សមាគមហ្វារពន្លឺសិល្បៈ នឹងធ្វើការបំបែកកំណត់ត្រាពិភពលោក ដោយសម្តែងសៀក ដែលមានរយៈពេលវែងជាងគេបំផុតនៅបាត់ដំបង
ដោយ៖ម៉ាដេប៉ូ
ភ្នំពេញ៖សមាគមសិល្បះខ្មែរមួយដែលមានឈ្មោះថាហ្វារពន្លឺសិល្បៈបានប្រកាសនឹងធ្វើការបំបែកកំណត់ត្រាពិភពលោក ដោយសម្តែងសៀក ដែលមានរយៈពេលវែងជាងគេបំផុតនៅខេត្តបាត់ដំបងនាថ្ងៃអាទិត្យស្អែកនេះ។
គួរបញ្ជាក់ថា ហ្វារពន្លឺសិល្បៈជាសមាគមមិនរកប្រាក់ចំណេញ មានទីតាំងនៅខេត្តបាត់ដំបង ជាស្ថាប័នដែលបានបង្កើតសិល្បៈសៀកដ៏ល្បីល្បាញលំដាប់ថ្នាក់ពិភពលោក។
សមាគមនេះបានបញ្ជាក់ថា” យើងនឹងប្តេជ្ញា សម្រេចនូវបេសកម្មដ៏អស្ចារ្យមួយក្នុងឆ្នាំនេះ នាថ្ងៃអាទិត្យ ទី០៧ មីនា ម៉ោង៨:០០នាទីព្រឹក។ សិល្បៈករ សៀកយើង នឹងធ្វើការសម្តែងនៅលើឆាករយៈពេល ២៤ម៉ោង និង១នាទី ដើម្បីបំបែកកំណត់ត្រាឯតទគ្គកម្មពិភពលោក ទី១០ ជូនដល់ប្រទេសកម្ពុជា លើផ្នែកសម្តែងសៀក ដែលមានរយៈពេលវែងជាងគេ។ ប្រជាជនកម្ពុជា អាចជួយគាំទ្រហ្វារបាន ដោយចូលរួមទស្សនាតាមប្រព័ន្ធអ៊ីនធឺណេត ឬអាចអញ្ជើញមកចូលរួមទស្សនាដោយផ្ទាល់បាន ក្នុងតង់សម្តែងរបស់យើងនៅខេត្តបាត់ដំបង”។
ការបំបែកកំណត់ត្រាឯតទគ្គកម្មពិភពលោកនេះ រៀបចំឡើងដោយកិច្ចសហការជាមួយ ក្រុមហ៊ុនសែលកាត ដើម្បីឱ្យអ្នកគ្រប់គ្នា ដឹងអំពីវិបត្តថវិកា ដែលហ្វារកំពុងជួបប្រទះ។
លោក អៀន វ៉ាតសុន (Ian Watson) នាយកប្រតិបត្តិក្រុមហ៊ុនសែលកាត បានឱ្យដឹង ថា ក្រុមការងាររបស់លោក បានប្តេជ្ញាចិត្ត ដើម្បីបង្កើនទេពកោសល្យខ្មែរវ័យក្មេង និងផ្តល់នូវវេទិកាសម្រាប់យុវជនដើម្បីសម្រេចបាននូវមហិច្ឆតារបស់ពួកគេ។ ការសម្ដែងសៀករយៈពេលវែងជាងគេបំផុតនេះ ជាការផ្តួតផ្តើមថ្មីរបស់យើង ហើយក៏ត្រូវបានទទួលស្គាល់ជាផ្លូវការដោយហ្គីនណេសដែរ។ជាមួយគ្នានេះសុំឱ្យប្រជាជនកម្ពុជាទាំងអស់ ដែលអាចមកទស្សនាការសម្តែងសៀក នៅបាត់ដំបងនាថ្ងៃអាទិត្យខាងមុខនេះ ដើម្បីក្លាយជាទស្សនិកជនគាំទ្រដល់សិល្បករយ៉ាងកុះករ ។
សហគមនេះបានលើកឡើងដែរថា”យើងនឹងធ្វើការអនុវត្ត វិធានការពារការរាតត្បាតជំងឺកូវីដ១៩ យ៉ាងម៉ឹងម៉ាត់ ដោយតម្រូវអ្នកចូលរួមពាក់ម៉ាស និងរក្សាគម្លាតឱ្យបានត្រឹមត្រូវ។ ការបំបែកកំណត់ត្រាពិភពលោកនេះ តម្រូវឱ្យមានអ្នកទស្សនា យ៉ាងតិច៥០នាក់។ ហេតុនេះហើយអ្នកទស្សនាទាំងអស់ នឹងក្លាយទៅជាចំណែកមួយ នៃការបំបែកកំណត់ត្រាពិភពលោកហើយនឹងទទួលបានប័ណ្ណសរសើរពីយើងផងដែរ”។
សម្រាប់អ្នកដែលមិនអាចមកទស្សនាការសម្ដែងផ្ទាល់នៅខេត្តបាត់ដំបងបាន អ្នកក៏អាចចូលរួមទស្សនា តាមរយៈប្រព័ន្ធអ៊ីនធឺណេតបានដែរ។ អ្នកអាចទស្សនា ២៤ម៉ោងបានដូចគ្នា នៅលើគណនី YouTube ឬអ្នកអាចចុះឈ្មោះចូលរួម កម្មវិធីគៀងគរថវិការយៈពេល១ម៉ោងដែលមានតំណនៅទីនេះ។
កម្មវិធីរៃអង្គាសថវិកា នឹងប្រព្រឹត្តឡើងនៅថ្ងៃអាទិត្យ ទី០៧ មីនា នាម៉ោង១០ព្រឹក នឹងម៉ោង ៨យប់ ម៉ោងក្នុងប្រទេសកម្ពុជា។ ខាងក្រោមនេះ ជាបីជំហានងាយៗដែលអ្នកគេអាចចូលរួមបានដូចជា៖
ជំហានទី១៖ ចូលរួមចុះឈ្មោះនៅទីនេះ៖ www.bit.ly/pharegala21។ជំហានទី២៖ ចូលរួមជាមួយយើងនៅថ្ងៃទី០៧ មីនា តាមប្រព័ន្ធអ៊ីនធឺណេត។ជំហានទី៣៖ អ្នកនឹងទទួលបានភាពរីករាយកំសាន្ដ ជាមួយការសម្តែងសៀក បំបែកកំណត់ត្រាឯតទគ្គកម្មពិភពលោក និងការចូលរួមរៃអង្គាសគៀងគរថវិកាសម្រាប់សមាគមហ្វារ។
គួរបញ្ជាក់ថាប្រសិនជាសមាគមហ្វារទទួលបានជោគជ័យ ប្រទេសកម្ពុជាក៏នឹងទទួលបានកំណត់ត្រាពិភពលោកទី១០ ហើយជាកំណត់ត្រាថ្មីមួយទៀតរបស់កម្ពុជា។ ក្នុងរយៈពេលបីឆ្នាំកន្លងទៅ កំណត់ត្រាដែលកម្ពុជាទទួលបានរួមមាន ការត្បាញក្រម៉ាវែងបំផុត នំអន្សមធំបំផុត ស្តេចដែលមានតួនាទីច្រើនបំផុត អក្ខរក្រមវែងជាងគេបំផុតនៅលើពិភពលោក និងមួយទៀតដែលសំខាន់ជាងគេនោះ គឺជាសំណង់សាសនាធំជាងគេនៅប្រាសាទអង្គរវត្ត។ ហ្គីណេស បានកំណត់គោលការណ៍ណែនាំច្បាស់លាស់សម្រាប់ការបំបែកកំណត់ត្រារួមមាន៖១) ការសម្តែងត្រូវតែមានរយៈពេល ២៤ ម៉ោង និង១នាទី
២) អ្នកសម្ដែងទាំងអស់ត្រូវតែមានស្តង់ដាវិជ្ជាជីវៈ និងត្រូវតែទទួលបានប្រាក់បៀរវត្តិ៍
៣) ការសម្តែងត្រូវតែផ្លាស់ប្តូរ និងមិនធ្វើម្តងទៀតដដែលៗ
៤) សាក្សីឯករាជ្យ ត្រូវតែមានវត្តមានក្នុងកម្មវិធីទាំងមូល និង
៥) ត្រូវមានទស្សនិកជនយ៉ាងហោចណាស់ចំនួន ៥០ នាក់ គ្រប់ពេលវេលា៕
