នាយករដ្ឋមន្ត្រីថៃបញ្ជាឲ្យមន្ត្រីពាក់ព័ន្ធ ទប់ស្កាត់ការបំពុលខ្យល់ដែលកើនឡើងខ្លាំង នៅបាងកក
នាយករដ្ឋមន្ត្រីថៃ លោកប្រាយុទ្ធ ចាន់អូចា បានបញ្ជាឲ្យមន្ត្រីពាក់ព័ន្ធចាត់វិធានការប្រយុទ្ធប្រឆាំងនឹងការបំពុលខ្យល់ ដែលកំពុងកើតមានខ្លាំងនៅក្រុងបាងកក និងបណ្តាខេត្តក្បែរៗ នាប៉ុន្មានថ្ងៃមកនេះ នេះបើតាមការចេញផ្សាយរបស់សារព័ត៌មានបាងកកប៉ុស្តិ៍ នាថ្ងៃទី១៦ ធ្នូនេះ។
នាយករដ្ឋមន្ត្រីបាននិយាយថា រាជរដ្ឋាភិបាលបានដាក់ចេញវិធានការជាបន្តបន្ទាប់ ប្រយុទ្ធប្រឆាំឆនងកម្រិតភាគល្អិតនៃខ្យល់ពុល PM2.5 ដែលកើនឡើងខ្លាំង ប៉ុន្តែបញ្ហាគឺកាន់តែអាក្រក់ឡើង ដោយសារតែអាកាសធាតុបច្ចុប្បន្ន។
លោកបានជំរុញដល់អ្នកដំណើរប្រើប្រាស់សេវាដឹកជញ្ជូនសាធារណៈ ឲ្យបានច្រើនបំផុត ហើយរដ្ឋាភិបាលនឹងពិចារណាក្នុងការណែនាំពីការកំហិតលើការធ្វើដំណើរតាមមធ្យោបាយឯកជន ក្នុងរាជធានីដែរ។
ខណៈដែលការដុតសំណល់កសិកម្ម គឺជាផ្នែកមួយនៃការនាំឲ្យមានខ្យល់ពុល PM2.5 ខ្លាំងដែរនោះ លោកប្រាយុទ្ធ បាននិយាយថា កសិករនៅមានការខ្វះខាតសម្ភារៈ ក្នុងការទុកដាក់ការចោលកាកសំណល់ដែលមិនឆេះ៕
