លោក Kyaw Moe Tun ដែល​ពេល​នេះ​ជា​ឯកអគ្គរដ្ឋទូត​មីយ៉ាន់ម៉ា​ប្រចាំ​អង្គការ​សហប្រជាជាតិ នៅ​តែ​ជឿជាក់​ថា​ ខ្លួន​នៅ​តែ​អាច​បន្ត​ឈរ​ជើង​នៅ​ស្ថាប័ន​ពិភពលោក​នេះ​បាន ទោះ​បី​ជា​រង​ការ​គំរាម​កំហែង​ដល់​សន្តិសុខ​របស់​ខ្លួន ព្រម​ទាំង​ការ​ប្រជែង​ដណ្ដើម​យក​អាសនៈ​របស់​ខ្លួន​នៅ​អង្គការ​សហប្រជាជាតិ​ពី​សំណាក់​រដ្ឋាភិបាល ដឹកនាំ​ដោយ​ក្រុម​យោធា​កំពុង​កាន់​អំណាច។

បុរស​វ័យ ៥២ឆ្នាំ​រូប​នេះ ​ប្រកាស​កាល​ពី​ខែ​កុម្ភៈ​ថា លោក​តំណាង​​ឱ្យ​រដ្ឋាភិបាល​ស៊ីវិល​ដឹកនាំ​ដោយ​គណបក្ស​សម្ព័ន្ធ​ជាតិ​ដើម្បី​ប្រជាធិបតេយ្យ (NLD) ដែល​​ឈ្នះ​ឆ្នោត​កាល​ពី​ខែ​វិច្ឆិកា ឆ្នាំ២០២០។ បុរស​វ័យ ៥២ឆ្នាំ​រូប​នេះ ជា​រឿយៗ​ធ្វើ​ការ​ថ្កោល​ទោស​ខាង​យោធា​ ដែល​ធ្វើ​រដ្ឋប្រហារ​ទម្លាក់​រដ្ឋាភិបាល​ស៊ីវិល។

ការ​ប្រកាន់​ជំហរ​គាំទ្រ​ក្រុម​ស៊ីវិល ធ្វើ​ឱ្យ​ក្រសួង​ការបរទេស​របស់​រដ្ឋាភិបាល​យោធា ប្រកាស​ដក​តំណែង​របស់​លោក​ចេញ ហើយ​ដក​លិខិត​ឆ្លងដែន​របស់​លោក ក៏​ដូច​ជា​ចោទ​ប្រកាន់​លោក​ទូត​រូប​នេះ​ក្រោម​បទ​ល្មើស​ក្បត់​ជាតិ។

កាល​ពី​ដើម​ខែ​សីហា​កន្លង​ទៅ អាជ្ញាធរ​យុត្តិធម៌​អាមេរិក​ចាប់​ខ្លួន​ពលរដ្ឋ​សញ្ជាតិ​មីយ៉ាន់ម៉ា​ចំនួន ២នាក់ ក្រោម​បទ​ល្មើស​នឹង​ការ​ឃុបឃិត​ក្នុង​ការ​វាយប្រហារ និង​បង្ក​អំពើ​ហិង្សា​ទៅ​លើ​ លោក Kyaw Moe Tun។ យោង​តាម​ពាក្យ​បណ្ដឹង​របស់​ការិយាល័យ​ស៊ើបអង្កេត​សហព័ន្ធ​របស់​សហរដ្ឋអាមេរិក​ហៅ​កាត់​ថា FBI បុរស​ទាំង​ពីរ​នាក់​ខាង​លើ​នេះ​ ជា​ពលរដ្ឋ​មីយ៉ាន់ម៉ា​ ដែល​រស់​នៅ​ទីក្រុង​ញូវយ៉ក ដែល​ម្នាក់​មាន​អាយុ ២៨ឆ្នាំ មាន​ឈ្មោះ​ថា Phyo Hein Htut និង​ម្នាក់​ទៀត​មាន​អាយុ ២០ឆ្នាំ​មាន​ឈ្មោះ​ថា Ye Hein Zaw។

អ្នក​ទាំង​ពីរ​នេះ​មាន​ជាប់​ពាក់ព័ន្ធ​ជាមួយ​នឹង​ឈ្មួញ​លក់​អាវុធ​នៅ​ប្រទេស​ថៃ ដែល​ជា​អ្នក​ផ្គត់ផ្គង់​ឱ្យ​យោធា​មីយ៉ាន់ម៉ា​ ដែល​កំពុង​កាន់​អំណាច។ នេះ​បើ​តាម​ពាក្យ​បណ្ដឹង​របស់​ភ្នាក់ងារ​ពិសេស​របស់ FBI ដែល​បង្ហោះ​ជា​សាធារណៈ​នៅ​ក្នុង​គេហទំព័រ​ក្រសួង​យុត្តិធម៌​អាមេរិក។ ​បើ​តាម​សារព័ត៌មាន Irrawaddey ឈ្មួញ​នេះ​ជា​ជនជាតិ​ភូមា ដែល​មាន​បណ្ដាញ​ជាមួយ​យោធា​មីយ៉ាន់ម៉ា។

យ៉ាងណាមិញ ខាង​រដ្ឋាភិបាល​យោធា​មីយ៉ាន់ម៉ា តាម​រយៈ​ក្រសួង​ការបរទេស​ ឆ្លើយតប​ទៅ​វិញ​ថា ខ្លួន​មិន​មាន​ជាប់​ពាក់ព័ន្ធ​នឹង​ព្រឹត្តិការណ៍​នេះ​ឡើយ។

ទាក់ទិន​នឹង​រឿង​នេះ​ដែរ លោក Kyaw Moe Tun សរសេរ​សារ​អរគុណ​ដល់​លោកស្រី Linda Thomas-Greenfield ឯកអគ្គរដ្ឋទូត​អាមេរិក​នៅ​អង្គការ​សហប្រជាជាតិ ក៏​ដូច​ជា​អាជ្ញាធរ​ពាក់ព័ន្ធ​ធ្វើ​ការ​លើ​សំណុំ​រឿង​នេះ នៅ​លើ​បណ្ដាញ​សង្គម Twitter។

លោក​ទូត​មីយ៉ាន់ម៉ា​រូប​នេះ​ប្រាប់​សារព័ត៌មាន The National ថា លោក Phyo Hein Htut ធ្លាប់​ធ្វើ​ការ​ជា​សន្តិសុខ​ស្ម័គ្រ​នៅ​ការិយាល័យ​ធ្វើ​ការ​របស់​លោក​នា​ឯ​ទីក្រុង​ញូវយ៉ក។ បន្ថែម​ពី​លើ​នេះ​ លោក​ប្រាប់​វិទ្យុ​អាស៊ី​សេរី​ថា លោក​ដឹង​ព័ត៌មាន​ពី​ការ​វាយ​ប្រហារ​លើ​រូប​លោក​តាម​រយៈ​សហគមន៍​ជន​ជាតិ​ភូមា នៅ​ញូវយ៉ក តែ​លោក​មិន​បង្ហើប​ថា ភាគី​ណា​ចង់​វាយប្រហារ​រូប​លោក​នោះ​ទេ។

បើ​តាម​ពាក្យ​បណ្ដឹង​របស់​អាជ្ញាធរ​អាមេរិក​ លោក Htut បាន​ព្រម​ជាមួយ​ខាង​ឈ្មួញ​អាវុធ​ថា នឹង​ជួល​មនុស្ស​ឱ្យ​ធ្វើ​ទុក្ខ​បុក​ម្នេញ​ដល់​លោក​ទូត​មីយ៉ាន់ម៉ា ដើម្បី​ជា​ការ​បង្ខំ​ឱ្យ​មន្ត្រី​រូប​នេះ​ចុះ​ចេញ​ពី​តំណែង ហើយ​ប្រសិន​បើ​មិន​ចុះ​ចេញ​ទេ ខាង​ឈ្មួញ​នោះ​ប្រាប់​ឱ្យ ក្រុម​មនុស្ស​ដែល​ជួល​លោក Htut ឱ្យ​សម្លាប់​លោក​ទូត​នោះ​តែ​ម្ដង។

​អាសនៈ​តំណាង​មីយ៉ាន់ម៉ា​នៅ​អង្គការ​សហប្រជាជាតិ នឹង​ក្លាយ​ជា​ប្រធាន​បទ​ក្ដៅ​នៅ​ប៉ុន្មាន​សប្ដាហ៍​ខាង​មុខ​នេះ ខណៈ​គណៈកម្មការ​ទទួល​សារ​តាំង​របស់​ស្ថាប័ន​នេះ​នឹង​សម្រេច​នៅ​ខែ​កញ្ញា​ថា លោក Kyaw Moe Tun ជា​អ្នក​តំណាង​មីយ៉ាន់ម៉ា ឬ បេក្ខភាព​មក​ពី​ខាង​យោធា​ជា​តំណាង​ប្រទេស​អាស៊ីអាគ្នេយ៍​ ដែល​កំពុង​ហ៊ុមព័ទ្ធ​ដោយ​វិបត្តិ​នយោបាយ និង​សង្គម-សេដ្ឋកិច្ច។

ជាមួយ​នឹង​បញ្ហា​នេះ​ដែរ លោក Kyaw Moe Tun លើកឡើង​ប្រាប់​វិទ្យុ​អាស៊ីសេរី​កាល​ពី​ថ្មី​ៗ​នេះ​ថា «យើង​កំពុង​តែ​រៀបចំ​សម្រាប់​មហាសន្និបាត​អង្គការ​សហប្រជាជាតិ​សម័យ​ប្រជុំ​លើក​ទី៧៦ ដែល​នឹង​ចាប់​ផ្ដើម​នៅ​ខែ​ក្រោយ។ សម្រាប់​សម័យ​ប្រជុំ​លើក​ទី៧៥ នៅ​ពេល​បច្ចុប្បន្ន​នឹង​ផុត​កំណត់​នៅ​ខែ​កញ្ញា​ ហើយ​កន្លង​មក​ យើង​មិន​មាន​បញ្ហា​ប្រឈម​ ឬ ការ​ជំទាស់​ [ពី​ភាព​ស្រប​ច្បាប់​នៃ​ការ​តំណាង​មីយ៉ាន់ម៉ា] នោះ​ទេ»។​

«យ៉ាងណាក៏ដោយ យើង​នឹង​ជួប​បញ្ហា​នៅ​សម័យ​ប្រជុំ​ [ទី៧៦] ដោយ​សារ​តែ​ម្ខាង​ទៀត (សំដៅ​លើ​រដ្ឋាភិបាល​យោធា) នឹង​ដាក់​សំណើ​ទៅ​កាន់​គណៈកម្មការ​ទទួល​សារ​តាំង​ដើម្បី​តែងតាំង​បេក្ខភាព​ថ្មី» នេះ​បើ​តាម​ការ​បន្ថែម​របស់​លោក។

កាល​ពី​ខែ​ឧសភា​កន្លង​ទៅ ខាង​រដ្ឋាភិបាល​ណៃពិដោ​ តាម​រយៈ​រដ្ឋមន្ត្រី​ការបរទេស​លោក Wunna Muang Lwin បាន​សរសេរ​លិខិត​ទៅ​កាន់​លោក​អគ្គលេខាធិការ​អង្គការ​សហប្រជាជាតិ​ Antonio Guterres កាល​ពី​ខែ​ឧសភា​កន្លង​ទៅ​ថា លោក Kyaw Moe Tun ត្រូវ​បាន​ដក​ចេញ​ពី​តំណែង​ ហើយ​ជំនួស​វិញ​ដោយ​លោក Aung Thurein ដែល​មាន​ប្រវត្តិ​ជា​មន្ត្រី​យោធា​ជិត ៣០ឆ្នាំ។

លោក Kyaw Moe Tun និយាយ​ប្រាប់​សារព័ត៌មាន The National ថា «អាសនៈ​នេះ​មាន​សារៈសំខាន់​សម្រាប់​ប្រជាជន​មីយ៉ាន់ម៉ា។ តាម​រយៈ​កៅអី​នេះ ខ្ញុំ​អាច​នាំ​សារ​របស់​ប្រជាជន​មីយ៉ាន់ម៉ា និង​ជម្រាប​ទៅ​កាន់​សហគមន៍​អន្តរជាតិ អំពី​ការ​ចង់​បាន​របស់​ប្រជាជន​មីយ៉ាន់ម៉ា»។ លោក​បន្ត​ថា លោក​ «ជឿជាក់» ដែល​សមាជិក​នៃ​គណៈកម្មការ​ទទួល​សារ​តាំង​របស់​អង្គការ​សហប្រជាជាតិ «នឹង​ស្ដាប់​សំឡេង​របស់​ប្រជាជន​មីយ៉ាន់ម៉ា»។

ទាក់ទង​នឹង​រឿង​នេះ​ដែរ លោក​ទូត​មីយ៉ាន់ម៉ា​រូប​នេះ​ទម្លាយ​ប្រាប់​សារព័ត៌មាន Financial Times ថា លោក​កន្លង​មក​ប្រមែប្រមូល​សំឡេង​គាំទ្រ​ពី​សំណាក់​អ្នក​ការទូត​មក​ពី​ប្រទេស​លោក​ខាង​លិច ប្រទេស​អាមេរិក​ឡាទីន ក៏​ដូច​ជា​ប្រទេស​អាហ្វ្រិក។ លោក​និយាយ​ថា លោក​ទទួល​បាន​សញ្ញា​ល្អៗ​ច្រើន តាម​រយៈ​សន្ទនា​ជាមួយ​អស់​លោក​-លោកស្រី​អ្នក​ការ​ទូត​ប្រទេស​ទាំង​នេះ។

លោក Damian Lilly ប្រធាន​ផ្នែក​ការពារ​នៃ​គម្រោង​តម្លាភាព​មីយ៉ាន់ម៉ា​ យល់​ឃើញ​ថា «ប្រសិន​បើ​ក្រុម​ណា​ក្លាយ​ជា​អ្នក​តំណាង​មីយ៉ាន់ម៉ា នោះ​ជា​សញ្ញា​ប្រាប់​ទៅ​កាន់​ប្រជាជន​មីយ៉ាន់ម៉ា​ថា ក្រុម​ជា​ក្រុម​ដឹកនាំ​ប្រកប​ដោយ​ភាព​ស្រប​ច្បាប់»។

លោក Lilly ប្រាប់​សារព័ត៌មាន Financial Times ថា គណៈកម្មការ​ទទួល​សារតាំង​អាច​នឹង​មិន​ទទួល​ស្គាល់​បេក្ខភាព​តំណាង​មក​ពី​ក្រុម​យោធា ក៏​ដូច​ជា​មិន​បន្ត​ទទួល​ស្គាល់​លោក Kyaw Moe Tun ត​ទៅ​ទៀត ហើយ​ទុក​អាសនៈ​អង្គការ​សហប្រជាជាតិ​ឱ្យ​នៅ​ទំនេរ៕