របកគំហើញថ្មី! អ្នកវិទ្យាសាស្រ្តអូស្រ្តាលីទើបរកឃើញបំណែកឆ្អឹងសត្វដាយណូស័រប្រភេទថ្មីធំជាងគេបំផុតនៅលើពិភពលោក (មានវីដេអូ)
អូស្ត្រាលី៖ បំណែកឆ្អឹងសត្វដាយណូស័រប្រភេទថ្មីមួយ ត្រូវបានក្រុមអ្នកវិទ្យាសាស្ត្ររកឃើញនៅក្នុងប្រទេសអូស្ត្រាលី ដែលវាជាប្រភេទមួយដែលធំជាងគេបំផុតនៅលើពិភពលោកក្នុងរយៈពេលជាងមួយទសវត្សរ៍មកនេះ ។
បើតាមអ្នកជំនាញខាងផ្នែកសារមន្ទីរ និងស្រាវជ្រាវសត្វនៅសារមន្ទីរឃ្វីនលែន លោក Scott Hocknull របកគំហើញនេះ គ្រាន់តែជាព័ត៌មានជំនួយប៉ុណ្ណោះ ខណៈដែលក្រុមអ្នកជំនាញផ្នែកសត្វពីបុរាណ បានដាក់ឈ្មោះប្រភេទនេះថា “Otitan Coorensis” ។ ក្រុមអ្នកជំនាញបានសន្និដ្ឋានថា ដាយណូស័រប្រភេទនេះ មានកម្ពស់៥ទៅ៦.៥ ម៉ែត្រ និងមានប្រវែង២៥ទៅ៣០ម៉ែត្រ ជាប្រវែងដូចទៅនឹងទីលានបាល់បោះ និងមានកម្ពស់ដូចអាគារកម្ពស់ពីរជាន់ដែរ ធ្វើឱ្យវាក្លាយជាប្រភេទសត្វដាយណូស័រថ្មីធំបំផុតមិនធ្លាប់មាននៅក្នុងប្រទេសអូស្ត្រាលី និងស្ថិតក្នុងលំដាប់កំពូលទាំង៥ នៅលើពិភពលោក ។
យោងតាមឯកសារស្រាវជ្រាវបង្ហាញថា ដាយណូស័រស៊ីរុក្ខជាតិនេះ បានរស់នៅក្នុងសម័យ Cretaceous ចន្លោះពី៩២លានទៅ៩៦លានឆ្នាំមុន នៅពេលដែលប្រទេសអូស្ត្រាលីជាប់នឹងតំបន់ Antartica ៕ ប្រភព៖ Ajazeera