ភ្នំពេញ ៖ បុរសម្នាក់សង្ស័យស្រវឹងស្រាបើករថយន្តម៉ាកCRVមួយគ្រឿងរេចង្កូតឡើងលើចិញ្ចើមផ្លូវទៅបុកម៉ូតូកំពុងចតស្ងៀមខ្ទាតតជាច្រើនម៉ែត្រ រងការខូចខាតយ៉ាងដំណំសំណាងល្អមិនបង្កឲ្យមានអ្នករងរបួស។

ហេតុការនេះកើតឡើងកាលពីវេលាម៉ោង១០ និង ២០នាទីយប់ថ្ងៃទី ២៦ ខែកក្កដាឆ្នាំ ២០២១ នៅចំណុចមុខព្រលានយន្តហោះពោធិចិនតុង តាមបណ្តោយផ្លូវសហព័ន្ធរុស្ស៊ី ក្នុងសង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញម៉ូតូហុងដាឃ្លីកពណ៌ក្រហមមួយគ្រឿងពាក់ស្លាកលេខនគរបាល1-8680ដែលម្ចាស់ចតស្ងៀមលើចិញ្ចើមផ្លូវ ខណ:នោះក៍មានបុរសម្នាក់សង្ស័យស្រវឹងស្រាខ្លាំងបើករថយន្តម៉ាកCRVមួយគ្រឿងពណ៌ខ្មៅពាក់ស្លាកលេខភ្នំពេញ2J-8182ធ្វើដំណើរតាមបណ្តោយសហពន្ធ័រុស្ស៊ី ក្នុងទិសដៅពីកើតទៅលិច លុះមកដល់ចំណុចកើតហេតុខាងលើបានរេចង្កូតមកខាងស្ដាំដៃឡើងលើចិញ្ចើមផ្លូវទៅបុកម៉ូតូកំពុងចតស្ងៀមពេញទំហឹងបណ្តាលឲ្យខ្ទាតម៉ូតូជាច្រើនម៉ែត្រ រងការខូចខាតយ៉ាងដំណំ។

ក្រោយកើតហេតុសមត្ថកិច្ចមូលដ្ឋានបានចុះមកដល់ដោយឲ្យភាគីទាំងសងខាងធ្វើការសម្រុះសម្រួលគ្នា ក្រោយពីសម្រុះសម្រួលគ្នាអស់រយៈពេលជិត១ម៉ោង ទើបសម្របសម្រួលគ្នាត្រូវដោយភាគីរថយន្តបានចេញសំណងចំនួន២៥០ដុល្លារទៅឲ្យភាគីម៉ូតូដើម្បីបញ្ចប់រឿងនៅកន្លែងកើតហេតុ៕ដោយ ៖ ជីម ភារ៉ា