ក្រសួងអប់រំ តម្រូវឱ្យគ្រប់ភាគីពាក់ព័ន្ធដំណើរការប្រឡងបាក់ឌុប អនុវត្តវិធានសុវត្ថិភាពសុខភាពឱ្យម៉ឺងម៉ាត់
(ភ្នំពេញ)៖ ដើម្បីបង្ការជំងឺនិងគ្រោះថ្នាក់ផ្សេងៗអំឡុងពេលប្រឡងសញ្ញាបត្រមធ្យមសិក្សាទុតិយភូមិ ឬប្រឡងបាក់ឌុបនៅថ្ងៃទី21 ខែធ្នូខាងមុខ ក្រសួងអប់រំ យុវជន និងកីឡា បានកំណត់វិធានសុវត្ថិភាពសុខភាពចាំបាច់មួយចំនួនសម្រាប់គណៈមេប្រយោគ គណៈកម្មការនានា និងបេក្ខជនប្រឡងត្រូវអនុវត្តឱ្យបានម៉ឹងម៉ាត់។ វិធានសុវត្ថិភាពទាំងនោះ ត្រូវអនុវត្តនៅដំណាក់កាលមុនដំណើរការសំណេរ ក្នុងពេលដំណើរការសំណេរ និងក្នុងដំណើរការកំណែរ។
ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា បានបញ្ជាក់ប្រាប់ AMS Education នៅថ្ងៃពុធនេះថា គ្រប់ភាគីពាក់ព័ន្ធដំណើរការប្រឡងបាក់ឌុប ត្រូវចូលរួមបន្តអនុវត្តវិធានការសុវត្ថិភាពសុខភាព ដូចមានចែងក្នុងគោលការណ៍ស្តង់ដារប្រតិបត្តិ (SoP) ដែលក្រសួងអប់រំបានដាក់ចេញនិងកំពុងអនុវត្ត។
ឯកឧត្តម រស់ សុវាចា បានបន្ថែមថា៖ “ជារួម ក្រសួងអប់រំ យុវជន និងកីឡា រក្សាលំនាំដើមទាំងបច្ចេកទេស និងនីតិវិធីសម្រាប់ការរៀបចំការប្រឡងបាក់ឌុប ដោយបន្ថែមវិធានការសុវត្ថិភាពសុខភាពយ៉ាងម៉ឺងម៉ាត់។ ក្រសួងអប់រំរៀបចំបន្ទប់សុខភាពបំពាក់នូវសម្ភារចាំបាច់សម្រាប់សង្គ្រោះបឋមដោយសហការជាមួយមន្ត្រីសុខាភិបាលនិងរៀបចំបន្ទប់បម្រុងដោយឡែកសម្រាប់បេក្ខជនដែលមានបញ្ហាសុខភាព ដូចជា មានកម្តៅលើសពី 37.5 អង្សារសេ”។
បន្ថែមលើនេះក្រសួងអប់រំ យុវជន និងកីឡា បានណែនាំដល់ដល់គ្រប់ភាគីពាក់ព័ន្ធ រួមមានគណៈមេប្រយោគ គណៈកម្មការនានា និងបេក្ខជនប្រឡង ត្រូវអនុវត្តវិធានចាំបាច់មួយចំនួនដូចជា ទទួលទានដំណេក បរិភោគអាហារ និងទឹកស្អាតឱ្យបានគ្រប់គ្រាន់ប្រកបដោយសុវត្ថិភាពនិងសុខភាព ជាពិសេសត្រូវទទួលទានអាហារពេលព្រឹក។ ទន្ទឹមគ្នានេះ ត្រូវប្រកាន់ខ្ជាប់ក្បួនអនាម័យជាប្រចាំ អនាម័យខ្លួនប្រាណ សម្លៀកបំពាក់ លាងសម្អាតដៃឱ្យបានញឹកញាប់ និងត្រៀមបម្រុងសម្ភារៈអនាម័យ មានដូចជាម៉ាស់ការពារ អាល់កុលឬជែលលាងដៃ សម្រាប់ប្រើប្រាស់ផ្ទាល់ខ្លួននៅពេលប្រឡង។
សូមបញ្ជាក់ថា គោលការណ៍ប្រតិបត្តិស្តង់ដារ (SoP) ត្រូវបានក្រសួងអប់រំរៀបចំឡើងក្នុងវត្ថុបំណងណែនាំអំពីវិធាននានា រួមទាំងវិធានការសុខាភិបាល ដើម្បីគ្រឹះស្ថានសិក្សាអាចរៀបចំ និងត្រៀមលក្ខណៈដំណើរការការបង្រៀន និងរៀនឡើងវិញ ក៏ដូចជាការបន្តអភិវឌ្ឍគ្រឹះស្ថានសិក្សានីមួយៗឱ្យមាននិរន្តរភាព ធានាបាននូវសុវត្ថិភាព សុខភាពសម្រាប់បុគ្គលិកសិក្សា គ្រូបង្រៀន និងសិស្សានុសិស្សក្នុងបរិបទកូវីដ-19 និងទៅអនាគត ៕