខភាពពិភពលោក WHO ក៏នឹងត្រូវស្វាគមន៍ផងដែរ ។
ដោយឡែកកាលពីថ្ងៃអាទិត្យសប្តាហ៍កន្លងទៅ លោក ម៉ូរីសុន ក៏បាននិយាយដែរថា អូស្ត្រាលីក៏នឹងស្វាគមន៍ការចូលពាក់ព័ន្ធរបស់សហរដ្ឋអាមេរិកជាមួយអង្គការពាណិជ្ជកម្មពិភពលោក ពីព្រោះវិធីចាកចេញពីឱនភាពសកលមួយ ដែលបង្កឡើងដោយជំងឺ Covid-19 គឺពាណិជ្ជកម្មផ្អែកលើទីផ្សារ ពាណិជ្ជកម្មយុត្តិធម៌ ក្រោមច្បាប់ត្រឹមត្រូវ តាមរយៈអង្គការពាណិជ្ជកម្មពិភពលោកនេះឯង ៕
