ជប៉ុនផ្អាកផ្តល់ជំនួយថ្មីដល់មីយ៉ាន់ម៉ា តបតនឹងរដ្ឋប្រហាររបស់ពួកយោធា
ជប៉ុនបានសម្រេចផ្អាកផ្តល់ជំនួយថ្មីៗទៅប្រទេសមីយ៉ាន់ម៉ា ឆ្លើយតបនឹងការធ្វើរដ្ឋប្រហារនៅទីនោះ នេះបើតាមរដ្ឋមន្ត្រីការបរទេសជប៉ុន។ លោក Toshimitsu Motegi ថា ជប៉ុនគឺជាអ្នកផ្តល់ជំនួយដ៏ធំសម្រាប់មីយ៉ាន់ម៉ា ហើយការពន្យាពេលផ្តល់ជំនួយនេះនឹងផ្ញើសារកាន់តែច្បាស់។
លោកបានប្រាប់សភាកាលពីម្សិលមិញថា « សម្រាប់មីយ៉ាន់ ជប៉ុនគឺជាអ្នកផ្តល់ជំនួយសេដ្ឋកិច្ចលំដាប់ទីមួយ ហើយថាតើជប៉ុនមានជំហរបែបនេះ ក្នុងការជួយសេដ្ឋកិច្ច? គឺគ្មានជំនួយថ្មីទេ យើងសូមបញ្ជាក់ច្បាស់ពីចំណុចនេះ»
យ៉ាងណាក៏ដោយ ជប៉ុនមិនទាន់មានវិធានការដាក់ទណ្ឌកម្មអ្វីទេ បើទោះបីជាបណ្តាប្រទេសធំៗ ដូចជា អង់គ្លេស អឺរ៉ុប និងអាមេរិកបានប្រកាសដាក់ទណ្ឌកម្មនានារួចហើយ ចំពោះក្រុមមេដឹកនាំយោធានិងនគរបាលនៅមីយ៉ាន់ម៉ា ដែលពាក់ព័ន្ធនឹងការធ្វើរដ្ឋប្រហារយោធានោះ រួមមានទាំងបណ្តាក្រុមហ៊ុនជាម្ចាស់កម្មសិទ្ធិរបស់ពួកយោធាដែរ៕ ប្រភពពី CNA
