កំពត៖ ដោយអនុវត្តតាមការណែនាំក៏ដូចជាបទបញ្ជារបស់ប្រមុខរាជរដ្ឋាភិបាល រដ្ឋបាលខេត្តកំពតបានរៀប​ចំអគារបីក​ន្លែងបន្ថែម​​ទៀត​សម្រាប់ត្រៀមទុកធ្វើចត្តាឡីស័ក ប្រជាពលរដ្ឋដែលវិលត្រឡប់មកពីធ្វើការនៅក្រៅប្រទេស។ នៅព្រឹកថ្ងៃ​ទី២២ ខែកុម្ភៈ ឆ្នាំ២០២១ ឯកឧត្តមជាវ តាយអភិបាលខេត្តកំពត ព្រមទាំងថ្នាក់ដឹកនាំខេត្ត និងមន្ទីរអង្គភាព​អាជ្ញាធរ​មូលដ្ឋាន​ពាក់ព័ន្ធបាន​ចុះពិនិត្យទីតាំង អគារមួយចំនួនដែលរដ្ឋបាលខេត្តកំពត បានត្រៀមសម្រាប់ធ្វើចត្តាឡីស័ក ក្នុងករណី​ដែលមានប្រជាពលរដ្ឋវិលត្រឡប់មកពីធ្វើការក្រៅប្រទេស។ ពិសេសពលករវិលត្រឡប់ពីធ្វើការ​នៅប្រទេស​ថៃដែលអាច​​មាន​ចំនួនច្រើន នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ។

ទីកន្លែងថ្មីបន្ថែមសម្រាប់ធ្វើចតាឡីស័ក ចំនួន៣កន្លែងនោះមាន ទី១នៅអគារចាស់មន្ទីរសង្គមកិច្ច អតីតយុទ្ធជន និងយុវនីតិ​សម្បទាខេត្ត នៅក្នុងភូមិសុវណ្ណសាគរ សង្កាត់កំពង់កណ្ដាល ក្រុងកំពត, ទី២នៅសហគមន៍អ្នកផលិតអំបិលខេត្តកំពត និងទី៣ នៅមជ្ឈមណ្ឌលអភិវឌ្ឍស្ត្រីខេត្ត ដែលទីតាំងទាំងពីរនេះស្ថិតនៅក្នុងភូមិជុំគ្រៀលឃុំជុំគ្រៀល ស្រុកទឹកឈូខេត្តកំពត ដែលមានបន្ទប់ប្រមាណពី ៧០ ទៅ៨០បន្ទប់ ខណៈកន្លងមករដ្ឋបាលខេត្តបានត្រៀមបន្ទប់នៅតាមមន្ទីរពេទ្យបង្អែកចំនួន៥ ដែលមានបន្ទប់សរុបប្រមាណ ១៧០បន្ទប់នោះ។

ឯកឧត្តមជាវ តាយអភិបាលខេត្តបានលើកបញ្ជាក់ថា បញ្ហាការឆ្លងរាតត្បាតដោយជំងឺកូវីដ១៩ នៅតែជាបញ្ហាសកល ដែលពិភពលោក​កំពុងបន្តរួមគ្នាប្រយុទ្ធប្រឆាំងជារៀងរាល់ថ្ងៃ។ ដោយឡែកកម្ពុជា សម្ដេចតេជោ ហ៊ុន សែន ប្រមុខរាជរដ្ឋា​ភិបាល តែងតែយកចិត្តទុកដាក់យ៉ាងខ្លាំង ក្នុងការគ្រប់គ្រងស្ថានការ មិនឲ្យមានការឆ្លងរីករាល​ដាលនៅក្នុងសហគមន៍ទេ។ យ៉ាងណាមិញរដ្ឋបាលខេត្តកំពត តែងតែបានចូលរួមអនុវត្តដោយយកចិត្តទុកដាក់ខ្ពស់ អំពីបញ្ហាបង្ការទប់ស្កាត់ ចំពោះ​ជំងឺឆ្លងកូវីដ១៩នេះជាប្រចាំផងដែរ។ ជាក់ស្តែងការជ្រើសរើសទីតាំងថ្មីបន្ថែមសម្រាប់ការធ្វើ ចតាឡីស័ក នាពេលនេះ គឺជាការអនុវត្ត​ស្របទៅតាមអនុសាសន៍ណែនាំរបស់ប្រមុខរាជរដ្ឋាភិបាល ដើម្បីធានាដល់ដំណើរការធ្វើចត្តាឡីស័ក ក្នុងករណីដែល​មាន​ប្រជាពលរដ្ឋក្នុងខេត្ត បានវិលត្រឡប់ពីក្រៅប្រទេស ពិសេសពលករមកពីប្រទេសថៃ​ដែលអាចនឹងមានចំនួនច្រើន ក្នុងឱកាសបុណ្យឆ្នាំថ្មីប្រពៃណីជាតិខ្មែរនាពេលខាងមុននេះ។

ឯកឧត្តម អភិបាលខេត្ត ក៏បានសំណូមពរនិងណែនាំដល់មន្ទីរអង្គភាពជំនាញ និងអាជ្ញាធរមូលដ្ឋាន ត្រូវរួមសហការ​គ្នាឲ្យបានល្អក្នុង​ការ​រៀបចំទីតាំងអាគារថ្មីបន្ថែមនេះ ឲ្យបានសមរម្យមានទាំងទឹក ភ្លើង និងបន្ទប់សម្រាកស្អាត ប្រកបដោយ​អនាម័យ និងបរិស្ថានល្អ៕ Sila Sarin