អង្គការ NASA ផ្ញើសារអបអរសាទរ ក្រោយយានបេសកកម្ម Tianwen-1របស់ប្រទេសចិន ចុះចតដោយជោគជ័យនៅលើផ្ទៃភពអង្គារ (មានវីដេអូ)
អាមេរិក៖ មន្រ្តីជាន់ខ្ពស់ទីភ្នាក់ងារអវកាសអាមេរិក ណាសា លោក ថូម៉ាស ហ្សឺប៊ូជែន បានផ្ញើសារអបអរសាទរ ក្រោយយានបេសកកម្ម ធានវិន-១ (Tianwen-1) របស់ប្រទេសចិន បានទទួលជោគជ័យក្នុងការចុះចតនៅលើផ្ទៃភពអង្គារ ។
តាមរយៈបណ្តាញសង្គម Twitter លោក ថូម៉ាស ហ្សឺប៊ូជែន បានបង្ហោះសារអបអរសាទរចំពោះក្រុមការងារបេសកម្ម ធានវិន-១ របស់ទីភ្នាក់ងារអវកាសចិន CNSA សម្រាប់ការចុះចតដោយជោគជ័យ នៃយានរ៉ូបូតចល័តដំបូងបំផុតរបស់ប្រទេសចិននៅលើផ្ទៃភពអង្គារ ឈ្មោះថា ជូរ៉ុង (Zhurong) ។ បន្ថែមលើនេះ លោក ថូម៉ាស ហ្សឺប៊ូជែន បានគូសបញ្ជាក់ផងដែរថា អង្គការ ណាសា នឹងទន្ទឹងរង់ចាំការចូលរួមចំណែកយ៉ាងសំខាន់ ដែលបេសកកម្មរបស់ចិននេះសម្រេចបាន ដើម្បីជាប្រយោជន៍ដល់ការយល់ដឹងនៃភពអង្គាររបស់មនុស្សជាតិយើង ។
សូមរំលឹកឡើងវិញថា កាលពីខែកុម្ភៈ ឆ្នាំ២០២១នេះ ទីភ្នាក់ងារអវកាសអាមេរិក បានចុះចតយានរ៉ូបូតចល័តថ្មីរបស់ខ្លួន ឈ្មោះថា ភើសឺវារ៉ិន (Perseverance) នៅលើផ្ទៃភពអង្គារ ។ ដោយឡែកសម្រាប់ចិនវិញ វាគឺជាលើកដំបូងបំផុតហើយ ដែលប្រទេសចិនមានយានអាចចុះចតដោយជោគជ័យលើភពផ្សេងទៀតក្រៅពីភពផែនដី ៕ ស៊ីនហួរ
![](https://asset.ams.com.kh/central/media/2021/05/np_file_87195-1024x684.jpeg)
![](https://asset.ams.com.kh/central/media/2021/05/china_mars_rover_-_plain-1024x576.jpg)
![](https://asset.ams.com.kh/central/media/2021/05/Spacecraft_China.jpg)