សម្រាប់Fan K-drama ប្រាកដជាបានស្គាល់តួឯកប្រុសល្បីឈ្មោះមួយរូបគឺ លោក Song Joong Ki​ ដែលកំពុងអង្រួនបេះដូងអ្នកទស្សនាតាមរយៈរឿងភាគថ្មី Vincenzo មានគ្រប់រសជាតិ ដែលជារឿងភាគបែបស៊ើបអង្កេត បាញ់បោះ កាប់ចាក់ មនោសញ្ជេតនា, និងមានទាំងឈុតកំប្លែងមិនចេះរីងស្ងួត បូករួមតួមេធាវីស្រីក្រមិចក្រមើម ដែលកំពុងទទួលបានការគាំទ្រ និងមានអ្នកទស្សនាច្រើនវ៉ាដាច់គេក្នុងសប្តាហ៍ថ្មីកន្លងទៅនេះ។

សង្ខេបសាច់រឿងត្រួសៗ Vincenzo Cassano ជាឈ្មោះមេធាវីសង្ហារមួយរូបសញ្ជាតិអ៉ីតាលីកើតនៅប្រទេសកូរ៉េ ជាអ្នកប្រឹក្សាផ្នែកច្បាប់ និងជាអ្នករកស៊ីក្នុងក្រុមបងធំ Mafia នៅប្រទេសអ៉ីតាលីផងដែរ។

បន្ទាប់ពីឪពុកធម៌ក្នុងក្រុមបងធំជនជាតិអ៉ីតាលីស្លាប់បាត់ តួឯកប្រុសសង្ហាររូបនេះក៏បានត្រលប់មកប្រទេសកូរ៉េវិញ បំពេញបេសកកម្មដែលជាបណ្តាំរបស់ឪពុកធម៌ ក្នុងគោលបំណងសកសឹក និងស្វែងរកកំណប់មាសដែលលាក់ទុកក្នុងអាគារ Geumga Plaza ចំណាស់មួយក្នុងប្រទេសកូរ៉េ ដោយប្រើឈ្មោះ Mr. Cho ត្រូវជាមិត្តជិតស្និទ្ធរបស់លោកជាអ្នកទិញ ហើយលាក់ទុកក្នុងទូដែកខាងក្រោមបាតអាគារនោះ ចំណែកជាន់ខាងលើធ្វើជាបន្ទប់ជួលដើម្បីបន្លំភ្នែកអ្នកដទៃ។ ប៉ុន្តែគម្រោងរបស់លោកត្រូវបានរាំងស្ទះដោយក្រុមហ៊ុនខិលខូច Bebel E&C ប្រើគ្រប់វិធីដើម្បីចង់ទិញយកអាគារនោះដែរ។

រឿងរ៉ាវក៏កាន់តែតឹងតែង និងស្មុគស្មាញ ប្រឆាំងគ្នាដណ្តើមយកអាគារមួយនោះ ដោយតួឯកប្រុសបានប្រើល្បិចដ៏វៃឆ្លាតរបស់ខ្លួនតាមផ្នែកច្បាប់ផង និងល្បិចបែបអ្នកលេងផង រួមគ្នាជាមួយតួស្រី តបតរជាមួយជនខិលខូចទាំងនោះ។

នេះគ្រាន់តែជាការសង្ខេបសាច់រឿងខ្លីៗប៉ុណ្ណោះ ចង់ដឹងបន្តទៀត កុំភ្លេចទស្សនាកុំឲ្យខកខាន ធានាថាល្អមើលខ្លាំងមានគ្រប់រសជាតិ មានទាំងឈុតកាប់ចាក់ ផ្លែផ្កាពាក្យសម្តី ក៏មានឈុតខ្លះសើចរឹងពោះបាត់អស់ទុក្ខកង្វល់ផងដែរ។

Vincenzo ជារឿងភាគកូរ៉េថ្មីដែលរក្សាសិទ្ធិផលិតរួមគ្នាបែប Original Series របស់ក្រុមហ៊ុនNetflix ដែលបានដាក់ឲ្យទស្សនាដល់ episodes ទី១២ហើយ។ អ្វីដែលពិសេសសម្រាប់រឿងកូរ៉េភាគច្រើនគឺមានត្រឹមតែ១៦ episodes ប៉ុណ្ណោះ តែដោយឡែករឿងVincenzo នេះដែរមានសរុបដល់ទៅ២០ Episodes ឯណោះ។