ចូលរួមការពាររោគជំងឺកូវីដ-១៩សែលកាត អនុវត្តវិធានការណ៍តឹងរ៉ឹងជាងមុនដល់និយោជិក និងអតិថិជនរបស់ខ្លួន
ដោយ៖ម៉ាដេប៉ូ
រាជធានីភ្នំពេញ៖នៅថ្ងៃទី ១៣ ខែមេសា ឆ្នាំ ២០២១នេះក្រុមហ៊ុនសែលកាត បានចូលរួមគាំទ្រយុទ្ធនាការ ៣ ការពារ និង៣កុំ របស់ក្រសួងសុខាភិបាល ដើម្បីជួយឱ្យប្រជាពលរដ្ឋកម្ពុជា និងជនបរទេសទាំងអស់ បានយល់ដឹងអំពីសារៈសំខាន់នៃយុទ្ធនាការនេះ នៅតាមប៉ុស្តិ៍ទូរទស្សន៍ វិទ្យុ និងប្រព័ន្ធផ្សព្វផ្សាយបណ្តាញសង្គមទាំងអស់ នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ។
យុទ្ធនាការនេះ ជម្រុញឱ្យប្រជាពលរដ្ឋទាំងអស់ អនុវត្តនូវវិធាន៣ការពារ ពោលគឺលាងដៃ ពាក់ម៉ាស និងរក្សាគម្លាតសុវត្ថិភាព រួមជាមួយនឹងវិធាន៣កុំ គឺត្រូវជៀសវាងទៅកន្លែងបិទជិតគ្មានខ្យល់ចេញចូល ទៅតំបន់ដែលមានមនុស្សច្រើនកុះករ ឬប៉ះពាល់គ្នា ដូចជាការចាប់ដៃស្វាគមន៍ជាដើម។
លោក អៀន វ៉ាតសុន (Ian Watson) នាយកប្រតិបត្តិក្រុមហ៊ុនសែលកាត បានឱ្យដឹង ថា វាពិតជាមានសារៈសំខាន់ខ្លាំងណាស់ ដែលពលរដ្ឋទាំងអស់យល់ច្បាស់នូវគោលបំណងរបស់រាជរដ្ឋាភិបាល ដើម្បីជួយបញ្ឈប់ការរីករាលដាលនៃជម្ងឺឆ្លងនេះនៅក្នុងថ្ងៃបុណ្យឈប់សម្រាក។
លោកបានបន្តឱ្យដឹងទៀតថា ជាងនេះទៀត ពួកយើងបានបន្តគាំទ្រវិធានការសុវត្ថិភាពរបស់រាជរដ្ឋាភិបាល នៅតាមបណ្តាហាងទាំងអស់របស់សែលកាត ដោយជម្រុញឱ្យអតិថិជនទាំងអស់ ប្រើប្រាស់នូវសេវាកម្មឌីជីថលដ៏សម្បូរបែបដែលកំពុងដាក់បម្រើជូនរួចជាស្រេចរបស់ពួកយើង ដើម្បីបញ្ចូលទឹកប្រាក់ទៅក្នុងទូរស័ព្ទរបស់ពួកគេ។ យើងបានផ្តល់ជូនការលើកទឹកចិត្តបន្ថែមដល់អតិថិជនឱ្យប្រើប្រាស់សេវាកម្មទាំងនេះ ពោលគឺអាចជួយកាត់បន្ថយនូវតម្រូវការអញ្ជើញមកកាន់ហាងផ្ទាល់។
លោក ថា៖ “បច្ចុប្បន្ននេះ យើងមានផ្តល់នូវសេវាឌីជីថលទាំងស្រុង ដើម្បីផ្តល់ជូនអតិថិជននូវសុខសុវត្ថិភាព និងភាពងាយស្រួលក្នុងការប្រើប្រាស់។ សម្រាប់ពលរដ្ឋរស់នៅរាជធានីភ្នំពេញ ពួកគាត់អាចកុម្ម៉ង់ទិញស៊ីមសែលកាតបានយ៉ាងងាយស្រួលបំផុត តាមរយៈកម្មវិធីដែលផ្តល់សេវាដឹកជញ្ជូនដល់គេហដ្ឋានផ្ទាល់ ដែលក្នុងនោះមានដូចជា Wing Mall, Nham 24 និង Smile Shop ជាដើម ហើយសេវាចុះឈ្មោះដោយខ្លួនឯងរបស់យើងទៀតសោត អនុញ្ញាតឱ្យអតិថិជន អាចដំណើរការស៊ីមកាតរបស់ពួកគេ និងចាប់ផ្តើមប្រើប្រាស់គម្រោងរបស់ពួកយើង ក្នុងរយៈពេលត្រឹមតែ ២០នាទីប៉ុណ្ណោះ បន្ទាប់ពីបានបញ្ជាទិញរួច”។
ជាងនេះលោកអៀន វ៉ាតសុន (Ian Watson) នាយកប្រតិបត្តិក្រុមហ៊ុនសែលកាត បានឱ្យដឹងផងថាតាមរយៈការស្ទង់មតិប្រចាំថ្ងៃដោយការ សាកសួរដល់បុគ្គលិកថាតើពួកគេកំពុងស្ថិតនៅក្នុងតំបន់កំពុងឆ្លងរីករាលដាលខ្លាំងឬយ៉ាងណា ដោយក្នុងនោះ ពួកយើងនឹងរៀបចំនូវនីតិវិធីស្នាក់នៅដាច់ដោយឡែកជូនដល់បុគ្គលិកដែលរស់នៅក្នុងតំបន់ទាំងនោះ ដែលជាលទ្ធផល ពួកយើងនឹងអាចការពារបុគ្គលិក និងអតិថិជនប្រកបដោយសុខសុវត្ថិភាពល្អបំផុត។
លោក វ៉ាតសុន បានបន្ថែមឱ្យដឹងទៀតថា ក្រុមហ៊ុនសែលកាត នឹងចូលរួមជួយធានាថា សារនៃវិធានការសុវត្ថិភាពរបស់ក្រសួងសុខាភិបាល នឹងត្រូវបានផ្សព្វផ្សាយយ៉ាងទូលំទូលាយនៅតាមបណ្តាញផ្សព្វផ្សាយធំៗ ដែលក្នុងនោះរួមមានប៉ុស្តិ៍ទូរទស្សន៍នៅទូទាំងប្រទេសកម្ពុជា ការចាក់ផ្សាយតាមវិទ្យុ ការបញ្ជូនដំណឹងតាមរយៈសារ និងប្រព័ន្ធបណ្តាញសង្គមទាំងអស់ រួមជាមួយនឹងការគាំទ្រពី Influencer និងសិល្បៈករមានទេពកោសល្យជាច្រើនរូបទៀតរបស់សែលកាត។
លោកបានលើកឡើងថា យុទ្ធនាការនេះគឺជាវិធីសាស្ត្រមួយក្នុងចំណោមវិធីសាស្ត្រជាច្រើនទៀត ដែលក្រុមហ៊ុនសែលកាត និងក្រុមហ៊ុនរ៉ូយ៉ាល់គ្រុប កំពុងជួយគាំទ្រដល់ពលរដ្ឋកម្ពុជានៅក្នុងអំឡុងនៃវិបត្តិជម្ងឺរាតត្បាតនេះ។ មិនតែប៉ុណ្ណោះ អ្នកឧកញ៉ាគិតម៉េង ដែលជាអគ្គនាយកក្រុមហ៊ុនរ៉ូយ៉ាល់គ្រុប និងលោកជំទាវ ម៉ៅ ចំណាន ក៏បានចូលរួមជួយបរិច្ចាគថវិកាជាច្រើនលើកនាពេលថ្មីៗនេះ ដើម្បីជួយប្រយុទ្ធប្រឆាំងនឹងជម្ងឺរាតត្បាតនេះផងដែរ៕
