ក្រុមហ៊ុន BioNTech-Pfizer អះអាងថា វ៉ាក់សាំងបង្ការជំងឺ Covid-19 របស់ខ្លួនមានប្រសិទ្ធភាព១០០ភាគរយចំពោះក្មេងអាយុពី១២ដល់១៥ឆ្នាំ
អាល្លឺម៉ង់៖ ក្រុមហ៊ុន បាយអូអិនធិច-ភីហ្វីហ្សឺ (BioNTech-Pfizer) នៅថ្ងៃពុធនេះនិយាយថា វ៉ាក់សាំងរបស់ពួកគេបានបង្ហាញប្រសិទ្ធភាពរហូតដល់១០០ភាគរយប្រឆាំងនឹងវីរុស Covid-19 ចំពោះកុមារមានអាយុពី១២ដល់១៥ឆ្នាំ ។
នាយកប្រតិបត្តិក្រុមហ៊ុន ភីហ្វីហ្សឺ លោក Albert Bourla បាននិយាយថា យើងគ្រោងបញ្ជូនទិន្នន័យទាំងនេះទៅឲ្យនិយតករអាមេរិក (FDA) ជាការស្នើសុំធ្វើវិសោធនកម្មលើការអនុញ្ញាតឲ្យប្រើប្រាស់ជាបន្ទាន់ ក្នុងរយៈពេលប៉ុន្មានសប្តាហ៍ខាងមុខនេះ និង ទៅអោយនិយតករដទៃទៀតនៅជុំវិញពិភពលោក ជាមួយក្តី សង្ឃឹមក្នុងការចាប់ផ្តើមចាក់វ៉ាក់សាំងលើក្រុមអាយុនេះ មុនពេលសាលារៀនបើកបវេសនកាលថ្មី ។ នាយកប្រតិបត្តិក្រុមហ៊ុនអាល្លឺម៉ង់ BioNTech បានអះអាងថា លទ្ធផលដែលបង្ហាញពីការការពារខ្ពស់សម្រាប់មនុស្សវ័យជំទង់ គឺជាការលើកទឹកចិត្តខ្លាំងបំផុត ដោយសារតែនិន្នាការដែលយើងបានឃើញនៅក្នុងរយៈពេលប៉ុន្មានសប្តាហ៍ថ្មីៗនេះ ពាក់ព័ន្ធនឹងការរីករាលដាលនៃវីរុសបំប្លែងខ្លួនចក្រភពអង់ គ្លេស B117 ។
បើតាមសេចក្តីថ្លែងការណ៍របស់ក្រុមហ៊ុនទាំងពីរ ការសាកល្បងដំណាក់កាលទី៣ដែលធ្វើឡើងលើមនុស្សវ័យជំទង់ចំនួន២ពាន់២៦០នាក់នៅក្នុងសហរដ្ឋអាមេរិក បានបង្ហាញពីប្រសិទ្ធភាព១០០ភាគរយ និងការឆ្លើយតបអង់ទីគ័រដ៏រឹងមាំ ៕ ប្រភព៖ Reuters