បន្ទាយមានជ័យ ៖ គ្រូពេទ្យយោធា និងលើរថយន្តចល័តយោធភូមិភាគទី៥ ចាក់វាក់សាំង ដូសទី១ ការពារជំងឺកូវិត-១៩ ជូនបុគ្គលិក កម្មករកាស៊ីណូនិងពលរដ្ឋនៅសេសសល់នៅក្រុងប៉ោយប៉ែតកាលពីថ្ងៃទី១៦ ខែសីហា ឆ្នាំ២០២១ ។

ដំណើរការយុទ្ធនាការលើកទី២ នៃការចាក់វ៉ាក់សាំងនោះធ្វើឡើងដោយគ្រូពេទ្យយោធានិងលើរថយន្តចល័តយោធភូមិភាគទី៥ ដោយធ្វើត្រង់ ១/ចំណុចរង្វង់មូលប៉ោយប៉ែត  ជាប់កាស៊ីណូហ្គ្រែនដាយអឺមិុនស៊ីធី (Grand Diamond City casino) និង២/នៅក្រោនស្ទូចត្រី  ។ 

គ្រូពេទ្យយោធាបានឱ្យដឹងថា  ដំណើរការចាក់វ៉ាក់សាំងដូសទី ១នេះ នឹងឡើង ៥ថ្ងៃដោយចាប់ផ្តើមពីថ្ងៃទី១៦ ខែសីហា តទៅ ។ លោក ញឹម ផឿង នាយករដ្ឋបាលសាលាក្រុងប៉ោយប៉ែតបានឱ្យដឹងថា បុគ្គលិក កម្មករកាស៊ីណូនិងពលរដ្ឋនៅសេសសល់នៅក្រុងប៉ោយប៉ែតដែលមិនទាន់បានចាក់វ៉ាកសាំង មានប្រមាណ ២ម៉ឺននាក់ ។ 

សូមរំលឹកថា កាលពីយុទ្ធនាការចាក់វ៉ាក់សាំងទ្រង់ទ្រាយធំលើកទី១ កាពីថ្ងៃទី១ ខែកក្កដា ឆ្នាំ២០២១ នៅក្រុងប៉ោយប៉ែត បានចាក់វ៉ាក់សាំងជូនមន្ត្រីរាជការ អាជីវករ ពលរដ្ឋ កម្មករក្នុងក្រុង និងព្រះសង្ឃមកពីទូទាំងខេត្តប្រមាណ ៦០.០០០នាក់រួចហើយ ។ 

ជាការសង្កេតក្នុងដំណើរការយុទ្ធនាការលើកទី២នៃការចាក់វ៉ាក់សាំងនៅក្រុងប៉ោយប៉ែតនាថ្ងៃនេះ  បុគ្គលិក កម្មករក្រុមហ៊ុនកាស៊ីណូ និងអនឡាញ និងពលរដ្ឋបាប្រជ្រៀតគ្នាយ៉ាងច្រើនណែនតាន់ ហើយសឹងតែភ្លេចអនុវត្តវិធាន៣កុំ ៣ការពាររបស់រាជរដ្ឋាភិបាល និងវិធាននានារបស់ក្រសួងសុខាភិបាល ៕ ដោយ ឃិន គន្ធា