ប្រេសិតពិសេសអង្គការសហប្រជាជាតិព្រមានថា មីយ៉ាន់ម៉ាកំពុងប្រឈមមុខនឹងលទ្ធភាពផ្ទុះសង្គ្រាមស៊ីវិលទ្រង់ទ្រាយធំ
អាមេរិក៖ បេសកជនពិសេសអង្គការសហប្រជាជាតិ ទទួលបន្ទុកកិច្ចការប្រទេសមីយ៉ាន់ម៉ាបានអំពាវនាវជាថ្មីនៅថ្ងៃពុធនេះ ឱ្យក្រុមប្រឹក្សាសន្តិសុខធ្វើសកម្មភាពជាបន្ទាន់ ដើម្បីដោះស្រាយវិបត្តិនៅក្នុងប្រទេសអាស៊ីអាគេ្នយ៍មួយនេះ ដោយព្រមានពីហានិភ័យនៃសង្រ្គាមស៊ីវិល ។
យោងតាមសមាគមជំនួយអ្នកទោសនយោបាយ បានប្រាប់ពីតួលេខអ្នកស្លាប់ ប៉ុន្តែចំនួនទំនងជានៅមានច្រើនទៀតថា គិតត្រឹមយប់ថ្ងៃពុធសប្តាហ៍នេះ យ៉ាងហោចណាស់មានអ្នកតវ៉ាស្លូតត្រង់ អ្នកឈរមើល និងកុមារប្រមាណ៥៣៦នាក់ត្រូវបានសម្លាប់ចាប់តាំងពីរដ្ឋប្រហារថ្ងៃទី១ ខែកុម្ភៈមក ។ បេសកជនពិសេសអង្គការសហប្រជាជាតិ ទទួលបន្ទុកកិច្ចការប្រទេសមីយ៉ាន់ម៉ាលោកស្រី គ្រីស្ទីន ស្ក្រាណឺ ប៊ឺជែណឺ បាននិយាយថា ខ្ញុំអំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិពិចារណាលើជម្រើសទាំងឡាយដែលអាចធ្វើទៅបាន ដើម្បីធ្វើសកម្ម ភាពការពារ កុំឱ្យគ្រោះមហន្តរាយទ្រង់ទ្រាយធំកើតឡើង ។
លោកស្រីបានសង្កត់ធ្ងន់ថា ទ្វារចរចានៅតែបើកចំហចំពោះយោធាមីយ៉ាន់ម៉ា ប៉ុន្តែប្រសិនបើគ្រប់គ្នាត្រូវរង់ចាំរហូតទាល់តែយោធាត្រៀមខ្លួនរួចរាល់ សម្រាប់កិច្ចចរចា នោះស្ថានការណ៍បច្ចុប្បន្ននឹងកាន់តែអាក្រក់ឡើង ឬអាចនឹងក្លាយជាសង្រ្គាមស៊ីវិលបង្ហូរឈាមក្នុងពេលឆាប់ៗក៏ថាបាន ៕ ប្រភព៖ CNA
