អង្គការសហប្រជាជាតិអំពាវនាវអោយបញ្ឈប់រដ្ឋប្រហារនៅមីយ៉ាន់ម៉ា និងថ្កោលទោសការប្រើហិង្សាលើក្រុមអ្នកប្រឆាំងតវ៉ា
បរទេស៖ ក្រុមប្រឹក្សាសន្តិសុខអង្គការសហប្រជាជាតិ (UNSC) នៅថ្ងៃពុធនេះអំពាវនាវជាឯកច្ឆន្ទឱ្យបញ្ចប់រដ្ឋប្រហារយោធានៅមីយ៉ាន់ម៉ា ដោយបានថ្កោលទោសយ៉ាងខ្លាំងចំពោះការប្រើហិង្សាប្រឆាំងនឹងក្រុមអ្នកតវ៉ាដោយសន្តិវិធី ក៏ដូចជាទទូចអោយមានការអត់ធ្មត់បំផុតពីសំណាក់យោធា ។
សេចក្តីថ្លែងការណ៍របស់ប្រធានក្រុមប្រឹក្សាសន្តិសុខអង្គការសហប្រជាជាតិ ដែលអនុម័តដោយសមាជិកក្រុមប្រឹក្សាទាំង១៥ រួមទាំងចិនផងនោះ ត្រូវបានអនុម័តជាផ្លូវការនៅឯកិច្ចប្រជុំខ្លីមួយតាមវីដេអូ ជាទីដែលអគ្គរដ្ឋទូតអាមេរិកលោកស្រី លីនដា ថូម៉ាស គ្រីនហ្វៀល (Linda Thomas-Greenfield) ដែលជាប្រធានក្រុមប្រឹក្សាបច្ចុប្បន្នបានប្រកាសថា សេចក្តីថ្លែងការណ៍ត្រូវបានយល់ព្រម ។ សេចក្តីថ្លែងការណ៍ដែលព្រាងដោយចក្រភពអង់គ្លេស គឺអំពាវនាវឱ្យមានការដោះលែងមេដឹកនាំរដ្ឋាភិបាលជាបន្ទាន់ រួមមានទីប្រឹក្សារដ្ឋលោកស្រី អោង សាន ស៊ូជី និងលោកប្រធានាធិបតី វីន ម្យីនត៍ ដែលត្រូវបានឃុំខ្លួនចាប់តាំងពីពួកគេត្រូវបានទម្លាក់ចេញពីអំណាចនៅក្នុងរដ្ឋប្រហារយោធាកាលពីថ្ងៃទី១ ខែកុម្ភៈកន្លងទៅ ។
សេចក្តីថ្លែងការណ៍នេះទៀតសោត បានគាំទ្រអន្តរកាលប្រជាធិបតេយ្យរបស់ប្រទេសមីយ៉ាន់ម៉ា និងសង្កត់ធ្ងន់លើតម្រូវការដើម្បីរក្សាទុកនូវស្ថាប័ន និងដំណើរការប្រជាធិបតេយ្យនានា បញ្ចៀសអំពើហិង្សា គោរពសិទ្ធិមនុស្ស និងសេរីភាពជាមូលដ្ឋាន និង គោរពនីតិរដ្ឋ ៕ ប្រភព៖ CNA
