បង្ក្រាបបាតុកម្មមុខសភាថៃ របួសមនុស្សយ៉ាងតិច៥៥នាក់
មនុស្សយ៉ាងហោចណាស់ ៥៥នាក់បានរងរបួស ក្នុងពេលបង្ក្រាបបាតុកម្មនៅមុខសភាថៃ កាលពីម្សិលមិញ ចំពេលដែលសមាជិកសភាបានប្រជុំចរចា លើសំណើកែប្រែរដ្ឋធម្មនុញ្ញ ដែលពួកបាតុករទាមទារឲ្យធ្វើ។
មានការចោទប្រកាន់ថា នគរបាលបានបាញ់កាំភ្លើងចេញទឹកនិងកាំភ្លើងគ្រាប់ជ័រ ទៅលើហ្វូងបាតុករ តែនគរបាលបានបដិសេធថា គេមិនបានបាញ់កាំភ្លើង ឬគ្រាប់ជ័រទៅលើហ្វូងបាតុករទេ ហើយថា ពួកគេនឹងស៊ើបអង្កេតថា ភាគីខាងណាជាអ្នកបាញ់នោះ។ ការបង្ក្រាបលើកនេះត្រូវបានចាត់ទុកថា ជាការបង្ក្រាបហិង្សាដ៏អាក្រក់បំផុត ចាប់តាំងពីមានបាតុកម្មដំបូង កាលពីខែកក្កដាមក។
បាតុកម្មដើរជាក្បួនព្យុហយាត្រារបស់ពួកយុវជនធ្វើឡើង ស្របពេលដែលសភាថៃជួបប្រជុំ ២ថ្ងៃ សម្រេចថា តើនឹងកែប្រែរដ្ឋធម្មនុញ្ញឬយ៉ាងណា ដោយពួកបាតុករចោទថា រដ្ឋធម្មនុញ្ញបច្ចុប្បន្នគាំទ្រដោយយោធា គ្មានលទ្ធិប្រជាធិបតេយ្យទេ៕
