សហរដ្ឋអាមេរិកដាក់ទណ្ឌកម្មកូនរបស់មេដឹកនាំយោធាមីយ៉ាន់ម៉ា ព្រមទាំងក្រុមហ៊ុនចំនួន០៦ដែលពួកគេ
អាមេរិក៖ សហរដ្ឋអាមេរិកនៅថ្ងៃពុធនេះបានដាក់ទណ្ឌកម្មកូនៗពីរនាក់របស់មេដឹកនាំយោធាមីយ៉ាន់ម៉ាលោក មីន អោង ហ្លេង និងក្រុមហ៊ុនចំនួន០៦ដែលពួកគេគ្រប់គ្រង ដើម្បីជាឆ្លើយតបទៅនឹងការធ្វើរដ្ឋប្រហារកាលពីថ្ងៃទី១ ខែកុម្ភៈ និងការបាញ់សម្លាប់ក្រុមអ្នកប្រឆាំងតវ៉ា ចាប់តាំងពីរបបសឹកឡើងក្តោបក្តាប់អំណាច ។
ក្រសួងការបរទេសអាមេរិកបានបញ្ជាក់នៅក្នុងសេចក្តីថ្លែងការណ៍មួយថា ខ្លួនបានដាក់បញ្ចូលបញ្ជីខ្មៅនូវឈ្មោះ អោង ផ្យេ សូណេ (Aung Pyae Sone) និង ឃីន ធីរី ថេត មុន (Khin Thiri Thet Mon) ដែលជាកូនៗមានវ័យជំទង់របស់មេបញ្ជាការយោធាមីយ៉ាន់ម៉ា ដែលជាអ្នកដឹកនាំធ្វើរដ្ឋប្រហារ ហើយបានតំឡើងតំណែងខ្លួនឯងជាប្រមុខក្រុមប្រឹក្សារដ្ឋបាលរដ្ឋដែលកំពុងកាន់អំណាច ។
បន្ថែមលើនេះ រដ្ឋមន្រ្តីការបរទេសអាមេរិកលោក អាន់តូនី ប្លីនខិន ក៏បានព្រមានដែរថា សកម្មភាពដាក់ទណ្ឌកម្មបន្ថែមទៀត អាចនឹងធ្វើឡើង ក៏ដូចជាថ្កោលទោសការចាប់ឃុំខ្លួនមនុស្សជាង១ពាន់៧រយនាក់ និងការវាយប្រហារដោយកងកម្លាំងសន្តិសុខមីយ៉ាន់ម៉ាប្រឆាំងនឹងក្រុមបាតុករដែលគ្មានអាវុធ ដោយលោកបាននិយាយថា បានសម្លាប់មនុស្សយ៉ាងហោចណាស់៥៣នាក់ ៕ ប្រភព៖ Reuters
