ភ្នំពេញ ៖ បុរសម្នាក់ត្រូវរថយន្តឡង់គ្រីស័រកិនបែកក្បាលស្លាប់ភ្លាមៗនៅនិងកន្លែង កេីតហេតុ បន្ទាប់ពីជិះម៉ូតូចេញពីលេងកូន បានទាក់ដៃចង្កូតជាមួយរថយន្តបណ្ដាលឲ្យដួលមកកណ្ដាលផ្លូវ កាលពីវេលាម៉ោង១០ និង២០នាទីយប់ ថ្ងៃទី២០ ខែកក្កដា ឆ្នាំ ២០២១ នៅតាមបណ្ដោយផ្លូវបេតុងព្រៃសរ ក្នុងភូមិប្រការ សង្កាត់ព្រៃសរ ខណ្ឌដង្កោ រាជធានីភ្នំពេញ ។
សពជនរងគ្រោះមានឈ្មោះ អុី ឌូ ភេទប្រុស អាយុ៣០ឆ្នាំ មុខរបបកម្មកររោងចក្រ ស្នាក់នៅភូមិប្រការ សង្កាត់ព្រៃសរ ខណ្ឌដង្កោ ។

  បេីតាមប្រភពព័ត៌មានពីប្រជាពលរដ្ឋបានឲ្យដឹងថា  មុនពេលកេីតហេតុ  ជនរងគ្រោះបានជិះម៉ូតូមួយគ្រឿងម៉ាក  SUZUKI Lets  ពណ៌សលាយខៀវ  ពាក់ស្លាកលេខ ភ្នំពេញ  1HG-8009 មកលេងកូនប្រុសអាយុ៣ឆ្នាំដែលនៅជាមួយម្ដាយមីងក្បែរកន្លែងកេីតហេតុ  រួចក៏ត្រឡប់មកផ្ទះវិញនៅម្ដុំវត្តឬស្សីសាញ់  ខណៈជនរងគ្រោះជិះចេញបានប្រហែល១០០ម៉ែត្រក៏បានទាក់ដៃចង្កូតជាមួយរថយន្តឡង់គ្រីស័រមួយគ្រឿងមិនចាំស្លាកលេខ  បណ្ដាលឲ្យដួលចូលក្រោមកង់រថយន្តកិនចំក្បាលបែកស្លាប់ក្នុងថ្លុកឈាមយ៉ាងអាណោចអាធម៏   ចំណែករថយន្តបង្កបានបេីកគេចបាត់ស្រមោលពីកន្លែងកេីតហេតុ  ។ 

 ក្រោយកេីតហេតុ  សមត្ថកិច្ចមូលដ្ឋានបានចុះមកដល់  រួចទាក់ទងទៅជំនាញចរាចរណ៍ឲ្យមកធ្វេីការវាស់យកម៉ូតូជនរងគ្រោះទៅរក្សាទុកនៅអធិការដ្ឋាននគរបាលខណ្ឌដង្កោ  ជាបណ្ដោះអាសន្ន  រង់ចាំស្រាវជ្រាវរករថយន្តបង្កមកដោះស្រាយតាមច្បាប់  ។ ចំណែកសពជនរងគ្រោះ  សមត្ថកិច្ចជំនាញបានធ្វេីកំណត់ហេតុប្រគល់ឲ្យទៅក្រុមគ្រួសារយកទៅវត្តឬស្សីសាញ់  ដេីម្បីធ្វេីបុណ្យតាមប្រពៃណី  ៕  ដោយ  ៖  ជីម  ភារ៉ា