ការប្រកួតវាយកូនបាល់ SEARA JUNIOR រៀបចំឡើងដើម្បីអភិវឌ្ឍយុវជនវ័យក្មេង
សហព័ន្ធកីឡាវាយកូនបាល់កម្ពុជា កំពុងដាក់ទិសដៅយ៉ាងជាក់លាក់ បណ្តុះយុវជនជំនាន់ ក្រោយរបស់កម្ពុជា ឲ្យក្លាយជាអត្តពលិកវាយកូនបាល់ឆ្នើមបង្ហាញសក្តានុពល នៅលើឆាកអន្តរជាតិ ក្រោយស៊ីហ្គេម ឆ្នាំ២០២៣ ខណៈការត្រៀមស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ សហព័ន្ធបានត្រៀមបំរ៉ុងកីឡាករ កីឡាការិនី រួចហើយ ។
លោក ប្រាយអន អានីរ៉ូស ប្រធានគណៈកម្មាការគ្រប់គ្រងការប្រកួត បានបញ្ជាក់ថា ការប្រកួតពាន SEARA JUNIOR នេះ មានយុវជន២០នាក់ចូលរួម ដោយចែកចេញជា៤ប្រភេទ គឺយុវជនអាយុក្រោម១៨ឆ្នាំ អាយុក្រោម១៤ឆ្នាំ កុមារាក្រោមអាយុ១២ឆ្នាំ និងកុមារាអាយុក្រោម១០ឆ្នាំ មកពីរាជធានីភ្នំពេញ ខេត្តកែប និង ខេត្តសៀមរាប ។
ប្រធានគណៈកម្មាការគ្រប់គ្រងការប្រកួតខាងលើ បញ្ជាក់ទៀតថា ព្រឹត្តិការណ៍ប្រកួតវាយកូនបាល់ SEARA JUNIOR ឆ្នាំ២០២១នេះ សហព័ន្ធចាប់ដៃជាមួយក្រុមហ៊ុនលក់សម្ភារៈហាត់ប្រាណ SEARA បង្កើតពាននេះ ក្នុងគោលបំណងផ្តល់ឱកាសឲ្យយុវជនវ័យក្មេង នៅរាជធានីភ្នំពេញ និងតាមបណ្តាខេត្ត បានប្រកួតប្រជែងបង្កើនបច្ចេកទេស និងចែករំលែកបទពិសោធន៍ពីគ្នា ដើម្បីអភិវឌ្ឍសមត្ថភាពអោយក្លាយជាកីឡាករមានសក្តានុពលសម្រាប់កម្ពុជា ក្រោយស៊ីហ្គេម ឆ្នាំ២០២៣ ។ លោក បញ្ជាក់ទៀតថា តាមរយៈការរៀបចំរយៈពេល២ឆ្នាំកន្លងមក សង្កេតឃើញថា យុវជនកីឡាវាយកូនបាល់ ដែលសហព័ន្ធផ្តល់ឱកាសឲ្យចូលរួមប្រកួតប្រជែង គឺមានការអភិវឌ្ឍរីកចំរើនសមត្ថភាពល្អគួកត់សម្គាល់ ។
សូមបញ្ជាក់ថា ការប្រកួតកីឡាវាយកូនបាល់ពានរង្វាន់ SEARA ឆ្នាំ២០២១ ដែលសហព័ន្ធបង្កើតនេះ មាន២ពាន ក្នុងមួយខែ គឺ SEARA JUNIOR និង SEARA ឈុតធំ ៕