ប្រាសាទតាព្រហ្ម (ខេត្តតាកែវ)

ប្រាសាទ​តាព្រហ្ម ​ស្ថិត​​នៅ​ក្នុង​រមណីយដ្ឋាន​ទនេ្លបាទីក្នុង​ភូមិសាស្រ្ត ភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ មាន​ចម្ងាយ ៣៤​គីឡូម៉ែត្រ​ពី​រាជធានី​ភ្នំពេញ​ តាម​ផ្លូវ​ជាតិ​លេខ ២។ ប្រាសាទ​នេះ​សង់​ឡើង​នៅ​សតវត្សរ៍ទី ១២ និង ដើមសតវត្សរ៍ទី ១៣ ពីឆ្នាំ ១១៨១ ដល់ឆ្នាំ ១២០១ ធ្វើ​ពី​ថ្មភក់​ប្រកប​ដោយ​ក្បូរក្បាច់​រចនា​ដ៏​វិចិត្រ ប្រហាក់​ប្រហែល​នឹង​ប្រាសាទតាព្រហ្ម​នៅ​ខេត្តសៀមរាប​ដែរ ​ព្រោះ​ស្ថាបត្យកម្ម​នេះ​ស្ថិត នៅ​ក្នុងរចនាប័ទ្មបាយ័ន នា​រជ្ជកាល​ព្រះបាទជ័យវរ្ម័នទី៧ ដែល​ជា​អធិរាជ​នៃ​ចក្រភពកម្ពុជទេស។ បន្ទាប់​ពី​បញ្ចប់​សឹក​សង្រ្គាម​ជា​មួយ​ដែន​ដី​ចម្ប៉ា​រំដោះ​បាន​រាជធានី​ អង្គរ និង​មាតុភូមិ ជា​ស្ថាពរ​មក​ព្រះបាទជ័យវរ្ម័នទី៧ ចាប់​ផ្តើម​ធ្វើ​ការ​បង្រួប​បង្រួម​ជាតិ​តាម​មាគ៌ា​សន្តិភាព​នូវជាតូបនីយកម្ម​ដោយបាន​ភ្ជាប់​គ្នា​រវាង​ព្រះពុទ្ធសាសនាមហាយាន និងព្រហ្មញ្ញសាសនា​គោរព​អាទិទេព​ទាំង៣ ឬ​ត្រីម៌ូតិ​។ ការ​បង្រួប​បង្រួម​នេះ សែ្តង​ចេញ​តាម​រយៈ​សំណង់​ប្រាសាទ​ធំៗ​មាន​ជា​អាទិ៍​ប្រាសាទបាយ័ន ប្រាសាទបន្ទាយក្តី ប្រាសាទព្រះខ័ន ប្រាសាទបន្ទាយឆ្មារ ស្រះស្រង់ ប្រាសាទនាគព័ន្ធ ប្រាសាទតាសោម ប្រាសាទក្រោលគោ មហា​កំពែង​ព័ទ្ធ​ជុំវិញ​ក្រុង​អង្គរ​ធំជា​ដើម។

ដោយ​ឡែក​ប្រាសាទ​តាព្រហ្ម​ទាំង​ពីរ នៅ​ខេត្តសៀមរាប និងខេត្តតាកែវ ត្រូវ​បាន​ស្ថាបនា​ឡើង​​ដើម្បី​ឧទ្ទិស​ថ្វាយ​​ដល់​ព្រះលោកេស្វរៈ និង​យក​ធ្វើ​ជា​អារាម​សម្រាប់​ព្រះ​សង្ឃ​គង់​​នៅ​រហូត​ដល់​ប្រាសាទតាព្រហ្ម នៅ​តំបន់​អង្គរ​មាន​ឈ្មោះដើមថា​​រាជវិហារ សម្រាប់​ប្រាសាទ​តាព្រហ្ម​នៅទនេ្លបាទី ទោះ​បី​ជា​វិសាលភាព​តូច​ជាង​ប្រាសាទ​ទី​១ នៅ​តំបន់​អង្គរ​ក្តី ក៏​តឹក​តាង​បង្អាញ​ថា​​វា​មាន​លក្ខណៈ​ជា​អារាម ឬ​ជា​បូជនីយដ្ឋាន​ដ៏​ពិសិដ្ឋ។

នៅ​ទនេ្លបាទី​ គ្មាន​ភ្នំ​នៅ​ជិត​ទេ តើ​ដូន​តា​ខែ្មរ​យក​ថ្ម​ពី​ណា​មក​កសាង​ប្រាសាទ ? សំណួរ​នេះ ត្រូវ​បាន​អ្នក​ប្រវត្តិសាស្រ្ត​បកស្រាយ​ថា​គេ​​ត្រូវ​ដឹក​តាម​រទេះ ដាក់​ខ្នង​ដំរី ដាក់​សំពៅ នាំ​យក​ផ្ទាំង​ថ្ម​ទាំង​នោះ ដែល​រួម​មាន​ថ្មបាយកៀ្រម និង​ថ្មភក់ ពី​ភ្នំ​ឆ្ងាយ​ៗ មក​កសាង​ឲ្យ​កើត​ជា​ប្រាសាទ​នេះ​ឡើង ដែល​កំពូល​ប្រាសាទ​កណ្តាល​​មាន​កម្ពស់​ដល់​ទៅ​១២​ម៉ែត្រ ចំណែក​បរិវេណ​កំពែង មាន​បណ្តោយ​១៥០​ម៉ែត្រ ទទឹង​៩៥​ម៉ែត្រ។

បើយើងធ្វើដំណើរចេញពីក្រុងភ្នំពេញទៅតាមផ្លូវជាតិលេខ២ ចម្ងាយ៣២គ.ម ទៅដល់អូររូង ក្នុងស្រុកបាទី ខេត្តតាកែវ បត់ទៅខាងលិចចម្ងាយ២គ.ម ក្នុងឃុំក្រាំងធ្នង់ ស្រុកនិងខេត្តដដែល នឹងបានឃើញទនេ្លបុរាណមួយ មានមណ្ឌលរាងទ្រវែងបណ្តោយថៃ្ង មានទឹកល្អល្អាច ខួបប្រាំង ខួបវស្សា ហៅថា ទនេ្លបាទី កែ្បរឆេ្នរខាងនៃទនេ្លនោះមានប្រាសាទពីរ ហៅប្រាសាទតាព្រហ្មមួយ ប្រាសាទយាយពៅមួយ។

ឆាយ រត្ថា
ឆាយ រត្ថា
លោក ឆាយ រត្ថា ជាបុគ្គលិកផ្នែកព័ត៌មានវិទ្យា នៃអគ្គនាយកដ្ឋានវិទ្យុ និងទូរទស្សន៍ អប្សរា
ads banner
ads banner
ads banner