មនុស្សរាប់ពាន់នាក់ចូលរួមធ្វើបាតុកម្ម ទាមទារឱ្យនាយករដ្ឋមន្ត្រីថៃចុះចេញពីដំណែង
បាងកក៖ ក្រុមបាតុកររាប់ពាន់នាក់ជិះរថយន្ត និងកង់ ប្រមូលផ្តុំគ្នានៅសង្កាត់ផ្សារកណ្តាលទីក្រុងបាងកកកាលពីថ្ងៃអាទិត្យ ដែលជាការប្រមូលផ្តុំចល័តមួយនៅទូទាំងប្រទេសថៃ ទាមទារឱ្យលោកនាយករដ្ឋមន្ត្រី ប្រាយុទ្ធ ចាន់អូចា ចុះចេញពីតំណែងដោយសារការបរាជ័យរបស់រដ្ឋាភិបាលលើការគ្រប់គ្រងការរីករាលដាលនៃជំងឺកូវីដ-១៩។
ប្រទេសនេះ កំពុងប្រឈមមុខនឹងការផ្ទុះឡើងដ៏អាក្រក់បំផុតរបស់ខ្លួន ដោយរហូតមកទល់ពេលនេះ មានអ្នកឆ្លងជាង ៩០៧ ០០០ ករណី និងមានអ្នកស្លាប់ ៧ ៥៥១ នាក់ដោយសារកូវីដ-១៩ ។ ភាពយឺតយ៉ាវនៃវ៉ាក់សាំង រួមជាមួយបញ្ហាហិរញ្ញវត្ថុពីការរឹតបន្តឹងអាជីវកម្មជាច្រើនសប្តាហ៍ បានធ្វើឱ្យមានការខឹងសម្បារចំពោះរដ្ឋបាលលោកប្រាយុទ្ធ។
ក្រោយមានការព្រួយបារម្ភអំពីការប្រមូលផ្តុំសាធារណៈអាចធ្វើឱ្យវីរុសកាន់តែរីករាលដាល ក្រុមអ្នកតវ៉ាបានចាប់ផ្តើមរៀបចំក្បួនរថយន្ត និងម៉ូតូដ៏ធំនៅតាមផ្លូវបំបែកធំៗ ដែលធ្វើឱ្យស្ទះផ្លូវនៅក្រុងបាងកក។ ក្រុមអ្នកតវ៉ាដែលចូលរួមដោយព្រះសង្ឃ និងក្រុមអ្នកស្រឡាញ់ភេទដូចគ្នា បានបញ្ចេញពន្លឺនៃការតស៊ូដោយម្រាមដៃបី។
លោក Nattawut Saikuar អ្នកនយោបាយដែលមានទំនាក់ទំនងជាមួយអតីតនាយករដ្ឋមន្រ្តីលោក ថាក់ស៊ីន ស៊ីណាវ៉ាត្រា (Thaksin Shinawatra) បាននិយាយថា៖ «ដល់ពេលលោកប្រាយុទ្ធហើយ។ រដ្ឋាភិបាលបានបង្ហាញយ៉ាងច្បាស់ ថាពួកគេនឹងមិនទទួលខុសត្រូវចំពោះការបាត់បង់ណាមួយឡើយ»។
បាតុកម្មកាលពីថ្ងៃអាទិត្យ កើតឡើងបន្ទាប់ពីការប៉ះទង្គិចគ្នាមួយសប្តាហ៍រវាងក្រុមបាតុករ និងប៉ូលីសដែលបានប្រើគ្រាប់កាំភ្លើងជ័រ កាណុងបាញ់ទឹក និងឧស្ម័នបង្ហូរទឹកភ្នែក ដើម្បីបញ្ឈប់ការប្រមូលផ្តុំគ្នា។ ការប្រមូលផ្ដុំដោយយានជំនិះបែបនេះ ក៏ត្រូវបានគេគ្រោងទុកធ្វើឡើងនៅក្រុងឆ្នេរប៉ាតាយ៉ា ក៏ដូចជានៅឈៀងម៉ៃផងដែរ។
