តាលីបង់ធ្វើឃាតអាកាសយានិកយោធាអាហ្វហ្គានីស្ថាន ខណៈពេលអាមេរិកបន្តការដកខ្លួន
វរសេនីយ៍ត្រីកងទ័ពអាកាសអាហ្វហ្គានីស្ថានលោក Dastagir Zamaray កាន់តែមានការភ័យខ្លាចចំពោះការធ្វើឃាតកងកម្លាំងយោធានៅក្រៅមូលដ្ឋានទ័ពដោយក្រុមឧទ្ទាមតាលីបង់ រហូតដល់ថ្នាក់រូបលោកសម្រេចលក់គេហដ្ឋានរបស់លោកនៅរដ្ឋធានីកាប៊ុល ដើម្បីប្ដូរទីលំនៅទៅរស់នៅតំបន់ដែលមានសុវត្ថិភាពជាងនេះ។
កាលពីដើមឆ្នាំនេះ ជំនួសនឹងការជួបជាមួយអ្នកមានបំណងទិញគេហដ្ឋានរបស់លោកនៅការិយាល័យភ្នាក់ងារអចលនទ្រព្យ អាកាសយានិកអាយុ ៤១ ឆ្នាំរូបនេះ បានប្រឈមនឹងខ្មាន់កាំភ្លើងម្នាក់ដែលបានដើរចូលទៅខាងក្នុង ហើយដោយគ្មានសំដីណាមួយ បានបាញ់សម្លាប់ភ្នាក់ងារអចលនទ្រព្យ។ លោក Zamaray បានដកកាំភ្លើងខ្លីរបស់លោកដើម្បីបាញ់តប ប៉ុន្តែខ្មាន់កាំភ្លើងបានបាញ់លោកចំក្បាល ធ្វើឱ្យស្លាប់ភ្លាមៗ។
ក្នុងរយៈពេលប៉ុន្មានខែចុងក្រោយនេះ យ៉ាងហោចណាស់អាកាសយានិកយោធាអាហ្វហ្គានីស្ថានចំនួន ៧ រូប រួមទាំងលោក Zamaray ត្រូវបានគេធ្វើឃាត ពេលដែលពួកគេសម្រាកនៅក្រៅមូលដ្ឋានកងទ័ព នេះបើតាមមន្ត្រីជាន់ខ្ពស់រដ្ឋាភិបាលអាហ្វហ្គានីស្ថានពីររូបបានប្រាប់សារព័ត៌មានរ៉យទ័រ។
ការធ្វើឃាតលើគោលដៅទាំងនេះ ដែលមិនធ្លាប់កើតឡើងរហូតដល់កម្រិតនេះ មុនការចាប់ផ្ដើមការដកទាហានរបស់អាមេរិក បង្ហាញពីការសង្ស័យរបស់រដ្ឋាភិបាលអាហ្វហ្គានីស្ថានអំពីការខិតខំប្រឹងប្រែងរបស់តាលីបង់ដើម្បីបំផ្លាញផ្នែកដ៏សំខាន់ និងមានតម្លៃបំផុតរបស់យោធាអាហ្វហ្គានីស្ថានគឺ ធនធានអាកាសយានិកយោធាដែលទទួលការបណ្ដុះបណ្ដាលពីអាមេរិក និងអង្គការណាតូ។
អ្នកនាំពាក្យតាលីបង់លោក Zabihullah Mujahid បានបញ្ជាក់សារព័ត៌មានរ៉យទ័រ ថាពួកគេពិតជាបានសម្លាប់លោក Zamaray មែន ហើយពួកគេបានចាប់ផ្ដើមប្រតិបត្តិការដែលនឹងធ្វើឱ្យអាកាសយានិកយោធាអាហ្វហ្គានីស្ថានត្រូវបាន «កម្ចាត់ទាំងស្រុង ពីព្រោះពួកគេទាំងអស់បានទម្លាក់គ្រាប់បែកប្រឆាំងនឹងប្រជាជនខ្លួន»។
ក្នុងការធ្វើដូច្នេះ ក្រុមតាលីបង់ ដែលគ្មានកងទ័ពអាកាស គឺកំពុងសម្លឹងទៅរកការកាត់បន្ថយសមត្ថភាពយោធាអាហ្វហ្គានីស្ថាន ខណៈពេលដែលពួកគេបើកការវាយលុកជើងគោកដ៏ធំ។ ក្រុមឧទ្ទាមនេះ បានធ្វើការដណ្ដើមយកដែនដី គ្រប់គ្រងដោយរដ្ឋាភិបាលដែលគាំទ្រដោយសហរដ្ឋអាមេរិករបស់ប្រធានាធិបតី Ashraf Ghani យ៉ាងរហ័ស ធ្វើឱ្យមានការកើនឡើងការព្រួយបារម្ភថាក្រុងកាប៊ុលអាចដួលរលំ។
រួមជាមួយកម្លាំងពិសេសអាហ្វហ្គានីស្ថានកងទ័ពអាកាសអាហ្វហ្គានីស្ថាន គឺជាសសរស្ដម្ភដ៏សំខាន់មួយនៃយុទ្ធសាស្ត្រទប់ស្កាត់ការដណ្ដើមកាន់កាប់ទីក្រុងធំៗដោយតាលីបង់។ ពួកគេអាចធ្វើវាយប្រហារទៅលើកម្លាំងតាលីបង់ដែលកំពុងប្រមូលផ្ដុំសម្រាប់ធ្វើការវាយប្រហារ ដឹកជញ្ជូនកងកុម្ម៉ង់ដូដើម្បីបំពេញបេសកកម្ម និងផ្ដល់ជំនួយតាមអាកាសដែលអាចជួយសង្គ្រោះអាយុជីវិតដល់កងទ័ពជើងគោកអាហ្វហ្គានីស្ថាន។
អាកាសយានិកយោធាអាហ្វហ្គានីស្ថានគឺជាគោលដៅសម្រាប់ឃាតដ៏គួរទាក់ទាញ។ អាកាសយានិកនីមួយៗ ត្រូវការរយៈពេលជាច្រើនឆ្នាំសម្រាប់ការបណ្ដុះបណ្ដាល ហើយពិបាកនឹងជំនួស ដោយការបាត់បង់នីមួយៗតំណាងឱ្យការបាត់បង់ដ៏ធំសម្រាប់សមត្ថភាពការពារជាតិរបស់ប្រទេសនេះ។
បើតាមទិន្នន័យរបស់អាមេរិក អាហ្វហ្គានីស្ថានមានអាកាសយានិកយោធាត្រឹមតែ ៣៣៩ នាក់ និងយន្តហោះចំនួន ១៦០ គ្រឿងដែលរួមឧទ្ធម្ភាគចក្រ UH-60 Black Hawk, យន្តហោះដឹកជញ្ជូន C-130H, យន្តហោះវាយប្រហារធុនស្រាល A-29 Super Tucano, យន្តហោះAC-208, ឧទ្ធម្ភាគចក្រ MD-530 និងឧទ្ធម្ភាគចក្រដឹកជញ្ជូន Mi-17 ដែលផលិតដោយរុស្សីនិងឧបត្ថម្ភថវិកាដោយអាមេរិក។ យន្តហោះទាំងនេះត្រូវបានថែរក្សា និង ជួសជុលដោយអ្នកម៉ៅការស៊ីវិល ដែលឧបត្ថម្ភថវិកាដោយសហរដ្ឋអាមេរិក។
របាយការណ៍របស់ក្រសួងការពារជាតិអាមេរិកមួយកាលពីឆ្នាំ២០២០ បានព្យាករថាប្រសិទ្ធភាពការប្រយុទ្ធរបស់យន្តហោះទាំងនេះនឹងត្រូវបាត់បង់ ក្នុងរយៈពេលត្រឹមតែប៉ុន្មានខែប៉ុណ្ណោះប្រសិនបើ អ្នកម៉ៅការស៊ីវិលទាំងនេះចាកចេញជាមួយកងទ័ពអាមេរិក។ មកដល់ពេលនេះក្រសួងការពារជាតិអាមេរិកមិនបានបញ្ជាក់ថាតើអ្នកម៉ៅការស៊ីវិលនឹងបន្តធ្វើការឱ្យកងទ័ពអាកាសអាហ្វហ្គានីស្ថានដែរ ឬទេ។
ចាប់តាំងពីការប្រកាសដកកងទ័ពអាមេរិកកាលពីខែមេសាមក ក្រុមតាលីបង់បានបើកការវាយប្រហារដ៏ធំ ហើយក្នុងរយៈពេលដ៏ខ្លីពួកគេបានចូលកាន់កាប់ដែនដីជាច្រើនក្នុងប្រទេសនេះ។ តំណាងក្រុមតាលីបង់បានអះអាងថាពួកគេបានចូលកាន់កាប់ ៨៥% នៃប្រទេសអាហ្វហ្គានីស្ថាន។ កាលពីថ្ងៃសៅរ៍ តាលីបង់បានចូលកាន់កាប់ច្រកព្រំដែនដ៏សំខាន់ចំនួនពីរ ជាមួយនឹងអ៊ីរ៉ង់ និងតួកមេនីស្ថាន។ កាលពីថ្ងៃសុក្រ ប្រទេសរុស្សីបាននិយាយថាតាលីបង់បានចូលកាន់កាប់ពីរភាគបីនៃតំបន់ព្រំដែនអាហ្វហ្គានីស្ថាន ជាមួយតាហ្ស៊ីគីស្ថាន។
ការដកខ្លួនចេញរបស់អាមេរិក បានបង្កឈឺក្បាលយ៉ាងខ្លាំងសម្រាប់រុស្សី ដែលភ័យខ្លាចថាការកើនឡើងការប្រយុទ្ធគ្នានៅអាហ្វហ្គានីស្ថានអាចកំពប់ទៅលើប្រទេសជិតខាង ហើយបង្កភាពចលាចលនៅក្នុងអតីតរដ្ឋសហភាពសូវៀតក្នុងតំបន់អាស៊ីកណ្ដាល ដែលធ្លាប់ឆ្លងកាត់សង្គ្រាមស៊ីវិលជុំវិញក្រុមជ្រុលនិយមសាសនា។ បើសិនក្រុមតាលីបង់ចូលកាន់អំណាចវិញ ប្រទេសអាហ្វហ្គានីស្ថានអាចនឹងក្លាយជាមូលដ្ឋានភេរវកម្មដ៏ធំមួយក្នុងពិភពលោក ដែលនៅមាត់ទ្វារខាងត្បូងរបស់ប្រទេសរុស្សី។
ប្រធានាធិបតីអាមេរិកលោកចូ បៃដិនបានការពារការសម្រេចចិត្តរបស់រដ្ឋបាលលោកក្នុងការដកខ្លួនរបស់អាមេរិកចេញពីសង្គ្រាមជិត ២០ ឆ្នាំនេះថា៖ «ខ្ញុំនឹងមិនបញ្ជូនជនជាតិអាមេរិកជំនាន់ថ្មីទៅធ្វើសង្គ្រាមនៅប្រទេសអាហ្វហ្គានីស្ថាន ដោយគ្មានការរំពឹងទុកសមហេតុផលថានឹងទទួលបានលទ្ធផលថ្មីទេ»។ ប៉ុន្តែលោកបានទទួលស្គាល់ថារដ្ឋាភិបាលអាហ្វហ្គានីស្ថានមិនអាចគ្រប់គ្រងប្រទេសបានមួយរយភាគរយទេ។
យ៉ាងណាមិញ កិច្ចចរចាសន្តិភាពរវាងរដ្ឋាភិបាល និងក្រុមតាលីបង់នៅតែបន្ត ប៉ុន្តែកិច្ចពិភាក្សាបានជាប់គាំងជាប្រចាំ និងបរាជ័យក្នុងការរីកចម្រើនគួរឱ្យកត់សម្គាល់។
