កូវីដ១៩៖ AstraZeneca បន្ថយការផ្គត់ផ្គង់វ៉ាក់សាំងទៅអឺរ៉ុបជិត១០លានដូស ក្រោយមានអ្នកចាក់រួច កកសសៃឈាម
ក្រុមហ៊ុន AstraZeneca បានសម្រេចកាត់បន្ថយការផ្គត់ផ្គង់វ៉ាក់សាំងបង្ការជំងឺកូវីដ១៩ ក្នុងត្រីមាសទី១ មកនៅត្រឹម៣០លានដូសវិញ នេះបើតាមរបាយការណ៍ចេញផ្សាយដោយសារព័ត៌មានរយធឺ ចេញផ្សាយដោយសារទីភ្នាក់ងារសារព័ត៌មាន CNA នាថ្ងៃទី១២ មីនា ២០២១។
បើតាមឯកសារ ដែលផ្តល់ជូនមន្ត្រីអឺរ៉ុប ចុះថ្ងៃទី១០ មីនា បង្ហាញថា ក្រុមហ៊ុនពេលនេះរំពឹងថា អាចចែកចាយត្រឹម៣០លាន១សែនដូស ត្រឹមចុងខែមីនា និង ២០លានដូសទៀត នៅក្នុងខែមេសា។ ដោយគេដឹងថា កាលពីខែកុម្ភៈ ក្រុមហ៊ុនធ្លាប់បានប្រាប់ទៅសភាអឺរ៉ុបថា នឹងព្យាយាមផ្គត់ផ្គង់វ៉ាក់សាំង៤០លានដូស នៅត្រឹមចុងខែមីនានេះ មុនពេលប្តូរចិត្តពេលនេះវិញធ្លាក់ចុះ២០ភាគរយ ហើយអឺរ៉ុបចុះកិច្ចព្រមព្រៀងទទួលការផ្គត់ផ្គង់ពីក្រុមហ៊ុននេះ ប្រមាណ៩០លានដូស។
យ៉ាងណាក៏ដោយ នៅថ្ងៃទី១២ មីនានេះ ក្រុមហ៊ុនអង់គ្លេសមួយនេះមិនបានប្រាប់ទីភ្នាក់ងារសារព័ត៌មានរយធឺអ្វីបន្ថែមនៅពីក្រោយការបន្ថយនេះទេ។ ប៉ុន្តែថ្មីៗនេះ គាប់ជួនមានបណ្តាប្រទេសមួយចំនួននៅអឺរ៉ុប រួមទាំងថៃផង បានសម្រេចផ្អាកការចាក់វ៉ាក់សាំង AstraZeneca ភ្លាមៗ ក្រោយពេលមានអ្នកចាក់រួចហើយមានបញ្ហាកកសរសៃឈាម នៅអឺរ៉ុប៕
