ដោយ៖ម៉ាដេប៉ូ

រាជធានីភ្នំពេញ៖ក្រសួងអប់រំយុវជន និង កីឡាបានឱ្យដឹងថា ការពន្យារពេលនៃការប្រឡងជ្រើសរើសនិស្សិតអាហារូបករណ៍ថ្នាក់បណ្ឌិត​ បរិញ្ញាបត្រ​ជាន់ខ្ពស់​ និងថ្នាក់បរិញ្ញាបត្រ​ ទៅសិក្សានៅព្រះរាជាណាចក្រថៃ​ ជំហានទី២​ សម្រាប់ឆ្នាំសិក្សា២០២១-២០២២​ ត្រូវបានពន្យារពេលបណ្តោះអាសន្នសិន។    

  យោងតាមសេចក្តីជូនដំណឹងរបស់ក្រសួងអប់រំយុវជននិងកីឡាកាលពីថ្ងៃទី ១២ខែវិច្ឆិកាឆ្នាំ២០២០បានបញ្ជាក់ដល់បេក្ខជនដែលបានប្រឡងជាប់ជំហានទី១ គម្រោងអាហារូបករណ៍ព្រះរាជឧបត្ថម្ភដល់កម្ពុជាលើវិស័យអប់រំ ទៅសិក្សានៅប្រទេសថៃសម្រាប់ឆ្នាំសិក្សា២០២១-២០២២ នាសម័យប្រឡងថ្ងៃទី ២៧ ខែ កញ្ញា ឆ្នាំ ២០២០នៅមណ្ឌលប្រឡងវិទ្យាល័យព្រះស៊ីសុវត្តិឱ្យជ្រាបថា៖ការប្រឡងជំហានទី២ដែលគ្រោងរៀបចំឡើងនៅថ្ងៃទី១៥ខែវិច្ឆិកា ឆ្នាំ២០២០នៅមណ្ឌលប្រឡងវិទ្យាស្ថានបច្ចេកវិទ្យាកម្ពុជានិងការសម្ភាសន៍នៅថ្ងៃទី០១ខែធ្នូ ឆ្នាំ២០២០ត្រូវបានផ្អាករហូតដល់មានសេចក្តីជូនដំណឹងជាថ្មី៕