អាល្លឺម៉ង់បញ្ជូនយន្តហោះធុន A400M ទៅកាន់រដ្ឋធានីកាប៊ុល ដើម្បីជម្លៀសបុគ្គលិកស្ថានទូត និងជំនួយការអាហ្វហ្គានីស្ថានរបស់ខ្លួន
អាល្លឺម៉ង់៖ កងទ័ពអាល្លឺម៉ង់បាននិងកំពុងបញ្ជូនយន្តហោះដឹកជញ្ជូនធុនធំ A400M ទៅកាន់រដ្ឋធានីកាប៊ុល ដោយមានទាហានឆ័ត្រយោង៣០នាក់នៅលើយន្តហោះ ដើម្បីជម្លៀសបុគ្គលិកស្ថានទូត និងជំនួយការអាហ្វហ្គានីស្ថានរបស់ពួកគេ ខណៈដែលយុទ្ធជនតាលីបង់ឡោមព័ទ្ធរដ្ឋធានីរបស់ប្រទេសមួយនេះ ។ នេះបើតាមសេចក្តីរាយការណ៍របស់ Blid am Sonntag ។
អ្នកនាំពាក្យក្រសួងការពារជាតិអាល្លឺម៉ង់និយាយថា បេសកកម្មជម្លៀសខ្លួនត្រូវបានរៀបចំពេញមួយយប់ដោយមានភាពបន្ទាន់បំផុត ។ មន្ត្រីអាមេរិកបាននិយាយថា ពួកអ្នកការទូតត្រូវបានបញ្ជូនចេញពីស្ថានទូតទៅកាន់អាកាសយានដ្ឋាន។ ទាហានអាមេរិកច្រើនទៀតនឹងត្រូវបញ្ជូនមកជួយការជម្លៀស ក្រោយពីពួកតាលីបង់រុលមកកាន់រដ្ឋធានីលឿនដូចផ្លេកបន្ទោរតែក្នុងរយៈពេលប៉ុន្មានថ្ងៃ ។
មន្ត្រីក្រុមតាលីបង់ម្នាក់ក៏បានប្រាប់សារព័ត៌មានរ៉យទ័រដែរថា ក្រុមខ្លួនមិនចង់ឃើញការបាត់បង់អាយុជីវិតមនុស្សទេ តែក៏មិនមានប្រកាសបទឈប់បាញ់ដែរ ។នៅមិនទាន់មានការបញ្ជាក់អំពីស្ថានភាពរបស់ប្រធានាធិបតីអាហ្វហ្គានីស្ថាន លោក អាសរ៉ាហ្វ ហ្គានី យ៉ាងណានៅឡើយទេ ៕ ប្រភព៖ Reuters
