សេចក្តីរាយការណ៍បានបញ្ជាក់អោយដឹងថា ហេតុការណ៍នោះបានកើតឡើងនារសៀលថ្ងៃទី២៧​ ខែឧសភា​ ឆ្នាំ២០២១នេះ​ នៅភូមិចំការចេក​ ឃុំស៊ុង​ ស្រុកសំឡូត​ ខេត្តបាត់ដំបង​។ យោងតាមហ្វេសប៊ុកផេករបស់ អគ្គនាយកស៊ីម៉ាក់ លោកហេង រតនា បានអោយដឹងថា មានករណីគ្រោះថ្នាក់ផ្ទុះគ្រាប់មីនតោនសំណល់ពីសង្គ្រាម​ ដែលបណ្តាឱ្យស្លាប់ប្រជាពលរដ្ឋ​ម្នាក់និង​រងរបួសធ្ងន់ម្នាក់​ ព្រមទាំងបំផ្លាញគោយន្តមួយគ្រឿងទាំងស្រុង ខណៈពេលដែលជនរងគ្រោះកំពុងបើក​បរគោយន្តធ្វើដំណើរ ដើម្បីទៅកាត់ស្មៅឱ្យចំណីគោ។

គិតចាប់ពីខែមករា ដល់ខែឧសភា ឆ្នាំ២០២១ ក្រុមការងារ CMVIS បានចុះយកព័ត៌មាន នៅទីកន្លែងគ្រោះថ្នាក់ ដោយសារមីន និងសំណល់ជាតិផ្ទុះពីសង្គ្រាម ដែលមានឧប្បត្តិហេតុគ្រោះថ្នាក់ ២១លើក និងមានប្រជាពលរដ្ឋចំនួន ២៤នាក់បានរងគ្រោះ​ដោយ​សារមីន និងសំណល់ជាតិផ្ទុះពីសង្គ្រាម តួលេខនេះបានថយចុះ ២៥% ប្រៀបធៀបនឹងរយៈពេលដូចគ្នានៅឆ្នាំ២០២០។

ដើម្បីចូលរួមកាត់បន្ថយអត្រាគ្រោះថ្នាក់ ដោយសារមីន និងសំណល់ជាតិផ្ទុះពីសង្គ្រាម ក្រុមការងារ CMVIS បានចុះផ្តល់​សារ​អប់រំ កាត់បន្ថយគ្រោះថ្នាក់ ដោយសារយុទ្ធភណ្ឌគ្រឿងផ្ទុះ ដល់ប្រជាពលរដ្ឋចំនួន ១ពាន់៧១៥នាក់ ដែលកំពុងរស់នៅ តាម​តំបន់​ដែលមានហានិភ័យ ដោយសារមីន និងសំណល់ជាតិផ្ទុះពីសង្គ្រាម។ ជាមួយគ្នាផងដែរ CMVIS បានរាយការណ៍ផ្តល់​ព័ត៌មាន ពីទីតាំងគ្រាប់ នៅតាមមូលដ្ឋានបានចំនួន ៥៦គ្រាប់ ទៅប្រតិបត្តិករសកម្មភាពមីន ដើម្បីយកចេញ និងកម្ទេច​ចោល៕