អាមេរិក៖ ក្រុមហ៊ុន Apple បានបង្ហាញពីការលក់ និងប្រាក់ចំណេញរបស់ខ្លួន ដោយទទួលបានលើសការរំពឹងទុករបស់ស្ថាប័នវិភាគ Wall Street ក្នុងនោះទូរស័ព្ទ iPhone 5G បានជំរុញកំណើនប្រាក់ចំណេញ ប៉ុន្តែបានព្រមានថា កង្វះខាតបន្ទះឈីបនៅលើពិភពលោកអាចធ្វើឱ្យការលក់ iPad និងកុំព្យូទ័រ Mac ខាតបង់រាប់ពាន់លានដុល្លារ ។
ប្រភពបានអោយដឹងថា ក្រុមហ៊ុនបច្ចេកវិទ្យាយក្សាអាមេរិកមួយនេះ បានទទួលជោគជ័យខ្លាំងលើការលក់នៅក្នុងប្រទេសចិន ដោយបានកើនឡើងជិតទ្វេដង និងគ្រប់ផលិតទាំងអស់របស់ Apple ជាពិសេស iPhone បាននាំមុខគេ និងទទួលបានប្រាក់ចំណូលពីការលក់៦.៥ពាន់លានដុល្លារ ក្នុងគ្រាដែលការលក់កុំព្យូទ័រ Mac កើនឡើងលើសការព្យាករជាង៣ដង ។
សូមជម្រាបផងដែរថា ចំនួននៃការលក់ទូរស័ព្ទ iPhone របស់ក្រុមហ៊ុន Apple សរុបគិតជាទឹកប្រាក់មានចំនួន៤៧.៩ពាន់លានដុល្លារ និងការលក់ iPad ទទួលបាន៧.៨ពាន់លានដុល្លារ ស្របពេលដែលការលក់កុំព្យូទ័រ Mac ទទួលបានទឹកប្រាក់៩.១ពាន់លានដុល្លារ ៕ ប្រភព៖ Reuters