លោក ប្រាយុទ្ធ ចាន់អូចា ដឹកនាំកិច្ចប្រជុំជាមួយប្រធានក្រុមហ៊ុនធំៗរបស់ថៃ ដើម្បីដោះស្រាយវិបត្តិកូវីដ-១៩ (មានវីដេអូ)
ថៃ៖ នាយករដ្ឋមន្ត្រីថៃលោក ប្រាយុទ្ធ ចាន់អូចា នៅថ្ងៃពុធនេះ នឹងជួបប្រជុំជាមួយនាយកប្រតិបត្តិក្រុមហ៊ុនប្រេង និងហ្គាស PTT Plc និងក្រុមហ៊ុន King Power Group ព្រមទាំងនាយកប្រតិបត្តិឈានមុខ៤០រូបទៀត ស្ថិតក្នុងគោលបំណងជជែកពិភាក្សាអំពីស្ថានការណ៍ជំងឺកូវីដ១៩ និងផលប៉ះពាល់សេដ្ឋកិច្ចមកលើប្រទេស ។
ការកោះប្រជុំបន្ទាន់ខាងលើនេះ បានកើតឡើងស្របពេលដែលប្រទេសថៃធ្លាក់ក្នុងវិបត្តិសុខភាពធ្ងន់ធ្ងរដោយសារការឆ្លងរីករាលដាលនៃជំងឺកូវីដ១៩ កើនឡើងដល់ជាង១ម៉ឺនករណីក្នុងប៉ុន្មានថ្ងៃជាប់ៗគ្នា ។ ក្នុងការផ្ទុះជំងឺកូវីដ១៩នៅរលកទី៣ក្នុងប្រទេសថៃ ដែលចាប់ផ្តើមកាលពីថ្ងៃទី១ ខែមេសាមក មានមនុស្ស៤១ម៉ឺន៦១៤នាក់បានឆ្លង និង៣ពាន់៥១៦នាក់បានបាត់បង់ជីវិត ។
យោងតាមកាលវិភាគការងាររបស់រដ្ឋាភិបាល លោកនាយករដ្ឋមន្រ្តី ប្រាយុទ្ធ នឹងជួបប្រជុំផ្ទាល់នៅម៉ោង០២រសៀលជាមួយក្រុមតំណាងក្រុមហ៊ុន PTT Plc និង នាយកប្រតិបត្តិក្រុមហ៊ុន King Power Group ដែលបានស្នើសុំផ្តល់ជំនួយ ដើម្បីគាំទ្រការប្រយុទ្ធប្រឆាំងរបស់រដ្ឋាភិបាលទល់នឹងវីរុសកូវីដ១៩ ។ នៅម៉ោង២៖២០នាទីរសៀលថ្ងៃដដែល លោក ប្រាយុទ្ធ នឹងធ្វើការប្រជុំតាមវីដេអូបន្តផ្ទាល់ជាមួយនាយកប្រតិបត្តិ៤០រូប ដើម្បីពិភាក្សារកវិធីទប់ស្កាត់ជំងឺកូវីដ១៩ និងបញ្ហាពាក់ព័ន្ធ ៕ ប្រភព៖ Bangkok Post
