ក្រុមហ៊ុន Smart Axiata បរិច្ចាគថវិកា១ម៉ឺនដុល្លារដល់យុទ្ធនាការ «រត់ជាមួយសាយ» ដើម្បីជួយដល់មន្ទីរពេទ្យកុមារអង្គរ
ភ្នំពេញ៖ សិល្បករ Pleng រួមជាមួយតារាតាមបណ្តាញសង្គមដទៃទៀតបានចូលរួមជាមួយលោក អួន បឋម ដែលត្រូវបានគេស្គាល់ថា «សាយ» នៅថ្ងៃអាទិត្យម្សិលមិញនេះ ក្នុងព្រឹត្តិការណ៍រត់ចម្ងាយ១០គីឡូម៉ែត្រនៅទីក្រុងកោះពេជ្រ ដែលជាផ្នែកមួយនៃព្រឹត្តិការណ៍ «រត់ជាមួយសាយ» ដែលជាយុទ្ធនាការរៃអង្គាសថវិកាដើម្បីជួយដល់មន្ទីរពេទ្យកុមារអង្គរ ។
ក្រុមហ៊ុន Smart Axiata បានបរិច្ចាគថវិកាចំនួន១ម៉ឺនដុល្លារ ដល់យុទ្ធនាការរៃអង្គាសថវិការបស់ សាយ ដែលឥឡូវនេះថវិកាដែលបានរៃអង្គាសមានចំនួនលើសពី៤៨ម៉ឺនដុល្លារ បន្ទាប់ពីគាត់បានរត់ចម្ងាយជាង២ពាន់៤០៨គីឡូម៉ែត្រ ឆ្លងកាត់ខេត្តចំនួន ២១ ក្នុងរយៈពេល៩៧ថ្ងៃ ។ នាឱកាសនោះ លោក សាយ បានមានប្រសាសន៍ថា ខ្ញុំគោរព និងកោតសសើរការងារ ដែលមន្ទីរពេទ្យកុមារអង្គរកំពុងធ្វើ ដើម្បីផ្ដល់ការព្យាបាលដល់កុមារកម្ពុជា ហើយខ្ញុំបានជួយពួកគេតាមរយៈមធ្យោបាយដែលខ្ញុំអាចធ្វើទៅបាន ។ ឆ្នាំ ២០២០ គឺជាឆ្នាំដ៏លំបាកមួយ ប៉ុន្តែយ៉ាងណាក៏ដោយខ្ញុំមានអារម្មណ៍រំភើបណាស់ចំពោះការគាំទ្រ និងសប្បុរសធម៌របស់ប្រជាពលរដ្ឋខ្មែរក្នុងបុព្វហេតុដ៏គួរឱ្យស្ងើចសរសើរនេះ ។ លោកបន្តថា ខ្ញុំមានអារម្មណ៍សប្បាយរីករាយណាស់ ដែលក្រុមហ៊ុនធំៗនៅកម្ពុជា ដូចជាក្រុមហ៊ុន Smart បានចូលរួមគាំទ្រកម្មវិធីសប្បុរសធម៌របស់ខ្ញុំ ក្នុងការជួយប្រជាជនកម្ពុជាឲ្យចេះជួយយកអាសារគ្នា ជាពិសេសដល់អ្នកដែលមិនមានសំណាងជាងខ្លួន ជាពិសេសក្មេងៗ ។ លោក សាយ ក៏ទទួលបានការតែងតាំងជាច្រើនពីពលរដ្ឋកម្ពុជា ដើម្បីក្លាយជាជ័យលាភីពានរង្វាន់ពលរដ្ឋគំរូរបស់ក្រុមហ៊ុន Smart ផងដែរ ដែលជាផ្នែកមួយផ្សេងទៀតនៃយុទ្ធនាការ «ឆ្ពោះទៅមុខរួមគ្នា» របស់ក្រុមហ៊ុន Smart Axiata ដើម្បីជ្រើសរើសពលរដ្ឋកម្ពុជាដែលបាននាំមកនូវការផ្លាស់ប្តូរជាវិជ្ជមានដល់សហគមន៍របស់ពួកគេទោះបីជាប្រឈមនឹងការរីករាលដាលនៃជំងឺកូវីដ១៩ក៏ដោយ ។
លោក Feiruz Ikhwan នាយកផ្នែកហិរញ្ញវត្ថុក្រុមហ៊ុន Smart Axiata បញ្ជាក់ថា លោក សាយ បានលើកទឹកចិត្តដល់ពួកយើងទាំងអស់គ្នា ហើយពួកយើងនៅក្រុមហ៊ុន Smart មានមោទនភាពក្នុងការរួមចំណែកដល់សមិទ្ធិផលដ៏អស្ចារ្យរបស់គាត់ ក្នុងការរៃអង្គាសថវិការជាច្រើនតាមរយៈគំនិតផ្តួចផ្តើម ការខិតខំ និងការលះបង់ផ្ទាល់ខ្លួន ។ យើងសង្ឃឹមថា ការបរិច្ចាគរបស់ក្រុមហ៊ុនទៅកាន់យុទ្ធនាការ «រត់ជាមួយសាយ» នៅថ្ងៃនេះ ដែលជាផ្នែកមួយនៃយុទ្ធនាការ «ឆ្ពោះទៅមុខរួមគ្នា» របស់យើងនឹងលើកទឹកចិត្តឱ្យពលរដ្ឋកម្ពុជាឲ្យចេះរួមគ្នា និងចេះជួយគ្នាទៅវិញទៅមក ជាពិសេសជួយអ្នកដែលងាយរងគ្រោះបំផុត ក្នុងអំឡុងពេលដ៏លំបាកទាំងនេះ ។ នៅពេលចុងបញ្ចប់នៃការរត់ចម្ងាយ ១០ គីឡូម៉ែត្រ ក្រុមហ៊ុន Smart ក៏បានប្រកាសឲ្យដឹងថា ក្រុមហ៊ុននឹងពង្រីកការគាំទ្រដល់សេវាថែទាំសុខភាពកុមារឥតគិតថ្លៃ តាមរយៈការរៀបចំការប្រគំតន្ត្រីសប្បុរសធម៌ និងបរិច្ចាគថវិការបស់ក្រុមហ៊ុនឲ្យគ្រប់ចំនួន១០ម៉ឺនដុល្លារ ។ ការប្រគុំតន្រ្តី Smile Charity Concert នឹងធ្វើការផ្សាយផ្ទាល់តាមអនឡាញ នឹងមានការសម្ដែងពីតារាល្បីៗក្នុងព្រះរាជាណាចក្រកម្ពុជាជាច្រើនរូបផងដែរ ។ ថវិកាទាំងអស់នឹងត្រូវបានបរិច្ចាគដល់មន្ទីរពេទ្យគន្ធបុប្ផា និងមន្ទីរពេទ្យកុមារអង្គរ ដែលជាមន្ទីរពេទ្យកុមារឈានមុខគេខាងផ្នែកផ្តល់សេវាថែទាំសុខភាពឥតគិតថ្លៃដល់កុមារកម្ពុជារាប់លាននាក់ ។
លោក Feiruz បន្ថែមទៀតថា ការធានាឲ្យបានថាពលរដ្ឋកម្ពុជា ជាពិសេសកុមារ ទទួលបានការថែទាំសុខភាពប្រកប ដោយគុណភាព គឺជាផ្នែកមួយដ៏សំខាន់ នៃការប្ដេជ្ញាចិត្តរបស់ក្រុមហ៊ុន Smart ក្នុងការគាំទ្រដល់ការអភិវឌ្ឍជាតិក្នុងរាល់មធ្យោបាយដែលអាចធ្វើទៅបាន ។
សូមជម្រាបថា នាពេលថ្មីៗនេះ ក្រុមហ៊ុន Smart បានផ្ដើមយុទ្ធនាការ «ឆ្ពោះទៅមុខរួមគ្នា» ដែលមានគោលបំណងលើកស្ទួយសាមគ្គីភាពរវាងប្រជាពលរដ្ឋកម្ពុជាទាំងអស់នៅទូទាំងប្រទេស ។ យុទ្ធនាការនេះក៏មានវីដេអូដ៏គួរឲ្យរំជួលចិត្តមួយក៏នឹងមានបទចម្រៀងមួយផងដែរ ដែលត្រូវបានបង្កើតឡើងយ៉ាងពិសេស ដោយមានការចូលរួមរបស់អ្នកចំរៀងលើ Pleng by Smart App សកម្មភាពទំនួលខុសត្រូវសង្គមផ្សេងៗទៀត និងយុទ្ធនាការពលរដ្ឋគំរូ ដែលផ្តោតលើការស្វែងរកប្រជាពលរដ្ឋកម្ពុជាដែលបានធ្វើការផ្លាស់ប្ដូរជាវិជ្ជមានក្នុងសហគមន៍របស់ពួកគាត់ ៕
