អភិបាលរដ្ឋញូវយ៉ក Andrew Cuomo ត្រូវអំពាវនាវអោយលាលែងពីតំណែងបន្ទាប់ពីមានបទចោទរឿងផ្លូវភេទ
កាលពីថ្ងៃអង្គារនេះ ការិយាល័យអគ្គរដ្ឋអាជ្ញានៃរដ្ឋញូវយ៉កបានចេញសេចក្តីសង្ខេបលម្អិតពីការស៊ើបអង្កេតរបស់ខ្លួនចំពោះបទចោទប្រកាន់លើអភិបាលរដ្ឋញូវយ៉កលោក Andrew Cuomo។ បន្ទាប់ពីសេចក្តីលម្អិតពីការស៊ើបអង្កេតនេះត្រូវបានផ្សាយដោយមានការអំពាវនាវលោក Andrew Cuomo លាលែងពីតំណែង ហើយការអំពាវនេះរួមមានដោយលោកប្រធានាធិបតីចូ បៃដិនផងដែរនោះ។
តាមការរាយការណ៍របស់សារព័ត៌មាន DW អគ្គរដ្ឋអាជ្ញារដ្ឋញូវយ៉ក លោកស្រី Letitia James បានឱ្យដឹងថាអ្នកស៊ើបអង្កេតបានរកឃើញថា អភិបាលរដ្ឋញូវយ៉កលោក Andrew Cuomo បានបៀតបៀនផ្លូវភេទទៅលើស្រ្តីចំនួន ១១ នាក់ ។ទាក់ទងនឹងករណីចោទប្រកាន់ទៅលើលោក Cuomo ប្រធានាធិបតីសហរដ្ឋអាមេរិក លោក Joe Biden បាននិយាយទៅកាន់អ្នកយកព័ត៌មាននៅទីក្រុងវ៉ាស៊ីនតោនថា៖ «ខ្ញុំគិតថាលោកគួរតែលាលែងពីតំណែង» ។
តាមការផ្តល់សក្ខីកម្មរបស់ជំនួយការប្រតិបត្តិទី ១ នាងបាននិយាយថា កាលពីថ្ងៃទី ៣១ ខែធ្នូ ឆ្នាំ ២០១៩ លោក Cuomo បានសុំនាងថតរូបជាមួយគ្នានៅឯការិយាល័យដែលនៅគេហដ្ឋានផ្លូវការរបស់លោក។ នាងបានបន្តនិយាយថា កំឡុងពេលថតរូបនោះលោកបានយកដៃរបស់លោកមកប៉ះកេរ្ត៍ខ្មាសរបស់នាង។
ជនរងគ្រោះ និងមានងារជាជំនួយការប្រតិបត្តិទី ១ នេះបានផ្តល់សក្ខីកម្មថា នាងភ័យខ្លាចថានាងអាចនឹងបាត់បង់ការងារប្រសិនបើនាងចែករំលែករឿងដែលកើតឡើងនេះ ហើយភ័យខ្លាចដំណឹងនេះដឹងឭទៅដល់បុគ្គលិកជាន់ខ្ពស់។ នាងបាននិយាយថា៖ «របៀបដែលលោកមិនអោយខ្ញុំបង្ហាញរូបថតនោះទៅអ្នកដទៃបានធ្វើអោយខ្ញុំមានភ័យខ្លាចថាប្រសិនបើខ្ញុំនិយាយពីរឿងដែលកើតឡើងនោះ ហើយប្រសិនបើ Stephanie Benton ឬ Melissa ដឹងឭពីរឿងនេះ ខ្ញុំប្រាកដជាបាត់បង់ការងារខ្ញុំហើយ»។
លោក Cuomo មានវ័យ៦៣ឆ្នាំ បដិសេធទៅលើការចោទប្រកាន់នេះ ហើយបាននិយាយថា លោកនឹងមិនចុះចេញពីតំណែងឡើយ។ បន្ទាប់ពីការចេញផ្សាយរបាយការណ៍នោះ លោក Cuomo ក៏បានធ្វើការបញ្ជាក់ពីភាពស្អាតស្អំរបស់លោកជាថ្មីម្តងទៀតដោយលោកនិយាយថា លោកមិនដែលប៉ះពាល់នរណាម្នាក់ដោយមិនសមរម្យឡើយ ។ លោកបានបន្តនិយាយថា ការចោទប្រកាន់ទៅលើរូបលោកគឺត្រូវបានគេប្រឌិត ហើយការស៊ើបអង្កេតនេះត្រូវបានជំរុញបែបលក្ខណៈនយោបាយ និងភាពលំអៀង។
តាមការស្រង់សម្តីរបស់សារព័ត៌មាន Associated Press លោក Cuomo បាននិយាយថា៖ « សម្រាប់អ្នកដែលកំពុងប្រើពេលវេលានេះដើម្បីរកចំណេញផ្នែកនយោបាយ ឬផលប្រយោជន៍ផ្ទាល់ខ្លួន។ ខ្ញុំអាចនិយាយបានថាពួកគេពិតជាធ្វើឱ្យខូចកិត្តិយសជនរងគ្រោះពីអំពើបៀតបៀនផ្លូវភេទដែលច្បាប់នេះបង្កើតឡើងដើម្បីការពារពួកគេ» ។
អគ្គមេបញ្ជាការរដ្ឋញូវយ៉កលោកស្រី James បាននិយាយថា របាយការណ៍ស៊ើបអង្កេតនេះផ្អែកលើកិច្ចសម្ភាសន៍រយៈពេលជិត ៥ ខែដែលមេធាវីឯករាជ្យចំនួនពីររូបបានធ្វើការជាមួយបុគ្គលចំនួន ១៧៩ នាក់ដែលជាសមាជិកបុគ្គលិកនៅការិយាល័យរបស់លោក Cuomo ដែលអ្នកទាំងនោះរួមមាន មន្រ្តី ប៉ូលីស បុគ្គលិករដ្ឋ និងអ្នកផ្សេងទៀតដែលបានធ្វើការជាមួយរូបលោក ។
ទោះជាយ៉ាងណាក្ដី លោក Cuomo បានបដិសេធយ៉ាងដាច់ខាតចំពោះការអំពាវនាវឱ្យរូបលោកចុះចេញពីតំណែងទាក់ទងនឹងបញ្ហាដំណោះស្រាយរោគរាតត្បាតកូវីដ-១៩ ក៏ដូចជាការចោទប្រកាន់ពីបទបៀតបៀនផ្លូវភេទ។ ផ្ទុយទៅវិញ លោកបានផ្តល់សញ្ញាថាលោកមានបំណងបន្តតំណែងរបស់លោកនៅ អាណត្តិទី ៤ ។