សម្តេចក្រឡាហោម ស ខេង ៖កងកម្លាំងនគរបាលជាតិបានកសាងនូវស្នាដៃធំៗជាច្រើនជូនសង្គមជាតិក្នុងការទប់ស្កាត់ និងបន្សាបឥទ្ធិពលនៃឧបាយកលបដិវត្តន៍ពណ៌ និងការអនុវត្តផែនការទុច្ចរិតគ្រប់រូបភាព
ភ្នំពេញៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានបញ្ជាក់ថាកងកម្លាំងនគរបាលជាតិ បានប្រកៀកស្មាជាមួយកងយោធពលខេមរភូមិន្ទ ការពារបូរណភាពទឹកដី រក្សាបាននូវព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ ព្រមទាំងបានដាក់ចេញនូវវិធានការប្រកបដោយប្រសិទ្ធភាពក្នុងការទប់ស្កាត់អំពើ ភេរវកម្ម និងឧក្រិដ្ឋកម្មឆ្លងដែនគ្រប់ប្រភេទ។កងកម្លាំងនគរបាលជាតិបានកសាងនូវស្នាដៃធំៗជាច្រើនជូនសង្គមជាតិ ក្នុងការទប់ស្កាត់ និងបន្សាបឥទ្ធិពលនៃឧបាយកលបដិវត្តន៍ពណ៌ និងការអនុវត្តផែនការទុច្ចរិតគ្រប់រូបភាព។
សម្តេចក្រឡាហោម ស ខេង បានបញ្ជាក់ដូច្នេះនៅក្នុងសារលិខិតជូនពរផ្ញើជូនកងកម្លាំងនគរបាលជាតិ ក្នុងទិវារំឭកខួបអនុស្សាវរីយ៍លើកទី ៧៦ ថ្ងៃកំណើតនគរបាលជាតិ នៅថ្ងៃទី១៦ ខែឧសភា ឆ្នាំ២០២១។
សម្តេចក្រឡាហោមថ្លែងនៅក្នុងសារជូនពរនេះថា រយៈពេលពេញ ១ឆ្នាំកន្លងទៅនេះកងកម្លាំងនគរបាលជាតិបាន ប្រកៀកស្មាជាមួយកងយោធពល ខេមរភូមិន្ទ ការពារបូរណភាពទឹកដី រក្សាបាននូវព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ ព្រមទាំងបានដាក់ចេញនូវវិធានការប្រកបដោយប្រសិទ្ធភាពក្នុងការទប់ស្កាត់អំពើ ភេរវកម្មនិងឧក្រិដ្ឋកម្មឆ្លងដែនគ្រប់ប្រភេទស្របពេលដែលប្រតិបត្តិការបង្ក្រាបបទល្មើសដែលមានឥទ្ធិពលដល់ចិត្តសាស្ត្រសង្គម ដូចជា លួច ឆក់ ប្លន់ រំលោភ និងការប្រើប្រាស់អាវុធខុសច្បាប់ទទួលបានលទ្ធផលខ្ពស់គួរឲ្យកត់សម្គាល់។
ទន្ទឹមគ្នានេះ យុទ្ធនាការប្រយុទ្ធប្រឆាំងគ្រឿងញៀនខុសច្បាប់ ការពង្រឹងអនុវត្តច្បាប់ចរាចរណ៍ផ្លូវគោក អំពើជួញដូរ មនុស្ស ពិសេសស្ត្រី និងកុមារ ការអនុវត្តច្បាប់អន្តោប្រវេសន៍ ការបម្រើសេវាចាំបាច់នានាសម្រួលដល់ជីវភាពរស់នៅ ប្រចាំថ្ងៃរបស់ប្រជាពលរដ្ឋ។ល។ត្រូវបានចាត់វិធានការប្រកបដោយប្រសិទ្ធភាព។កងកម្លាំងនគរបាលជាតិបានក្លាយជាចលករប្រកបដោយថាមពល ជំរុញការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព»ដែលជាគោលនយោបាយ ជាតិសម្រាប់គាំទ្រ និងពង្រឹងសន្តិសុខ សណ្តាប់ធ្នាប់សាធារណៈ និងសុវត្ថិភាពក្នុងសហគមន៍ទូទាំងប្រទេស។
បន្ថែមលើនេះទៀតកងកម្លាំងនគរបាលជាតិបានរួមចំណែក យ៉ាងសស្រាក់សម្រាំ ក្នុងការជួយសង្គ្រោះប្រជាពលរដ្ឋ ដោយសារគ្រោះធម្មជាតិ និងគ្រោះថ្នាក់ផ្សេងៗ ប្រកបដោយទឹកចិត្តជ្រះថ្លា ស្នេហាប្រជាពលរដ្ឋពិសេសក្នុងដំណាក់កាល នៃការប្រយុទ្ធប្រឆាំងការឆ្លងរាត ត្បាតជំងឺកូវីដ-១៩ កងកម្លាំងនគរបាលជាតិបានចូលរួមអនុវត្តយុទ្ធនាការទប់ស្កាត់ ប្រកបដោយឆន្ទៈមុតស្រួច និងមានស្មារតីអង់អាចក្លាហានគួរឲ្យកោតសរសើរ។
សម្តេចក្រឡាហោម ស ខេង បានបញ្ជាក់ថា “ទន្ទឹមនឹងសកម្មភាពប្រកបដោយកិច្ចខិតខំប្រឹងប្រែងខាងលើកងកម្លាំង នគរបាលជាតិបានកសាងនូវស្នាដៃធំៗជាច្រើនជូនសង្គមជាតិក្នុងការទប់ស្កាត់និងបន្សាបឥទ្ធិពលនៃឧបាយកលបដិវត្តន៍ពណ៌ និងការអនុវត្តផែនការទុច្ចរិតគ្រប់រូបភាព ក្នុងគោលបំណងផ្តួលរំលំរាជរដ្ឋាភិបាលស្របច្បាប់ ដណ្ដើមយកអំណាច ដើម្បីផ្លាស់ប្ដូររបបគ្រប់គ្រងនៅកម្ពុជា”។
នាថ្ងៃទី១៥ខែឧសភានេះដែរ ក្នុងសារលិខិតរបស់សម្តេចតេជោហ៊ុន សែន នាយករដ្ឋមន្ត្រីនៃកម្ពុជាក្នុងទិវារំឮកខួបអនុស្សារីយ៍លើកទី៧៦១៦ ឧសភា ១៩៤៥ – ១៦ ឧសភា ២០២១) ថ្ងៃកំណើតនគរបាលជាតិសម្តេចតេជោបានបញ្ជាក់ថាឆ្នាំ២០២១ និងឆ្នាំ២០២២ ខាងមុខនេះស្របពេលដែលសង្គ្រាមប្រឆាំងជំងឺកូវីដ-១៩ នៅតែបន្តនិងពុំអាចកំណត់ពេលវេលាបញ្ចប់បានច្បាស់លាស់នោះ សភាពការណ៍សន្តិសុខសកលលោកក៏នៅតែបន្តប្រែប្រួលស្មុគស្មាញពោរពេញដោយគ្រោះថ្នាក់ហើយនឹងជះឥទ្ធិពលជាអវិជ្ជមានដល់បរិយាកាសសន្តិសុខនៅ កម្ពុជាយើងជាក់ជាមិនខានឡើយ ។
សម្តេចតេជោបានទាញការចាប់អារម្មណ៍ថា “ក្នុងខណៈពេលដូចគ្នានេះដែរព្រះរាជាណាចក្រ កម្ពុជានឹងត្រូវត្រៀមលក្ខណៈសម្បត្តិរៀបចំដំណើរការបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី៥ឆ្នាំ ២០២២ ដែលជាគោលដៅនៃការប៉ុនប៉ងវាយប្រហាររបស់ក្រុមឧទ្ទាមក្បត់ជាតិដើម្បីបំផ្លាញកិច្ចដំណើរការនៃព្រឹត្តិការណ៍នយោបាយដ៏សំខាន់នេះ ។ ដូចនេះស្ថានការណ៍នាពេលខាងមុខទោះបីតិចឬច្រើន ផ្ទាល់ឬប្រយោល សុទ្ធតែមានផលប៉ះពាល់ដល់សន្តិសុខផ្ទៃក្នុងយ៉ាងពិតប្រាកដ ដែលបញ្ហាទាំងអស់នេះតម្រូវឲ្យកងកម្លាំងនគរបាលជាតិបន្តពង្រឹងស្មារតីប្តេជ្ញាចិត្តខ្ពស់បំពេញកាតព្វកិច្ចក្នុងនាមជាកម្លាំងស្នូល រក្សាឲ្យបាននូវស្ថិរភាព សន្តិសុខ ទប់ស្កាត់និងបង្ក្រាបឲ្យបានទាន់ពេលវេលានូវរាល់ឧបាយកលសកម្មភាពរបស់ក្រុមឧទ្ទាមក្បត់ជាតិនិងបក្ខពួកដោយមិនឲ្យពួកគេសម្រេចផែនការទុច្ចរិតទាំងនេះបានជាដាច់ខាត”។
ស្របជាមួយសារលិខិតរបស់សម្តេចតេជោនាយករដ្ឋមន្ត្រីនែកម្ពុជា សម្តេចក្រឡាហោមក៏បានរំឭកទៅនគរបាលជាតិថា សភាពការណ៍សន្តិសុខជាសកលនាពេលខាងមុខ នៅតែមានការប្រែប្រួលប្រកបដោយភាពស្មុគស្មាញមិនអាចប៉ាន់ស្មាន បានព្រមទាំងជះឥទ្ធិពលជាអវិជ្ជមានទាំងផ្ទាល់និងប្រយោលដល់ប្រទេសកម្ពុជាស្របពេលដែលការឆ្លងរាតត្បាតនៃជំងឺកូវីដ-១៩ នៅបន្តយាយីដល់អាយុជីវិតប្រជាពលរដ្ឋ និងបង្កើតជារនាំង ឧបសគ្គដ៏ធំធេងទប់ស្កាត់ការអភិវឌ្ឍប្រទេស ជាតិលើគ្រប់វិស័យ។ ស្ថានភាពប្រកបដោយហានិភ័យខាងលើនេះ គឺជាបន្ទុកដែលរាជរដ្ឋាភិបាលត្រូវរែកពន់ ដើម្បី ការពារខឿនសន្តិភាព ឯករាជ្យ អធិបតេយ្យជាតិ បូរណភាពទឹកដី សង្គ្រោះជីវិតប្រជាពលរដ្ឋ និងខិតខំស្ដារអភិវឌ្ឍន៍ ប្រទេសជាតិ ដែលទទួលរងនូវវិបត្តិយ៉ាងធ្ងន់ធ្ងរដោយសារជំងឺកូវីដ-១៩។ ក្រៅពីនេះបញ្ហាសន្តិសុខផ្ទៃក្នុងក៏អាចប្រឈម ទៅនឹងការវាយប្រហារពីក្រុមឧទ្ទាមក្បត់ជាតិដែលគាំទ្រដោយនិន្នាការនយោបាយប្រឆាំងក្រៅប្រទេសប្រើប្រាស់ឧបាយកល ទុច្ចរិត បង្កភាពវឹកវរបំពុលបរិយាកាសសន្តិសុខ និងសណ្តាប់ធ្នាប់ សង្គម ក្នុងគោលដៅសម្រេចនូវមហិច្ឆតាខ្មៅងងឹត ដណ្តើមអំណាចផ្ទុយពីគន្លងនៃលទ្ធិប្រជាធិបតេយ្យ។
សម្តេចក្រឡាហោមបញ្ជាក់ថាបញ្ហាប្រឈមដូចបានពោលខាងលើគឺជាតម្រូវការចាំបាច់ទាមទារឲ្យមានការចូលរួមជាចលនាជាតិ ដើម្បីដោះស្រាយឲ្យបានទាន់ពេលវេលាហើយវិស័យអាទិភាពនោះ គឺការធានារក្សាឲ្យបាននូវសុខសន្តិភាព ស្ថិរភាពសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ដែលជាសសរស្តម្ភក្នុងការ អភិវឌ្ឍន៍លើគ្រប់វិស័យ។ ហេតុនេះកងកម្លាំងនគរបាលជាតិ ដែលជាកម្លាំងស្នូលក្នុងវិស័យសន្តិសុខ ត្រូវបន្ត បេសកកម្មរបស់ខ្លួនដោយឥតឈប់ឈរ សំដៅពង្រឹងឲ្យបាននូវមូលដ្ឋានគ្រឹះនៃការអភិវឌ្ឍន៍ប្រទេសជាតិ។ ខណៈពេលដូចគ្នានេះកងកម្លាំងនគរបាលជាតិដែលជា កម្លាំងអន្តរាគមន៍ គាំទ្រជួយដល់ការបង្ការទប់ស្កាត់ ការឆ្លងរាតត្បាតជំងឺកូវីដ-១៩ ក៏ត្រូវតែបន្តលះបង់ពេលវេលា និងកម្លាំងកាយពល រួមចំណែកការពារសុខភាព សាធារណៈ អាយុជីវិតប្រជាពលរដ្ឋ និងសង្គមជាតិ។
ជាមួយគ្នានេះ សម្តេចក្រឡាហោម ស ខេង ក៏បានសំដែងនូវការកោតសរសើរយ៉ាងស្មោះស្ម័គ្រចំពោះកិច្ចខិតខំប្រឹងប្រែង របស់កងកម្លាំងនគរបាលជាតិ ដែលបានចាត់តាំងអនុវត្តយ៉ាងផុលផុសតាមគោលការណ៍បទបញ្ជានិងវិធានការនានារបស់ រាជរដ្ឋាភិបាល ក្នុងការទប់ស្កាត់ការឆ្លងរាលដាលជំងឺកូវីដ-១៩ ហើយក៏ សូមក្រើនរំឭកដាស់តឿនដល់បងប្អូន សូមបន្តយកចិត្តទុកដាក់បំពេញភារកិច្ច ប្រកបដោយភាពអត់ធ្មត់ ប្រកាន់ខ្ជាប់នូវវិន័យ សីលធម៌ មានអាកប្បកិរិយាថ្លៃថ្នូរ ម៉ឺងម៉ាត់ប្រកបដោយមនសិការវិជ្ជាជីវៈ ជាពិសេស ត្រូវជៀសវាងការប្រើប្រាស់នូវអំពើហិង្សាក្នុងការដោះស្រាយបញ្ហា។ ទន្ទឹមគ្នានេះ ខ្ញុំសំណូមពរយ៉ាងទទូចឲ្យ មានការប្រុងប្រយ័ត្នខ្ពស់ចំពោះសុខភាពផ្ទាល់ខ្លួន និងក្រុមគ្រួសារ ដោយអនុវត្តយ៉ាងខ្ជាប់ខ្ជួនតាមវិធាន សុខាភិបាល និងវិធានការ « ៣ការពារ ៣កុំ » ឲ្យបានគ្រប់ៗគ្នា ដើម្បីធ្វើជាគំរូដល់សាធារណជន រួមចំណែក ការពារអាយុជីវិតពលរដ្ឋ និងសង្គមជាតិ៕ ដោយៈ ពលជ័យ