ថៃថាមូលហេតុនៃការស្លាប់បុរសម្នាក់ក្រោយចាក់វ៉ាក់សាំង គឺមកពីជំងឺរុំារៃ មិនមែនស្លាប់ព្រោះវ៉ាក់សាំងកូវីដ១៩ទេ
មន្ត្រីសុខាភិបាលថៃបានប្រកាសជាផ្លូវការ នៅថ្ងៃទី២៦ មីនា នេះថា បុរសម្នាក់ដែលបានចាក់វ៉ាក់សាំងបង្ការជំងឺកូវីដ១៩រួចបានស្លាប់នោះ មិនមែនមកពីការចាក់វ៉ាក់សាំងទេ តែមកពីជំងឺរុំារៃរបស់អ្នកជំងឺទេ នេះបើតាមការចេញផ្សាយរបស់ The Nation។
អ្នកជំងឺជាបុរសម្នាក់បានស្លាប់ក្រោយចាក់វ៉ាក់សាំងបាន១០ថ្ងៃ គឺជារឿងគាប់ជួនទេ នេះគឺជាការបញ្ជាក់របស់វេជ្ជបណ្ឌិត Sophon Mekthon ដែលតាមដានត្រួតពិនិត្យអនុគណៈកម្មការរបស់រាជរដ្ឋាភិបាល ទទួលបន្ទុកលើការចាក់វ៉ាក់សាំង។
វេជ្ជបណ្ឌិតមួយរូបទៀត គឺលោក Tawee Chotpitayasunondh បានអះអាងដែរថា អ្នកជំងឺមានសុខភាពល្អធម្មតា នៅថ្ងៃទី៣ មីនា ជាថ្ងៃចាក់វ៉ាក់សាំង និង ថ្ងៃទី៦ មីនាក៏ល្អធម្មតា ហើយនៅថ្ងៃទី៧ មីនា ក្រុមមន្ត្រីសុខាភិបាលមិនបានដឹងពីអ្នកជំងឺរូបនេះទេ រហូតដល់ថ្ងៃទី៩ ទើបដឹងថា បានចូលមន្ទីរពេទ្យតឹងដើមទ្រូង ពិបាកដកដង្ហើម ក៏បានបាត់បង់ជីវិត នៅថ្ងៃទី១៣ មីនា។
លោកវេជ្ជបណ្ឌិតអះអាងថា បើយោងតាមកំណត់ត្រាសុខភាព អ្នកជំងឺរូបនេះធ្លាប់បានវះកាត់កាលពីខែមករា លើបញ្ហាជំងឺប៉ោងសរសៃឈាមអាកទែ ហើយបានចំណាយពេលក្នុងមន្ទីរពេទ្យ៤០ថ្ងៃ។ អ្នកជំងឺប្រុងប្រយ័ត្នខ្លាំងទើបសម្រេចចិត្តចាក់វ៉ាក់សាំង ខ្លាចឆ្លងជំងឺកូវីដ១៩ នៅរយៈពេល១សប្តាហ៍ក្រោយមក។ តែក៏ត្រូវបានវេជ្ជបណ្ឌិតពិនិត្យសុខភាព ហើយថា មានសុខភាពល្អធម្មតា អាចទទួលការចាក់វ៉ាក់សាំងបាន។ ដូច្នេះ តាមលទ្ធផលពិនិត្យបង្ហាញថា អ្នកជំងឺបានស្លាប់ដោយសារតែបញ្ហាជំងឺប្រចាំកាយរបស់អ្នកជំងឺ មិនមែនមកពីការចាក់វ៉ាក់សាំងទេ។
យ៉ាងណាក៏ដោយThe Nation មិនបានផ្សាយបញ្ជាក់ថា អ្នកស្លាប់នោះទទួលការចាក់វ៉ាក់សាំងប្រភេទអ្វីទេ ហើយថៃក៏មិនផ្អាកយុទ្ធនាការចាក់វ៉ាក់សាំងជូនពលរដ្ឋដែរ គឺវ៉ាក់សាំង AstraZeneca និង Sinovac៕
