លោក ដូណាល់ ត្រាំ ធ្លាប់ស្នើសុំជម្រើសបើកការវាយប្រហារទីតាំងនុយក្លេអ៊ែរអ៊ីរ៉ង់ តែត្រូវលុបចោលវិញក្រោយមានការប្រឹក្សាពីហានិភ័យនៃជម្លោះ
អាមេរិក៖ កាលពីសប្តាហ៍មុន ប្រធានាធិបតីអាមេរិកលោក ដូណាល់ ត្រាំ ធ្លាប់បានស្នើសុំជម្រើសអោយមានការវាយប្រហារទីតាំងនុយក្លេអ៊ែរសំខាន់ៗ របស់ប្រទេសអ៊ីរ៉ង់ ប៉ុន្តែមន្ត្រីរបស់លោកមិនគាំទ្រ នេះបើតាមប្រភពពីមន្រ្តីអាមេរិកមួយរូប ក្នុងលក្ខខណ្ឌមិនបញ្ចេញឈ្មោះ ដកស្រង់ចេញផ្សាយដោយសារព័ត៌មានរ៉យទ័រនៅថ្ងៃទី១៧ ខែវិច្ឆិកា ឆ្នាំ២០២០ ។
មន្រ្តីអាមេរិករូបនេះបានបង្ហើបអោយដឹងទៀតថា ទីប្រឹក្សាលោក ត្រាំ បានបញ្ចុះបញ្ចូលមិនឲ្យបើកការវាយប្រហារលើអ៊ីរ៉ង់ ដោយសារតែហានិភ័យនៃជម្លោះ អាចរាលដាលកាន់តែធំ ។ លោក ដូណាល់ ត្រាំ បានស្នើសុំជម្រើសនៃការវាយប្រហារ ហើយក្រុមមន្ត្រីបានបង្ហាញសេណារីយ៉ូនានា ប៉ុន្តែនៅទីបំផុតលោក ត្រាំ ក៏បានលុបចោលការសម្រេចចិត្តវិញ ។ យ៉ាងណាមិញ សេតវិមានបានបដិសេធមិនធ្វើសេចក្តីអត្ថាធិប្បាយអ្វីឡើយលើបញ្ហានេះ ។
សូមបញ្ជាក់ថា បើតាមមន្រ្តីអាមេរិកខាងលើនេះ លោក ដូណាល់ ត្រាំ បានស្នើសុំជម្រើសនេះ អំឡុងកិច្ចប្រជុំមួយនៅក្នុងសេតវិមានកាលពីថ្ងៃព្រហស្បតិ៍សប្តាហ៍មុន ជាមួយនឹងជំនួយការសន្តិសុខកំពូលៗ រួមមានអនុប្រធានាធិបតីលោក ម៉ៃ ភែន រដ្ឋមន្ត្រីក្រសួងការបរទេស ម៉ៃ ប៉ុមប៉េអូ រដ្ឋមន្ត្រីស្តីទីក្រសួងការពារជាតិលោក គ្រីស្តូហ្វឺ មៀលឡឺ និងលោកឧត្តមសេនីយ៍ ម៉ាក មីល្លេយ អគ្គសេនាធិការចម្រុះនៃកងទ័ពអាមេរិក ៕
