សហព័ន្ធកីឡាវាយកូនគោលកម្ពុជាបានប្រកាសថា នឹងរៀបចំការប្រកួតកីឡា​វាយកូន​គោល​ពាន​រង្វាន់​សម្តេច​តយេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជានៅថ្ងៃ ទី២៧ ខែ ធ្នូ ឆ្នាំ ២០២០ ខាង​មុខនេះ ដែលការប្រកួតរៀបចំនៅទីលានកីឡាវាយកូនគោលវឌ្ឍនៈហ្គោលរីស៊ត សង្កាត់ ព្រែកថ្មី ខណ្ឌ ច្បារអំពៅ រាជធានីភ្នំពេញ។

     ឯកឧត្តម ជា បូរ៉ា រដ្ឋលេខាធិការ ក្រសួងទេសចរណ៍ និងជាអគ្គលេខាធិការ សហព័ន្ធកីឡា​វាយ​កូន​គោល​កម្ពុជា បានបញ្ជាក់ប្រាប់ថា ដោយទទួលបានការអនុញ្ញាតជាគោលការណ៍ដ៍ខ្ពង់ខ្ពស់ ពីសម្តេច តេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា សហព័ន្ធកីឡាវាយ​កូនគោល​កម្ពុជា​បាន​សម្រេច​យកថ្ងៃ ទី២៧ ខែ ធ្នូ ឆ្នាំ ២០២០ ជាថ្ងៃប្រកួតពានរង្វាន់សម្តេចលើកទី៥ ហើយ ការប្រកួតនេះ បាន​រៀប​ចំឡើង ដើម្បីចូលរួមអបអរសាទរពិធីរំលឹកខួបវិមានអនុស្សាវរីយ៍នយោបាយឈ្នះ ឈ្នះ និង​ខួប​លើកទី២២ នៃការបញ្ចប់សង្គ្រាមស៊ីវិលនៅកម្ពុជា និង ការអនុវត្តប្រកបដោយជោគជ័យ នយោ​បាយ ឈ្នះ ឈ្នះ របស់សម្តេចតេជោ ហ៊ុន សែន  ២៩ ធ្នូ ឆ្នាំ ២០២០។

        ឯកឧត្តម អគ្គលេខាធិការ បញ្ជាក់ឲ្យដឹងទៀតថា ការប្រកួតនេះយើងអនុញ្ញាត​ឲ្យកីឡាករ​ការិនី​ជាតិ និងអន្តរជាតិចូលរួមក្នុងនោះមាន មន្រ្តីរដ្ឋាភិបាល មន្រ្តីស្ថានទូតប្រចាំប្រទេសនានានៅកម្ពុជា ហើយ​ក៍មានការចូលរួមពីកីឡាករការិនីជម្រើសជាតិ និងថ្នាល់ជម្រើសជាតិផងដែរ។

           ចំពោះប្រភេទនៃវិញ្ញាសាប្រកួតមានដូចជា៖ ការប្រកួតលក្ខណៈជាក្រុម សម្រាប់កីឡាករវ័យ​ចំណាស់ ថ្នាក់ដឹកនាំ និងមន្រ្តីស្ថានទូត ក្នុង១ក្រុមមានកីឡាករចំនួន៣នាក់ ដែលយកបាល់ល្អ​ជាង​គេ​។ សម្រាប់ការប្រកួតជាក្រុម កីឡាករត្រូវវាយចេញនៅ ធី ស  សម្រាប់ប្រកួតវិញ្ញាសាឯកក្តជន កីឡាករ​ទូទៅវាយចេញនៅ ធី មាស កីឡាករវ័យចំណាស់វាយចេញនៅ ធី ស កីឡាការិនីវាយនៅ ធី ក្រហម កីឡាករវ័យជំទង់វាយចេញនៅ ធី ទឹកក្រូច៕