ភ្នំពេញ ៖ យោងតាមរបាយការណ៍របស់លោក ឡូ ភារម្យ អធិការរងទទួលផ្នែកបទល្មើសគ្រឿងញៀន ខណ្ឌច្បារអំពៅ បានឲ្យដឹងនៅព្រឹកថ្ងៃទី២០ កុម្ភៈ ២០២០នេះ កម្លាំងសមត្ថកិច្ចនគរបាលប៉ុស្តិ៍ក្បាលកោះ បានឃាត់ខ្លួនជនសង្ស័យម្នាក់ នៅត្រង់ចំណុចខ្ទមចាស់ ផ្លូវលំ  ភូមិ ជ្រោយអំពិល២ សង្កាត់ ក្បាលកោះ ខណ្ឌច្បារអំពៅ រាជធានីភ្នំពេញ នៅវេលាម៉ោង ១៤និង៣០នាទីថ្ងៃទី១៩ ខែកុម្ភៈ ឆ្នាំ២០២០  ពីបទ៖ ជួញដូរដោយខុសច្បាប់នូវសារធាតុញៀន ។

លោកអធិការរងបានឲ្យដឹងទៀតថា ជនសង្ស័យឈ្មោះ ម៉ៅ វិបុល ភេទ ប្រុស អាយុ ៣៦ឆ្នាំ ជនជាតិ ខ្មែរ មុខរបរ មិនពិតប្រាកដ ស្នាក់នៅ ភូមិ ជ្រោយអំពិល១ សង្កាត់ ក្បាលកោះ ខណ្ឌច្បារអំពៅ រាជធានីភ្នំពេញ ។

ក្នុងប្រតិបត្តិការណ៍នេះ សមត្ថកិច្ចដកហូតបានវត្ថុតាងរួមមាន៖
– ក្រាមពណ៌សថ្លា ចំនួន១៣ កញ្ចប់ថង់តូច,- ដែកកេះចំនួន២ – ឧបករណ៍សម្រាប់ជក់គ្រឿងញៀនចំនួន០៤កំប្លេ (បំពង់កែវជក់គ្រឿងញៀនចំនួន ០៣ និងដបជក់គ្រឿងញៀន ០១),- ជញ្ជីងសម្រាប់ថ្លឹងគ្រឿងញៀនចំនួន ០១,- កន្ត្រៃចំនួន ០២,- កាំបិតចំនួន ០១,- ទុយោសម្រាប់ចូកគ្រឿងញៀនចំនួន ០១ ។

បច្ចុប្បន្ននេះ ជនសង្ស័យខាងលើត្រូវសមត្ថកិច្ចកសាងសំណុំរឿងបញ្ជូនទៅអធិការដ្ឋាននគរបាលខណ្ឌច្បារអំពៅ ដើម្បីចាត់ការបន្តតាមនីតិវិធី ៕