ពលរដ្ឋថៃភាគច្រើនថា រដ្ឋាភិបាលចាក់វ៉ាក់សាំងកូវីដមិនជោគជ័យតាមផែនការ បើតាមការស្ទង់មតិ
ប្រជាជនភាគច្រើនមិនមានទំនុកចិត្តលើកម្មវិធីចាក់វ៉ាក់សាំងកូវីដ១៩ របស់រដ្ឋាភិបាល ហើយយល់ឃើញថា គោលដៅថាចាក់ឲ្យបានមនុស្ស៥០លាននាក់ ជាមួយនឹងវ៉ាក់សាំង១០០លានដូស ត្រឹមចុងឆ្នាំ២០២១នេះ គឺទំនងមិនទទួលជោគជ័យទេ នេះបើតាមលទ្ធផលនៃការស្ទង់មតិមួយ ស្រាវជ្រាវដោយសកលវិទ្យាល័យ Suan Dusit Rajabhat ឬ ហៅគេហៅថា ការស្ទង់មតិ Suan Dusit Poll ចេញផ្សាយដោយទីភ្នាក់ងារបាងកកប៉ុស្តិ៍ នាព្រឹកថ្ងៃទី១៣ មិថុនា ២០២១នេះ។
ប្រភពថា ការស្ទង់មតិនេះគឺធ្វើឡើងតាមរយៈអនឡាញ ចាប់ពីថ្ងៃទី៧ ដល់ ១០ មិថុនា លើមនុស្ស១៤៥០នាក់ ទូទាំងប្រទេស។ ការស្ទង់មតិបានលើកហេតុផលថា មូលហេតុដែលមិនជឿជាក់ដូចជា ជម្រើសវ៉ាក់សាំងដែលត្រូវចាក់មានតិច ព័ត៌មានមិនច្បាស់លាស់នាំឲ្យភាន់ច្រលំ និងកង្វះខាតតួនាទីខាងវិស័យឯកជនចូលរួមនាំចូលវ៉ាក់សាំង ជាដើម។
គួរបញ្ជាក់ថា ថៃបានចាប់ផ្តើមចាក់វ៉ាក់សាំងបង្ការជំងឺកូវីដ១៩ តាំងពីថ្ងៃទី១១ មីនា ២០២១ ដោយប្រើប្រាស់វ៉ាក់សាំងចិន និងអង់គ្លេស ហើយគិតត្រឹមថ្ងៃទី១០ មិថុនា ចាក់បានប្រមាណជាង៤លាននាក់ ដូសទី១ និងដូសទី២ បានជាង១.៥លាននាក់៕