លោក ចូ បៃដិន ប្រកាសដាក់ទណ្ឌកម្មប្រឆាំងមេដឹកនាំយោធាមីយ៉ាន់ម៉ា និងជំរុញអោយពួកគេប្រគល់អំណាចអោយរដ្ឋាភិបាលស៊ីវិលវិញ
អាមេរិក៖ ប្រធានាធិបតីអាមេរិក លោក ចូ បៃដិន បានប្រកាសថា ប្រទេសរបស់លោកនឹងចាត់វិធានការប្រឆាំងរបបយោធាមីយ៉ាន់ម៉ា ក្នុងនោះរួមមានទាំងការបង្កកទ្រព្យសម្បត្តិទាំងអស់របស់ពួកគេក្នុងសហរដ្ឋអាមេរិក ហើយលោកថែមទាំងជំរុញយោធាប្រគល់អំណាចឱ្យរដ្ឋាភិបាលស៊ីវិលរបស់លោកស្រី អោង សាន ស៊ូជី វិញផងដែរ ។
ប្រធានាធិបតីអាមេរិករូបនេះបានថ្លែងថា ជាថ្មីម្ដងទៀត ខ្ញុំអំពាវនាវឱ្យយោធាមីយ៉ាន់ម៉ាដោះលែងថ្នាក់ដឹកនាំនយោបាយ និងសកម្មជនប្រជាធិបតេយ្យ ដែលកំពុងជាប់ឃុំ ក្នុងនោះរួមមានលោកស្រី ស៊ូជី និងលោកប្រធានាធិបតី វីន ម្យីន ជាបន្ទាន់ ហើយយោធាមីយ៉ាន់ម៉ាក៏ត្រូវតែប្រគល់អំណាចឱ្យរដ្ឋាភិបាលស៊ីវិលវិញផងដែរ ។
ជាមួយគ្នានេះ លោក ចូ បៃដិន បានសង្កត់ធ្ងន់ទៀតថា រដ្ឋបាលរបស់លោកបាន និងកំពុងកាត់ផ្ដាច់ក្រុមមេដឹកនាំយោធាមីយ៉ាន់ម៉ា មិនឱ្យដក ឬចូលទៅកាន់មូលនិធិប្រមាណ១ពាន់លានដុល្លារ ដែលកំពុងតម្កល់ទុកនៅក្នុងសហរដ្ឋអាមេរិក ហើយទណ្ឌកម្មថ្មីៗបន្ថែមទៀត នឹងត្រូវប្រកាសក្នុងពេលឆាប់ៗនេះ ៕ ប្រភព៖ Reuters
