អតីតមន្ត្រីជាន់ខ្ពស់ៈតើមូលនិធិជាង ៧០ម៉ឺនដុល្លារសម្រាប់បង្កើតទូរទស្សន៍ព្រះអាទិត្យនៅឯណា?
ភ្នំពេញៈ លោកមុត ចន្ថា អតីតប្រធានខុទ្ទកាល័យលោកកឹម សុខា ដែលទើបទទួលបានសិទ្ធិធ្វើនយោបាយបានបង្ហាញ នូវការយល់ឃើញថា ដើម្បីជួយពលរដ្ឋខ្មែរឱ្យទាន់ពេលវេលាក្នុងវិបត្តិចំពោះមុខគួរតែឱ្យលោក យឹម សុវណ្ណ និងលោក គី វណ្ណដារ៉ា បង្វែរថវិការបស់ទូរទស្សន៍ព្រះអាទិត្យជាង ៧០ម៉ឺនដុល្លារ ដែលជាថវិកាបានមកពីការបរិច្ចាគរបស់ប្រជាពលរដ្ឋ ដើម្បីយកមកជួយពួកគាត់វិញ។
លោក មុត ចន្ថា បានសរសេរនៅលើគណនីហ្វេសប៊ុកផ្ទាល់ខ្លួនថា នៅថ្ងៃទី២៧ ខែមិថុនា ឆ្នាំ២០១៥ គណបក្សសង្គ្រោះ ជាតិ បានបើកប្រមូលជំនួយពីសាធារណជន ដើម្បីគាំទ្រគម្រោងរបស់គណបក្សសង្គ្រោះជាតិនូវមូលនិធិបង្កើត«ទូរទស្សន៍ ព្រះអាទិត្យ» ឬ “SUNTV”។គិតត្រឹមខែកញ្ញាឆ្នាំ២០១៥គណបក្សសង្គ្រោះជាតិប្រមូលបានថវិកាដែលបានមកពីការបរិច្ចាគ ថវិកាផ្ទាល់ខ្លួនរបស់ប្រជាពលរដ្ឋខ្មែរជាង៧០ម៉ឺនដុល្លារអាមេរិក។ នៅក្រោយលោក កឹម សុខា ត្រូវបានចាប់ខ្លួននិងបន្តមក ទៀតគណបក្សសង្គ្រោះជាតិ ត្រូវរំលាយដោយតុលាការកំពូលនៅថ្ងៃទី១៦ខែវិច្ឆិកាឆ្នាំ២០១៧តាមបណ្តឹងរបស់គណបក្ស ហ្វ៊ុនស៊ិនប៉ិច និងគណបក្សយុវជនកម្ពុជារួចមក ថវិការបស់គណបក្ស និងមូលនិធិបង្កើតទូរទស្សន៍ព្រះអាទិត្យត្រូវបានដក ចេញពីគណនីធនាគារស្ងាត់បាត់ឈឹង។
លោកបានបញ្ជាក់ថា មន្ត្រីជាន់ខ្ពស់នៃគណបក្សសង្គ្រោះជាតិ ០៣រូប ដែលមានសិទ្ធិចុះហត្ថលេខាលើ Chequeដើម្បីដក ប្រាក់ពីធនាគារ គឺ១. លោក កឹម សុខា ប្រធានគណបក្ស, ២. លោក យឹម សុវណ្ណប្រធានគណៈកម្មការធិការប្រតិបត្តិ គណបក្ស និង៣. លោក គី វណ្ណដារ៉ា អគ្គហិរញ្ញឹកគណបក្ស។ ប៉ុន្តែខណៈដែលលោក កឹម សុខាកំពុងជាប់ឃុំនៅ ពន្ធនាគារត្រពាំងថ្លុង ខេត្តត្បូងឃ្មុំ គឺមានតែលោក យឹម សុវណ្ណ និងលោក គី វណ្ណដារ៉ា ប៉ុណ្ណោះដែលមានសិទ្ធិចុះ ហត្ថលេខាដកប្រាក់ទាំងអស់ពីគណនីធនាគារ។
លោកមុត ចន្ថា បានបន្តថា “ខ្ញុំឃើញលោក សម រង្ស៉ី អតីតប្រធានគណបក្សសង្គ្រោះជាតិ បាននិងកំពុងលក់ប័ណ្ណនាឡិកា ដោយអះអាងថា ដើម្បីយកថវិកាមកជួយពលរដ្ឋខ្មែរដែលរងគ្រោះដោយជំងឺកូវីដ-១៩ នៅប្រទេសកម្ពុជា។ ខ្ញុំយល់ថា ដើម្បីជួយពលរដ្ឋខ្មែរឱ្យទាន់ពេលវេលាក្នុងវិបត្តិចំពោះមុខ គួរតែឱ្យលោក យឹម សុវណ្ណ និងលោក គី វណ្ណដារ៉ាបង្វែរថវិកា របស់ទូរទស្សន៍ព្រះអាទិត្យ ដែលជាថវិកាបានមកពីការបរិច្ចាគរបស់ប្រជាពលរដ្ឋ ដើម្បីយកមកជួយពួកគាត់វិញ។ ម្យ៉ាងវិញទៀត ថវិកាជាង ៣០ម៉ឺន ដុល្លារ ដែលប្រមូលបានពីផែនការមាតុភូមិនិវត្តន៍ ៩ វិច្ឆិកា ២០១៩គួរបញ្ចេញមកជួយ ប្រជាពលរដ្ឋខ្មែរដែលកំពុងរងគ្រោះដោយរោគរាតត្បាតកូវីដ-១៩។ លោក យឹម សុវណ្ណ និងលោក គី វណ្ណដារ៉ា គួរតែចេញមុខមកបញ្ជាក់ដល់ម្ចាស់មូលនិធិទូរទស្សន៍ព្រះអាទិត្យ គឺប្រជាពលរដ្ឋខ្មែរ តើថវិកាជាង ៧០ម៉ឺនដុល្លារ នៅឯណា ដោយមិនគិតពីលុយរបស់គណបក្ស?”។
លោកមុត ចន្ថា បានបញ្ជាក់បន្ថែមប្រាប់ AMS នៅព្រឹកថ្ងៃទី២៨ ខែឧសភានេះថា ថវិកាបរិច្ចាគរបស់ប្រជាពលរដ្ឋ សម្រាប់គោលបំណងជាក់លាក់ គឺ”បង្កើតស្ថានីយព្រះអាទិត្យ” ត្រូវតែប្រើប្រាស់ឱ្យបានត្រឺមត្រូវ។បើសិនជាថវិកានោះ មិនត្រូវបានត្រូវប្រើប្រាស់ឱ្យបានត្រឹមត្រូវស្របតាមគោលបំណងជាក់លាក់ ដោយតម្លាភាព សុចរិតភាពឬត្រូវបាត់បង់ ដោយប្រការណាមួយ អ្នកគ្រប់គ្រងថវិកា ឬមូលនីធិនោះត្រូវតែទទួលខុសត្រូវចំពោះមុខប្រជាពលរដ្ឋនិងអាចប្រឈមផ្លូវ ច្បាប់។គេមិនអាចយកថវិកាទៅប្រើប្រាស់សម្រាប់គោលបំណងផ្សេងឡើយព្រោះប្រជាពលរដ្ឋរាប់ម៉ឺននាក់បានឧត្ថម្ភសម្រាប់តែគោលមួយនេះ។ ថវិកានេះគួរតែបង្វែរទៅមូលនិធិមនុស្ស ដូចជាមន្ទីរពេទ្យគន្ធបុប្ផា មន្ទីរពេទ្យកុមារអង្គរ ឬប្រជាពលរដ្ឋដែលកំពុងរងគ្រោះដោយជំងឺកូវីដ-១៩។
ទាក់ទងការលើកឡើងខាងលើនេះ លោក យឹម សុវណ្ណ និងលោក គី វណ្ណដារ៉ា មិនអាចសុំការបំភ្លឺបានទេ៕ ដោយៈពលជ័យ
