យោងតាមស្នងការដ្ឋាននគរបាលខេត្តបាត់ដំបង បានឲ្យដឹងថា ការបង្ក្រាបនោះ ធ្វើឡើងនៅម៉ោង៣ទៀបភ្លឺឈានចូលថ្ងៃទី១១មិថុនាឆ្នាំ២០២១ នៅចំណុចភូមិអូរស្ងួត ឃុំសន្តិភាពស្រុកសំពៅលូន ខេត្តបាត់ដំបង។ ក្នុងប្រតិបត្តិការនោះ សមត្ថកិច្ចបានឃាត់ខ្លួនជនសង្ស័យ ចំនួន៣នាក់ រួមមានឈ្មោះ ជួន ណារីនភេទប្រុស អាយុ២២ឆ្នាំ, ឈ្មោះ ស៊ុយ ពិសិទ្ធ ភេទប្រុស អាយុ២២ឆ្នាំ និងឈ្មោះ សែម សុខមាន ភេទប្រុស អាយុ៣៥ឆ្នាំ។ អ្នកទាំង៣រស់នៅ ឃុំបឹងរាំង ស្រុកកំរៀង ខេត្តបាត់ដំបង។ ជាមួយគ្នានោះ សមត្ថកិច្ចរឹបអូសបានថ្នាំញៀនប្រភេទមេតំហ្វេតាមីន ម៉ាទឹកកកICE ចំនួន៨ថង់ ទម្ងន់១ពាន់១៣៨ក្រាម៩៧មីលីក្រាម,
មេតំហ្វេតាមីនយ៉ាម៉ាWYចំនួន២៨គ្រាប់ទម្ងន់២ក្រាម៤០មីលីក្រាម និងវត្ថុតាងមួយចំនួនទៀត។ ក្រោយការឃាត់ខ្លួន សមត្ថកិច្ចកសាងសំណុំរឿង ដើម្បីចាត់ការតាមនីតិវិធីច្បាប់៕