ក្រុមហ៊ុន AstraZeneca បរាជ័យក្នុងការសាកល្បងព្យាបាលជំងឺកូវីដ១៩ដោយឱសថរបស់ខ្លួន
អង់គ្លេស៖ ក្រុមហ៊ុន AstraZeneca (AZN.L) បាននិយាយនៅក្នុងសេចក្តីថ្លែងការណ៍មួយនៅថ្ងៃអង្គារនេះថា ឱសថដែលត្រូវបានផលិតដោយការបញ្ចូលគ្នាអង់ទីគ័រពីរប្រភេទមិនបានជោគជ័យតាមគោលបំណងសំខាន់របស់ខ្លួន សម្រាប់ការព្យាបាលអ្នកជំងឺកូវីដ១៩ឡើយ ។
ការព្យាបាលបានកំពុងធ្វើឡើងដល់ដំណាក់កាលទី៣ ឬការសាកល្បងព្យាបាលដំណាក់កាលចុងក្រោយ ដើម្បីវាយតម្លៃពីសុវត្ថិភាព និងប្រសិទ្ធភាពរបស់ថ្នាំ ។ ក្រុមហ៊ុន AstraZeneca បានឲ្យដឹងថា មនុស្សធំពេញវ័យដែលមិនទាន់បានចាក់វ៉ាក់សាំង១ពាន់១២១នាក់ដែលបានប៉ះពាល់ជាមួយអ្នកឆ្លងកូវីដ១៩ក៏ជាផ្នែកមួយនៃការសាកល្បងក្នុងការព្យាបាលនេះដែរ ។
បើតាមសេចក្តីថ្លែងការណ៍ខាងលើនេះ ការព្យាបាលថ្នាំដោយ AZD7442 បានកាត់បន្ថយហានិភ័យនៃអាការរោគកំពុងវិវត្តបានតែ៣៣ភាគរយប៉ុណ្ណោះ ដែលមិនទាន់ដល់លទ្ធផលដែលចង់បានឡើយ ។ ទោះបីជាយ៉ាងណា ក្រុមហ៊ុននៅតែបន្តសាកល្បងព្យាបាលទៀត ដើម្បីវាយតម្លៃថាតើថ្នាំរបស់ខ្លួនអាចការពារកូវីដ១៩ ឬព្យាបាលរោគសញ្ញាធ្ងន់ធ្ងរបានអត់ ៕ ប្រភព៖ Reuters
