មនុស្សជិត ២.០០០ នាក់ ត្រូវបានសមត្ថកិច្ចឃាត់ខ្លួនដែលល្មើសបម្រាមគោចរនឹងបម្រាមបិទខ្ទប់ក្នុងរយះពេលមួយខែ
ភ្នំពេញ៖ មនុស្សជិត ២.០០០ នាក់ ត្រូវបានសមត្ថកិច្ចឃាត់ខ្លួនដែលល្មើសបម្រាមគោចរនឹងបម្រាមបិទខ្ទប់ក្នុងរយះពេលមួយខែ ដោយគិតចាប់ណីថ្ងៃទី១៥ មេសា ដល់ថ្ងៃទី១៥ ឧសភា ឆ្នាំ២០២១។ នេះបើតាមការបញ្ជាក់លោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ ។
លោកបានបន្តថា សមត្ថកិច្ចបានធ្វើការឃាត់ខ្លួនប្រជាពលរដ្ឋ ដែលបានល្មើសនឹងបម្រាមគោចរ និងបម្រាមបិទខ្ទប់របស់រាជរដ្ឋាភិបាលចំនួន១.៨៧៨នាក់ ក្នុងនោះតុលាការឃុំខ្លួនចំនួន១១នាក់ កំពុងសាកសួរនៅតុលាការ ចំនួន៣នាក់ ណែនាំអប់រំឲ្យវិលត្រឡប់ទៅលំនៅដ្ឋានវិញចំនួន ១.២៣៨ នាក់ បញ្ជួនទៅធ្វើចត្តាឡីស័កចំនួន២៨៩នាក់ ធ្វើការពិន័យអន្តរកាលចំនួន៣៣៣នាក់ និងបញ្ជួនទៅព្យាបាលជំងឺកូវីដ១៩ចំនួន៤នាក់។
លោកបន្ថែមថា ចំនួនមនុស្សដែលសមត្ថកិច្ចឃាត់ខ្លួននេះ ចែកជាពីរដំណាក់កាល ដោយ ទី១ការបិទខ្ទប់របស់រាជរដ្ឋាភិបាលនៅរាជធានីភ្នំពេញ និងក្រុងតាខ្មៅខេត្តកណ្តាល ចាប់ពីថ្ងៃទី១៥ ខែមេសារហូតដល់ ថ្ងៃទី៥ ឧសភា និងដំណាក់កាលទី២ ចាប់ពីថ្ងៃទី៦ ខែឧសភា រហូតដល់ថ្ងៃទី១៥ ខែឧសភា ដែលសាលារាជធានីភ្នំពេញ បានបន្តអនុវត្តបម្រាមគោចរចាប់ពីម៉ោង៨យប់រហូត ដល់ម៉ោង៣ទៀបភ្លឺ។
លោកបានបន្ថែមថា សមត្ថកិច្ចនៅតែបន្តអនុវត្តល្បាតតាមតំបន់ក្រហម តំបន់លឿងទុំ និងតំបន់លឿងជាប្រចាំ ពិសេសអនុវត្ត បម្រាមគោចរពេលយប់ ពីម៉ោង៨យប់ដល់ម៉ោង៣ទៀបភ្លឺ តាមបញ្ជាយ៉ាងម៉ឺងម៉ាត់របស់លោក ស ថេត ស្នងការនគរបាលរាជធានីភ្នំពេញ។ ក្នុងនោះមានការចល័តកងកម្លាំងសមត្ថកិច្ចរាល់យប់ នៅគ្រប់ខណ្ឌដែលដឹកនាំដោយស្នងការរង ដើម្បីត្រួតពិនិត្យការអនុវត្តបម្រាមគោលចរនេះ៕
