ប្រមុខអង្គការ WHO បញ្ជាក់ថា ទិន្នន័យការសិក្សាស្រាវជ្រាវពីប្រភពដើមនៃជំងឺកូវីដ-១៩នៅប្រទេសចិន ត្រូវបានដកហូតចេញពី WHO
ស្វីស៖ អគ្គនាយកអង្គការសុខភាពពិភពលោក WHO លោក ថេត្រូស អាដាណម ហ្គេប្រេយ៉េសឹស និយាយថា ទិន្នន័យត្រូវដកហូតចេញពីអ្នកស៊ើបអង្កេតរបស់អង្គការសុខភាពពិភពលោក ដែលបានធ្វើដំណើរទៅប្រទេសចិន ដើម្បីស្រាវជ្រាវពីប្រភពដើមនៃការចំលងជំងឺកូវីដ-១៩ ។
លោក ថេត្រូស បន្ថែមថា នៅក្នុងការពិភាក្សាជាមួយក្រុមការងារ ពួកគេបានបង្ហាញពីការលំបាកដែលពួកគេបានជួបប្រទះ ក្នុងការទទួលបានទិន្នន័យដើម ហើយលោករំពឹងថា ការសិក្សារួមគ្នានាពេលអនាគតនឹងរួមបញ្ចូលការចែករំលែកទិន្នន័យឱ្យបានទាន់ពេលវេលា និងទូលំទូលាយ ។ អង្គការសុខភាពពិភពលោក (WHO) នៅថ្ងៃអង្គារនេះ បានចេញរបាយការណ៍ផ្លូវការពេញលេញមួយរបស់ក្រុមអ្នកជំនាញការរបស់ខ្លួន បន្ទាប់ពីដំណើរទស្សនកិច្ច និងសិក្សាស្រាវជ្រាវនៅទីក្រុងវូហាន ដើម្បីកំណត់រកប្រភពនៃជំងឺកូវីដ១៩ ដែលពីដំបូងត្រូវបានគេសង្ស័យថា លេចធ្លាយចេញពីកន្លែងពិសោធន៍មួយរបស់ចិននៅក្នុងទីក្រុងនេះ ។
បើតាមរបាយការណ៍ខាងលើនេះ វីរុសកូរ៉ូណាទំនងបំផុតឆ្លងពីសត្វប្រជៀវមកកាន់មនុស្ស តាមរយៈសត្វអន្តរការីណាមួយ រីឯទ្រឹស្តីដែលថា វាចេញពីកន្លែងពិសោធន៍មេរោគណាមួយនោះ វាមិនទំនងខ្លាំងណាស់ ។ ទោះជាយ៉ាងណា អាមេរិក និងប្រទេសជាសម្ព័ន្ធមិត្តចំនួន១៣ រួមមានអូស្ត្រាលី ជប៉ុន និងអង់គ្លេស បានរួមគ្នាសម្តែងការព្រួយបារម្ភរបស់ខ្លួន អំពីការសិក្សារបស់អង្គការ WHO នេះពីព្រោះវាហាក់យឺតពេល និងមិនបានបញ្ចូលទិន្នន័យពេញលេញ និងសំណាកដែលត្រូវការ ៕ Reuters
