គណបក្សចំបងរបស់ទុយនីស៊ី ធ្លាក់ក្នុងភាពមិនប្រកដប្រជាកាន់តែជ្រៅ ក្រោយសភាត្រូវបានផ្អាកដំនើរការ
ទុសនីស៖ គណបក្ស Ennahdha ជាគណបក្សធំជាងគេបំផុតនៅក្នុងសភារបស់ទុយនីស៊ី កំពុងប្រឈមមុខនឹងវិបត្តិធំបំផុតរបស់ខ្លួនក្នុងរយៈពេលជាច្រើនទសវត្សរ៍ បន្ទាប់ពីលោកប្រធានាធិបតី Kais Saied បានប្រកាសបណ្តេញនាយករដ្ឋមន្រ្តីចេញពីដំណែង និងផ្អាកដំនើរការសភា កាលពីចុងខែកក្កដានេះ។
ប្រធានសភា និងមេដឹកនាំនៃបក្សនេះ លោក Rached Ghannouchi បានហៅការសម្រេចចិត្តរបស់លោក Saied ថាជាការធ្វើរដ្ឋប្រហារ និងមិនស្របតាមច្បាប់រដ្ឋធម្មនុញ្ញ ទោះបីលោកប្រធានាធីបតីរូបនេះអះអាងថា ទង្វើរបស់លោកគឺស្របតាមរដ្ឋធម្មនុញ្ញត្រង់មាត្រា ៨០ ដែលអនុញ្ញាតឱ្យលោកអាចទទួលយកអំណាចប្រតិបត្តិក្នុងពេលមានវិបត្តិជាតិ។
លោក Saied បាននិយាយថា សភានឹងត្រូវផ្អាកដំនើរការតែចំនួន ៣០ថ្ងៃប៉ុណ្ណោះ ហើយអះអាងថាលោកនឹងមិនធ្វើជាជនផ្តាច់ការឡើយ។ ប៉ុន្តែបន្ទាប់ពីប្រធានាធីបតីរូបនេះដកអភ័យឯកសិទ្ធិអ្នកតំណាងរាស្ត្រ អ្នកនយោបាយមកពីគណបក្សផ្សេងៗរួមទាំងសមាជិកបក្ស Ennahdha ជាច្រើននាក់ ត្រូវបានចាប់ខ្លួនប៉ុន្មានថ្ងៃចុងក្រោយនេះ។
លោក Ghannouchi និងគណបក្សរបស់លោក ប្រឈមមុខនឹងវិបត្តិធំបំផុតរបស់ខ្លួនចាប់តាំងពីឆ្នាំ ១៩៨៩ នៅពេលដែលអតីតប្រធានាធិបតីជើងខ្លាំងលោក Zine Abbedine ben Ali បានផ្អាកប្រតិបត្តិការបក្ស Ennahdha ធ្វើឱ្យសមាជិកជាច្រើននៃបក្សនេះរត់គេចខ្លួន ខ្លះជាប់គុក និងអ្នកខ្លះទៀតរងទារុណកម្ម។ ជាថ្មីម្តងទៀត អនាគតគណបក្សកំពុងស្ថិតក្នុងភាពមិនប្រកដប្រជា។
គណបក្ស Ennahdha ត្រូវបានបង្កើតឡើងក្នុងឆ្នាំ ១៩៨១ ជាចលនានិន្នាការអ៊ីស្លាម។ គណបក្សនេះ បានបំបែកចេញនូវសកម្មភាពសាសនា និងនយោបាយរបស់ខ្លួនក្នុងប៉ុន្មានឆ្នាំចុងក្រោយនេះ ហើយនិយមប្រើពាក្យ មូស្លីមប្រជាធិបតេយ្យ។
ចាប់តាំងពីបដិវត្តន៍និទាយរដូវអារ៉ាប់ក្នុងឆ្នាំ ២០១១ ដែលទម្លាក់លោកប្រធានាធិបតី Ben Ali គណបក្ស Ennahdha បានក្លាយជាផ្នែកមួយដ៏សំខាន់នៃរដ្ឋាភិបាលចម្រុះ ហើយឥឡូវនេះក្លាយជាគណបក្សធំបំផុតនៅក្នុងសភា ទោះបីជាខ្លួនកាន់កាប់បានតែមួយភាគបួននៃអាសនៈនៅក្នុងសភាក៏ដោយ។
យ៉ាងណាមិញ ក្នុងរយៈពេលប៉ុន្មានឆ្នាំចុងក្រោយនេះ បក្ស Ennahdha បានក្លាយជាស្នូលនៃកំហឹងរបស់ប្រជាជនទុយនេស៊ី ដែលមិនសប្បាយចិត្តដោយសារវិបត្តិនយោបាយ និងសេដ្ឋកិច្ចរបស់ទុយនីស៊ី ក្រោមការដឹកនាំរបស់គណបក្ស និងរដ្ឋាភិបាលដែលមានលោក Hichem Mechichi ជានាយករដ្ឋមន្រ្តី។
ការប្រឆាំងតវ៉ាលើការគ្រប់គ្រងស្ថានភាពនៃជំងឺកូវីដ-១៩ក្នុងប្រទេសដែលមានអត្រាឆ្លងខ្ពស់បំផុតប្រចាំទ្វីបអាហ្វ្រិក របស់រដ្ឋាភិបាល ការបង្រ្កាបរបស់ប៉ូលីស ការធ្លាក់ចុះនៃសេដ្ឋកិច្ចប្រមាណ ៨ ភាគរយកាលពីឆ្នាំទៅ និងកំណើនភាពអត់ការងារជិត ១៨ ភាគរយ បានធ្វើឱ្យស្ថានភាពរបស់ទុយនីស៊ីកាន់តែយ៉ាប់ទៅៗ។
កាលពីថ្ងៃទី ២៥ ខែកក្កដា ការធ្វើបាតុកម្មប្រឆាំងរដ្ឋាភិបាលបានផ្ទុះឡើងនៅតាមបណ្តាទីក្រុងនានាទូទាំងប្រទេសទុយនីស៊ី ដោយក្រុមបាតុករបានវាយលុកការិយាល័យជាច្រើនរបស់បក្ស Ennahdha រហូតដល់ធ្វើឱ្យលោកប្រធានាធិបតី Saied ដែលជាអ្នកនយោបាយឯករាជ្យ ប្រកាសព្យួរសភា។
ការបំបែកសភាដែលគាំទ្រដោយក្រុមយោធារបស់លោក Saied ហាក់ដូចជាមានប្រជាប្រិយភាពសម្រាប់ប្រជាជនទុយនីស៊ី ទោះបីជាបក្ស Ennahdha រក្សានូវមូលដ្ឋានគាំទ្រដ៏រឹងមាំក៏ដោយ។
លោក Ahmed Gaaloul ទីប្រឹក្សារបស់ Ghannouchi បានប្រាប់សារព័ត៌មាន Al Jazeera ថាសកម្មភាពរបស់លោកប្រធានាធិបតីបានបង្ករឱ្យមានការភ្ញាក់ផ្អើល ដោយលោកនិយាយថា៖ «វាគឺជាការផ្លាស់ប្តូរបដិវត្តន៍ ព្រោះលោក (Saied) កំពុងផ្លាស់ប្តូរប្រទេសពីលទ្ធិប្រជាធិបតេយ្យ សេរីភាព និងការបំបែកអំណាច ទៅជារដ្ឋមួយដែលអំណាចត្រូវបានគ្រប់គ្រងដោយមនុស្សម្នាក់ និងស្ថាប័នតែមួយដែលបង្កហានិភ័យជាច្រើនដល់ប្រទេស»។
លោក Ghannouchi ដែលបច្ចុប្បន្នមានបញ្ហាសុខភាពក្រោយធ្វើតេស្តវិជ្ជមានជំងឺកូវីដ-១៩កាលពីខែមុន ដំបូងឡើយ បានអំពាវនាវឱ្យប្រជាជនចេញមកតវ៉ាប្រឆាំងនឹងលោក Saied ហើយ លោកបានដឹកនាំការតវ៉ានៅខាងក្រៅសភានៅថ្ងៃទី ២៦ ខែកក្កដា។ ប៉ុន្តែក្រោយមក បក្សរបស់លោកប្រកាសថា ខ្លួនអំពាវរកកិច្ចសន្ទនាដើម្បីបញ្ចប់ជម្លោះនយោបាយនេះ។
បច្ចុប្បន្ន គណបក្ស Ennahdha ត្រូវបានបែកបាក់ ហើយការឆ្លើយតបរបស់គណបក្សចំពោះវិបត្តិនេះ មានការស្ទាក់ស្ទើរ និងមិនប្រាកដប្រជា។ អ្នកវិភាគនយោបាយ និងអ្នកនិពន្ធលោក Amine Snoussi បាននិយាយថា ការផ្លាស់ប្តូរសម្ព័ន្ធភាពរបស់ Ennahdha អស់ជាច្រើនឆ្នាំ បាននាំឱ្យមានការបែកបាក់នៅក្នុងបក្សនេះ។
យុទ្ធសាស្ត្រចម្បងរបស់គណបក្ស Ennahdh ឥឡូវនេះ គឺជាផ្នែកមួយនៃការចៀសវាងការប្រឈមមុខដាក់គ្នា និងការកើនឡើងនៃភាពតានតឹង និងស្វែងរកកិច្ចសន្ទនាថ្នាក់ជាតិជាមួយគ្រប់គណបក្សនយោបាយ និងតួអង្គសង្គមស៊ីវិលធំៗ ។ យ៉ាងណាមិញ លោក Snoussi បាននិយាយថា ការធ្លាក់ចុះរបស់បក្សនេះនៅក្នុងជំហរជាសាធារណៈមានន័យថា វាខ្វះនូវភាពក្លាហានផ្នែកនយោបាយ ដើម្បីដឹកនាំការអំពាវនាវឱ្យមានកិច្ចសន្ទនាប្រកបដោយប្រសិទ្ធភាព។
