លោក បូរីស ចនសុន ប្រាប់អោយប្រជាជនស្នាក់នៅផ្ទះ ខណៈអង់គ្លេសសម្រេចបិទប្រទេសរហូតដល់ពាក់កណ្តាលខែកុម្ភៈ ឆ្នាំ២០២១
អង់គ្លេស៖ នាយករដ្ឋមន្រ្តីអង់គ្លេសលោក បូរីស ចនសុន បានជំរុញអោយប្រជាជនស្នាក់នៅក្នុងផ្ទះ ស្របពេលដែលរូបលោកប្រកាសបិទប្រទេសសាជាថ្មីម្តងទៀត ពីរបីម៉ោងក្រោយរដ្ឋមន្រ្តីដំបូងរបស់ស្កុតឡែនបានប្រកាសបិទទ្វារប្រទេសផងដែរ នេះបើតាមសារព័ត៌មានរ៉យទ័រនៅថ្ងៃទី០៥ ខែមករា ឆ្នាំ២០២១ ។
នៅក្នុងសន្ទរកថាតាមកញ្ចក់ទូរទស្សន៍ លោក បូរីស ចនសុន បានបញ្ជាក់ថា មនុស្សគ្រប់រូបនៅប្រទេសអង់គ្លេស ត្រូវតែស្នាក់នៅក្នុងផ្ទះ លើកលែងតែហេតុផលដែលត្រូវបានអនុញ្ញាតប៉ុណ្ណោះ ក្នុងអំឡុងពេលនៃការបិទប្រទេសដោយសារជំងឺ Covid-19 ។ លោក ចនសុន បានសង្កត់ធ្ងន់ថា រាល់វិធានការថ្មីៗនៅក្នុងចក្រភពអង់គ្លេសនឹងមានរយៈពេលរហូតដល់ពាក់កណ្តាលខែកុម្ភៈ ឆ្នាំ២០២១ខាងមុខ ដោយសារតែការរីករាលដាលនៃវីរុស Covid-19 ទម្រង់ថ្មី ដែលកំពុងវាយប្រហារពាសពេញប្រទេស ។
នាយករដ្ឋមន្រ្តីអង់គ្លេសរូបនេះបានព្រមានថា ក្នុងរយៈពេលប៉ុន្មានសប្តាហ៍ខាងមុខនេះ នឹងក្លាយជាពេលវេលាពិបាកបំផុត ចំពេលមានករណីកើនឡើង និងចំនួនអ្នកជំងឺ ហើយថា អ្នកដែលស្ថិតក្នុងក្រុមអាទិភាពទាំងបួន នឹងត្រូវផ្តល់ជូននូវវ៉ាក់សាំងដំបូងគេនៅត្រឹមពាក់កណ្តាលខែក្រោយនេះ ៕
