បើតាមប្រភពរបស់សារព័ត៌មានអេស្ប៉ាញដែលបានចុះផ្សាយនៅថ្ងៃនេះ បានអះអាងថាខ្សែប្រយុទ្ធ Cristiano Ronaldo នឹងចាកចេញពី Juventus ភ្លាមតែម្ដង ប្រសិនបើទទួលការហៅពីក្លឹប Real Madrid ។បន្ទាប់ពីបរាជ័យនៅ Champions League ហើយក្នុងលីគកាន់តែឆ្ងាយពីក្រុមកំពូលតារាង Inter Milan ទៀតនោះ ស្រាប់តែមានដំណឹងថាក្លឹប Juventus ទំនងជាចង់បញ្ចេញ Ronaldo ខណៈវត្តមានរបស់ខ្សែប្រយុទ្ធរូបនេះមិនដូចអ្វីដែលក្លឹបចង់បាន។

ស្របដែលវិបត្តិកូវីដ១៩កំពុងបន្ដរីករាលដាល ធ្វើឱ្យហិរញ្ញវត្ថុក្លឹបកាន់តែដុនដាប ហើយតម្លៃពលកម្មរបស់កីឡាករវ័យ៣៦ឆ្នាំនេះទៀតគឺខ្ពស់ខ្លាំង ជាង២០លានផោនក្នុង១ឆ្នាំឯណោះ។
ប្រភពជាច្រើនបានអះអាងថាចប់រដូវកាលនេះ Ronaldo នឹងដើរចេញពី Juventus ហើយ។

ដោយក្លឹបដែលទំនងជាងគេនោះគឺ Real Madrid តែម្ដង។ សមាជិកនៅក្លឹបអធិរាជសទាំងអស់សុទ្ធតែនឹករលឹកដល់រូបគេ។ Zidane ដែលជាអ្នកចាត់ការក្រុម បាននិយាយថាវានៅតែអាចទៅរួចដែលវីរបុរសក្លឹប Real Madrid ត្រលប់មកវិញបាន។ ដែលនេះបញ្ជាក់ថា Ronaldo នឹងមិនស្ទាក់ស្ទើរឡើយ ក្នុងការត្រលប់ទៅកន្លែង ដែលខ្លួនឈ្នះគ្រប់យ៉ាងហើយនោះ ប្រសិនបើមានការហៅពីសំណាក់ថ្នាក់ដឹកនាំក្រុម Real Madrid មែន៕