សហរដ្ឋអាមេរិកចោទប្រកាន់សារព័ត៌មានអនឡាញរុស្ស៊ីថា កំពុងបញ្ចេញព័ត៌មានមិនពិតពាក់ព័ន្ធនឹងវ៉ាក់សាំង Covid-19 របស់ Pfizer និង Moderna
អាមេរិក៖ អ្នកនាំពាក្យក្រសួងការបរទេសអាមេរិកនិយាយថា ប្រទេសរបស់ខ្លួនបានចោទប្រកាន់ថា សារព័ត៌មានអនឡាញចំនួនដែលស្ថិតនៅក្រោមការគ្រប់គ្រងដោយទីភ្នាក់ងារស៊ើបការសម្ងាត់រុស្ស៊ី កំពុងព្យាយាមបំផ្លាញវ៉ាក់សាំង COVID-19 ផលិតឡើងដោយក្រុមហ៊ុន ភីហ្វីហ្សឺ (Pfizer) និងក្រុមហ៊ុន ម៉ូឌែណា (Moderna) តាមរយៈការផ្សព្វផ្សាយព័ត៌មានមិនពិត ។
ការចោទប្រកាន់ខាងលើនេះ ត្រូវបានរាយការណ៍មុនគេដោយកាសែត Wall Street Journal ប៉ុន្តែអ្នកនាំពាក្យវិមានក្រឹមឡាំងបានច្រានចោលការចុះផ្សាយរបស់កាសែតអាមេរិកមួយនេះ ស្របពេលដែលស្ថានទូតរុស្ស៊ីប្រចាំទីក្រុងវ៉ាស៊ីនតោននៅពុំទាន់ធ្វើការឆ្លើយតបណាមួយនៅឡើយនោះទេ ។
ទោះជាយ៉ាងណា អ្នកនាំពាក្យក្រសួងការបរទេសអាមេរិកនោះ សារព័ត៌មានអនឡាញចំនួនដែលស្ថិតនៅក្រោមការគ្រប់គ្រង ដោយទីភ្នាក់ងារស៊ើបការសម្ងាត់រុស្ស៊ី បានផ្សព្វផ្សាយព័ត៌មានមិនពិតជាច្រើនទម្រង់ ក្នុងនោះរួមមានទាំងព័ត៌មានមិនពិតអំពីវ៉ាក់សាំងរបស់ក្រុមហ៊ុន ភីហ្វីហ្សឺ (Pfizer) និងក្រុមហ៊ុន ម៉ូឌែណា (Moderna) ជម្លោះយោធា និង បាតុកម្មតវ៉ា ព្រមទាំងព័ត៌មានមិនពិតជាច្រើនទៀតអោយតែពួកគេអាចធ្វើបាន ៕ ប្រភព៖ Reuters