កម្លាំងចម្រុះរបស់ស្នងការនគរបាលខេត្តសៀមរាប ចុះ អនុវត្តវិធានការរដ្ឋបាល បិទការធ្វើដំណើរជាបណ្ដោះអាសន្ន និងការជួបជុំនានាក្នុងក្រុង ពុំមានបញ្ហាគួរឲ្យកត់សម្គាល់ឡើយ
កម្លាំងចម្រុះរបស់ស្នងការនគរបាលខេត្តសៀមរាប ក្នុងរយ:ពេល៣យប់កន្លងមកនេះ ចំពោះការអនុវត្តវិធានការរដ្ឋបាល បិទគោចរណ៏ជាបណ្ដោះអាសន្ន និងការជួបជុំនានាក្នុងក្រុង ជាក់ស្តែង នៅយប់ទី៣ ត្រូវនិងថ្ងៃទី១២ ខែមេសា ស្ថិតនៅត្រង់ចំណុចរង្វងមូលស្ពាន់ថ្មក្បែរព្រះរាជដំណាក់ស្តេច គឺកម្លាំងចម្រុះដែលដាក់នៅតាមគោលដៅសំខាន់ៗ ទាំង៦កន្លែង ក្រុងសៀមរាប ចាប់ពីម៉ោង ៨:០០នាទីយប់ ដល់ម៉ោង ៥:០០នាទីទាបភ្លឺ ដែលមានរយៈពេល១៤ថ្ងៃ គឺគិតចាប់ពីយប់ថ្ងៃទី១០ រហូតដល់ថ្ងៃទី២៣ ខែមេសា ឆ្នាំ២០២១ ពុំមានបញ្ហាគួរឲ្យកត់សម្គាល់ឡើយ ដែលក្រុមសមត្ថកិច្ចកម្លាំងចម្រុះបានធ្វើការត្រូតពិនិត្យនោះ។
លោក វរ:សេនីយឯក ជឹម សុវណ្ណ នាយការិយាល័យចរាចរណ៏ផ្លូវគោកខេត្ត មានប្រសាសន៏ថា ឯកឧត្តម ទៀ សីហា អភិបាលខេត្តសៀមរាប បានយកចិត្តទុកដាក់យ៉ាងតឹងរឹងបំផុតក្នុងការអនុវត្តវិធានការណ៍នានាដែលបានដាក់ចេញជាបន្តបន្ទាប់កន្លងមក ក្នុងស្មារតីទទួលខុសត្រូវខ្ពស់ និងភាពជាអ្នកដឹកនាំចំពោះស្ថានការណ៍ដ៏អាក្រក់នេះ។ លោក បានបន្តថា នៅយប់ទី៣ យើងសង្កេតឃើញបងប្អូនប្រជាពលរដ្ឋភាគច្រើនពួកគាត់គោរពនូវវិធានការណ៍ទាំងឡាយរបស់រាជរដ្ឋាភិបាល ក៏ដូចជាក្រសួងសុខាភិបាលផងដែរ សម្រាប់យើងវាចាំបាច់ណាស់ ដើម្បីទាមទារឲ្យមានការចូលរួមរបស់ប្រជាពលរដ្ឋទាំងអស់គ្នាទើបយើងអាចទប់ស្កាត់បាននៅការរីករាលដាលជំងឺឆ្លងកូវិដ.១៩ ដ៏កាចសាហាវនេះ។ លោក បញ្ជាក់ទៀតថា ក្នុងការអនុវត្តវិធានការរដ្ឋបាលជាបណ្តោះអាសន្នរបស់រដ្ឋបាលខេត្ត ក្នុងក្រុងសៀមរាប កម្លាំងចម្រុះយើងមិនទាន់បានផាកវិន័យទៅប្រជាពលរដ្ឋនៅឡើយទេ ដោយសារពួកគាត់បានដឹងបានយល់ នឹងគោរពទៅតាមសេចក្តីប្រកាសឲ្យអនុវត្តតាមខ្លឹមសារសេចក្តីសម្រេច ចំពោះទីតាំងណាដែលមិនគោរពតាមកំណត់របស់រដ្ឋបាលខេត្ត យើងត្រូវតែធ្វើទៅតាមនិតិវិធីជាធរមានចំពោជនល្មើស៕ ស៊ាន សុផាត
