សហព័ន្ធកីឡាទូកក្តោងកម្ពុជា ប្តេជ្ញាបង្កើនសក្តានុពល ដើម្បីប្រជែងមេដាយ នៅស៊ីហ្គេម ឆ្នាំ២០២៣ ក្នុងអាណត្តិទី២
សម្រាប់អាណត្តិទី២ ឆ្នាំ២០១៩-២០២៣ សហព័ន្ធកីឡាទូកក្តោងកម្ពុជា ប្តេជ្ញាបង្កើនសក្តានុពល ដើម្បីឈានទៅសម្រេចជោគជ័យ តាមផែនការរាជរដ្ឋាភិបាល ដណ្តើមមេដាយជូនកម្ពុជា នាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ។ នេះបើយោងតាម ការលើកឡើងរបស់អគ្គលេខាធិការ សហព័ន្ធកីឡាទូកក្តោងកម្ពុជា លោក សោម សុទ្ធរិទ្ធិពង្ស ក្នុងមហាសន្និបាតបញ្ចប់អាណត្តិទី១ បន្តអាណត្តិទី២ ឆ្នាំ២០១៩-២០២៣ នៅអាគារគណៈកម្មាធិការជាតិអូឡាំពិកកម្ពុជា។
អគ្គលេខាធិការខាងលើ អះអាងថា អាណត្តិថ្មីនេះ សហព័ន្ធដាក់ទិសដៅត្រូវបង្កើនការហ្វឹកហាត់ និងបណ្ដុះបណ្ដាលប្រចាំឆ្នាំ ពិសេសរកដៃគូឧបត្ថម្ភ ដើម្បីបង្កើនចំនួនការប្រកួតក្នុងស្រុក ស្វែងរកកីឡាករ កីឡាការិនី ដែលមានសមត្ថភាព ត្រៀមសម្រាប់ហ្វឹកហាត់ជាមួយក្រុមជម្រើសជាតិក្នុងប្រទេស និងបញ្ជូនទៅហ្វឹកហាត់នៅក្រៅប្រទេសផងដេរ ។ លោក សោម សុទ្ធរិទ្ធិពង្ស បន្តថា ក្រៅពីផែនការខាងលើ សហព័ន្ធក៏បង្កើនឲ្យមានក្លិបសមាគមបន្ថែម តាមក្រសួង ស្ថាប័ន និងរាជធានី ខេត្ត ព្រមទាំងរៀបចំវគ្គបណ្ដុះបណ្ដាលជូនដល់មន្ត្រីបច្ចេកទេស គ្រូបង្វឹក និងកីឡាករបន្ថែម ដើម្បីមានធនធានគ្រប់គ្រាន់ ក្នុងការទទួលធ្វើជាម្ចាស់ផ្ទះ នាឆ្នាំ២០២៣ និងដណ្តើមមេដាយជូនកម្ពុជា ។
សូមបញ្ជាក់ថា អាណត្តិទី២ រយៈពេល៥ឆ្នាំ (២០១៩-២០២៣) សហព័ន្ធកីឡាទូកក្តោងកម្ពុជា មានសមាសភាពគណៈកម្មាធិការប្រតិបត្តិសហព័ន្ធចំនួន០៩រូប ដែលមាន ៖ ១- ឯ ឧ ថាង ហ្គោដិន ជាប្រធាន ២-ឯ ឧ ថោង រដ្ឋសក្តិ អនុប្រធាន ៣-ឯ ឧ វ៉ាត់ ចំរើន អនុប្រធាន ៤- លោក សោម សុទ្ធរិទ្ធិពង្ស អគ្គលេខាធិការ ៥-កញ្ញា ងួន តរុណី អគ្គហេរញ្ញិក និងសមាជិកប្រតិបត្តិ៤រូបទៀត ។
គួររំលឹកថា ចាប់តាំងពីបង្កើតមក សហព័ន្ធបានរៀបចំការប្រកួត លើកទី១ នៅឆ្នាំ២០១៧ នាខេត្តកែប រៀបចំការប្រកួតកីឡាទូកក្តោងជ្រើសរើសជើងឯកថ្នាក់ជាតិ ឆ្នាំ២០១៨ នៅខេត្តកោះកុង ដើម្បីពង្រឹងលក្ខណៈបច្ចេកទេស និងផ្តោតលើការការពារថែរក្សាបរិស្ថាន នៅឆ្នាំ១០១៩ ។ រីឯសកម្មភាពប្រកួតអន្តរជាតិ សហព័ន្ធកីឡាទូកក្តោងកម្ពុជា បានបញ្ជូនកីឡាករចេញទៅចូលរួមការប្រកួតជាលក្ខណៈអន្តរជាតិ ជាលើដំបូង នៅឆ្នាំ២០១៧ និងក្នុងឆ្នាំ២០១៩ ចំនួន២១លើក ជាលទ្ធផលយើងទទួលបានមេដាយសរុប ចំនួន១១ គ្រឿង ក្នុងនោះ មេដាយមាស ០១គ្រឿង មេដាយប្រាក់ ០១គ្រឿង និងមេដាយសំរឹទ្ធិ០៩គ្រឿង ៕
