កូរ៉េខាងត្បូងបញ្ជាក់ថា គ្មានការសម្រេចចិត្តលើសមយុទ្ធអាមេរិកទេ ប៉ុន្តែសមយុទ្ធនេះមិនគួរបង្កើតឱ្យមានភាពតានតឹងនៅកូរ៉េខាងជើងទេ
សៅ សម្ភស្ស
កូរ៉េខាងត្បូង បាននិយាយនៅថ្ងៃ ច័ន្ទ កន្លងទៅថា ខ្លួនមិនទាន់មានការសម្រេចចិត្តណាមួយអំពីសមយុទ្ធយោធារួមគ្នា ជាមួយសហរដ្ឋអាមេរិកទេ ប៉ុន្តែការធ្វើបែបនេះក៏មិនគួរ បង្កើតឱ្យមានភាពតានតឹងជាមួយកូរ៉េខាងជើងទេ ក្រោយប្រទេសនេះបាន ព្រមានកូរ៉េខាងត្បូងថា កុំឱ្យធ្វើសមយុទ្ធនេះ ចំពេលសញ្ញាទំនាក់ទំនងប្រទេសទាំងពីរកំពុងធ្លាក់ចុះ។
បើតាមឱ្យដឹងពីសារព័ត៌មាន Reuter កូរ៉េខាងត្បូង និងសហរដ្ឋអាមេរិកតែងតែធ្វើសមយុទ្ធយោធាជាទៀងទាត់ ជាពិសេសនៅនិទាឃរដូវ និងរដូវក្តៅ ដែលកូរ៉េខាងជើងតែងតែព្រមានមិនឱ្យធ្វើ ដោយហៅការសកម្មភាពនេះថាជាការហាត់សមសម្រាប់សង្គ្រាម។
លោក គីមយ៉ូជុង បងប្អូនស្រីរបស់មេដឹកនាំកូរ៉េខាងជើង គីមជុងអ៊ុន និងមន្រ្តីជាន់ខ្ពស់គណបក្សពលករ ដែលកំពុងកាន់អំណាច បានព្រមានទីក្រុងសេអ៊ូលកាលពីថ្ងៃ អាទិត្យ ថា ការធ្វើសមយុទ្ធនេះ នឹងកាត់បន្ថយកិច្ចខិតខំប្រឹងប្រែង ដើម្បីកសាងទំនាក់ទំនងឡើងវិញ។
ការព្រមានរបស់លោកស្រី បានកើតឡើងប៉ុន្មានថ្ងៃ បន្ទាប់ពីប្រទេសកូរ៉េទាំងពីរ បានស្តារឡើងវិញនូវខ្សែទូរស័ព្ទបន្ទាន់ នៅក្រុងព្យុងយ៉ាង ដែលបានផ្តាច់ខ្លួនកាលពីមួយឆ្នាំមុន ហើយមន្រ្តីកូរ៉េខាងត្បូង បាននិយាយថា លោក គីម និងប្រធានាធិបតីកូរ៉េខាងត្បូង គឺលោក មូនជេអ៊ីន កំពុងស្វែងរកកាផ្សះផ្សារ ទំនាក់ទំនង ដែលតានតឹងកន្លងមក ហើយនឹងបន្តកិច្ចប្រជុំកំពូលឡើងវិញពេលឆាប់ៗ។
យ៉ាងណាមិញ ក្រសួងការពារជាតិកូរ៉េខាងត្បូង បាននិយាយថា ទីក្រុងសេអ៊ូល និងវ៉ាស៊ីនតោន កំពុងចរចាអំពីសមយុទ្ធនេះ ប៉ុន្តែមិនទាន់មានការសម្រេចចិត្តណាមួយត្រូវបានធ្វើឡើងនោះទេ។ អ្នកនាំពាក្យក្រសួងដដែលនេះ គឺលោក Boo Seung-chan បានប្រាប់សន្និសីទខ្លីមួយថា៖ «យើងមិនមានអ្វីធ្វើអត្ថាធិប្បាយលើសេចក្តីថ្លែងការណ៍ណាមួយទេ ប៉ុន្តែទាក់ទងនឹងលំហាត់យោធា ពេលវេលា និងវិធីសាស្ត្រ យើងមិនទាន់សម្រេចនៅឡើយទេ»។
ប្រភព៖
Seoul says no decision on U.S. drills, but exercises should not create N.Korea tension
